imurign 90 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ar‑zrayn‑uwssan‑nġ

taẓallit n‑musa ah̬ddam n‑rbbi

¹ wa rbbi kiyin a‑igan azwag‑nġ zġ‑tasut n‑tasutin.

² ġ‑ur‑ta‑luln idrarn ula tskrt akal tkkit‑ttin bdda tgit rbbi, ra‑tgt rbbi dima.

³ ar‑ttrarat imzdġn n‑ddunit s‑wakal, tinit «wrryat a‑tarwa n‑bnadm.»

⁴ alf n‑usggʷas gan ġ‑iẓri‑nk zund igḍam lli‑izrin, zund tasaɛt n‑iyḍ.

⁵ da‑ttawit bnadm zund anggay n‑wasif, nzri kullwaġ zund tawargit, zund tuga imġin zikk ṣbaḥ.

⁶ tmġi‑d zikk tnkr tut s‑ujddig, tsllaw tiqar s‑tdggʷat.

⁷ issġuwḍ‑aġ lġaḍab‑nk ihlk‑aġ ssh̬ṭ‑nk,

⁸ tssbayynt kullu ddnub‑nġ ġ‑lgddam‑nk. tzzudft a‑rbbi ġaylli idln ġ‑uwlawn‑nġ,

⁹ s‑lġaḍab a‑s‑a‑ttbbit tudrt‑nġ, zund tunfust ad‑zrayn‑uwssan‑nġ.

¹⁰ sa n‑id‑mraw ad‑gan isggʷasn n‑bnadm, nġd tam id‑mraw i‑yan iṣḥan. ur‑gisn‑nzzri abla takrrayt d‑tmmara, ḥina‑s‑tmman nayll zġ‑ġi.

¹¹ ma‑issnn jjhd n‑ssh̬ṭ‑nk a‑rbbi? ma‑issnn tiksaḍ n‑lġaḍab‑nk?

¹² sslmd‑aġ a‑rbbi a‑ntḥasab ussan‑nġ afad a‑iɛmmr‑uwl‑nġ s‑tḥkimt‑nk.

¹³ ar managu a‑sidi rbbi a‑ra‑fllanġ‑tili tagat? ḥnnu fllanġ twrrit‑d s‑ih̬ddamn‑nk.

¹⁴ tɛmmar‑aġ zikk s‑tayri‑nk izgan, a‑nfrḥ ar‑ak‑nttirir kullu ussan‑nġ.

¹⁵ fk‑aġ‑d a‑rbbi ussan n‑lfrḥ unšk n‑win‑tguḍiwin lli‑zġ‑aġ‑tzzrit. fk‑aġ‑d a‑rbbi isggʷasn n‑lfrḥ unšk n‑win‑tnukmut lli‑fllanġ‑izrin.

¹⁶ ml‑aġ‑d a‑rbbi lquwwa n‑iskkirn‑nk, tssbayynt‑d lmajd‑nk i‑tarwa‑nġ.

¹⁷ a‑fllanġ‑yili‑ufulki n‑sidi rbbi tbarkt iskkirn n‑ifassn‑nġ. d‑iskkirn n‑ifassn‑nġ, bark‑tn a‑rbbi.