imurign 78 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ra‑t‑nmala i‑tasut‑ad‑d‑yuškan

almmud n‑rrays asaf

¹ wa mddn‑inu, sfldat i‑ulmmud‑inu, trarm‑d imẓgan s‑ma‑rad‑awn‑iniġ.

² lmɛna n‑ma‑ijran a‑f‑rad‑rẓmġ imi, mlġ‑awn‑d maylli intln f‑tasut‑ad.

³ nkka‑ttin nsfld‑as nissan fllas, ar‑aġ‑t‑addrn id‑babatnġ.

⁴ ur‑ra‑t‑nssntal f‑tarwa‑nsn. d‑ra‑t‑nmala i‑tasut‑ad‑d‑yuškan, ad‑sfldn f‑ifulkitn n‑rbbi da‑illan, issann jjhd‑ns d‑lɛjayb lli‑iskr.

⁵ rbbi izzga tuggʷa‑ns ġ‑ayt‑yaɛqub, issrṣu ilmmadn‑ns ġ‑ayt‑israyil. yuṣṣa id‑babatnġ a‑tn‑sslmadn i‑tarwa‑nsn,

⁶ f‑a‑fllasn‑tissan tasut da‑d‑yuškan, zaydn ilmma willi rad‑darsn‑ilal. mln‑tn ula ntni i‑tarwa‑nsn.

⁷ ġmkan a‑s‑ra‑n‑kullu‑gn rrja‑nsn ġ‑rbbi. d‑ur‑sar‑rad‑ttun iskkirn‑ns. ar‑tt‑bdda‑tawin ġ‑luṣiyat‑ns.

⁸ a‑ur‑wrrin gn zund id‑babatsn, lli‑igan tasut n‑imɛṣan, iqqur ih̬f‑nsn, d‑ntni ur‑tzga nniyt n‑uwl‑nsn. wala tra rruḥ‑nsn a‑tmun d‑rbbi.

⁹ han ayt‑afraym lli‑iqlldn s‑lqus, wrrin tiġurdin ġ‑wass n‑imiġ.

¹⁰ ur‑zgan ntni ġ‑lɛhd n‑rbbi, agʷin ad‑skarn s‑ulmmud‑ns.

¹¹ ttun iskkirn‑ns d‑lɛjayb lli‑asn‑imla.

¹² lɛjayb a‑iskr ġ‑iẓri n‑id‑babatsn, ġ‑uzaġar n‑ṣuɛan ġ‑wakal n‑miṣr.

¹³ ibḍu amda izzgr‑tn ġ‑wammas‑ns, issbidd aman issgudi‑tn‑in.

¹⁴ azal ar‑asn‑izgguru ġ‑umdlu, ula s‑tifawt n‑lɛafiyt iḍ kullut.

¹⁵ ġ‑wammas n‑lh̬la a‑ġ‑istġ iẓran issu‑tn, zund iġ‑d‑ngin‑waman zġ‑tdrut n‑wakal.

¹⁶ issufġ‑asn‑d talɛint zġ‑ujarif, huwwdn‑d‑darsn‑waman zund asif.

¹⁷ imma ntni zuydn ar‑ti‑tknadn, ar‑tɛṣun rbbi amattuy ġ‑lh̬la.

¹⁸ gn ġ‑uwl‑nsn ad‑armn rbbi, ḍalbn ma‑tšthun ġ‑tiram mimnin.

¹⁹ sawln ġ‑rbbi inin: «is‑iẓḍar rbbi a‑d‑isrs tirmt ġ‑lh̬la?

²⁰ wah̬h̬a yut aẓru, ffint‑d talɛinin n‑waman, is‑iẓḍar a‑d‑isrs ula aġrum i‑mddn‑ns, ifk‑aġ tifiyi?»

²¹ isfld‑asn sidi rbbi, nkrn‑d gis iriyn, tznd lɛafiyt‑ns f‑ayt‑yaɛqub.

²² iġḍb f‑ayt‑israyil ašku ur‑uminn ġ‑rbbi ula rjan‑in ġ‑ujnjm‑ns.

²³ imil yamr imdla n‑tattuyt, irẓm‑d iflwan n‑ignna,

²⁴ ar‑d‑fllasn‑izzuguz aġrum n‑‹man› zund anẓar, ifk‑asn‑d imndi n‑ignna a‑t‑šttan.

²⁵ ar‑tšbaɛn mddn‑an aġrum n‑lmlayka, ar‑asn‑d‑isras maylli‑tn‑yuwdan.

²⁶ issnkr‑d aẓawaḍ zġ‑usġlay n‑tafukt, idḥi‑d aḍu zġ‑tsgiw n‑trġi.

²⁷ iffi‑d fllasn tifiyi zund tiẓratin n‑wakal, issayl‑asn‑d igḍaḍ zund amlal n‑imdwan.

²⁸ iluḥ‑tn‑in ġ‑wammas n‑usras‑nsn, lulliyn‑d kullu i‑ih̬iyyamn‑nsn.

²⁹ ššn zġ‑gisn ġakudan aylliġ šbɛn, ašku ifka‑yasn‑d rbbi maylli šthan.

³⁰ ur‑ta‑kmmiln maylli ran, sul illa ġ‑imi‑nsn,

³¹ iġḍb fllasn rbbi, inġ imdwas‑nsn, issḍr iɛyyaln zġ‑ayt‑israyil.

³² wah̬h̬a kullu ġayan, qaman ġ‑tkndawt. ẓran lɛjayb‑ns walaynni ur‑gis‑uminn.

³³ irar ilmma ussan‑nsn zrin zund yat‑tunfust, isstmmu isggʷasn‑nsn s‑tawda.

³⁴ lliġ a‑tn‑inqqa, bdun ar‑t‑siggiln, wrrin‑d s‑nniyt‑nsn ar‑gis‑sqsan.

³⁵ ktin‑d izd rbbi ad‑asn‑igan ajarif n‑laman, ktin‑d izd walli yattuyn a‑tn‑d‑ifukkan.

³⁶ zaydn ar‑ti‑ttalġn s‑iwaliwn h̬wanin, tikrkas a‑mi‑isfld zġ‑infurn‑nsn.

³⁷ ur‑rin a‑gis‑amẓn s‑nniyt n‑uwl‑nsn, ula skrn f‑ad‑zgan ġ‑lɛhd‑ns.

³⁸ imma ntta iga wad itrḥamn. hati idl ddnub‑nsn, ur‑tn‑ifni. mnnawt‑twal ad‑asn‑issunf iriyn‑ns. ur‑yudji lġaḍab a‑fllasn‑iznd.

³⁹ issn izd ġir tifiyi ad‑gan, zund aḍu da‑izrayn ur‑sar‑d‑iwrri.

⁴⁰ mnnawt‑twal a‑t‑ɛṣan ġ‑lh̬la, ar‑as‑tt‑ssṭiyarn ġ‑izaġarn aggugnin.

⁴¹ kigan d‑twal a‑tarmn ṣṣbr‑ns, ar‑ssqlaqaln rbbi amẓlay n‑ayt‑israyil.

⁴² ur‑sul‑rin ad‑d‑swingimn taẓḍḍart‑ns, ula ġ‑wass lli‑ġ‑tn‑d‑ifukka zġ‑unuwwaš.

⁴³ ur‑a‑d‑kttin timitar lli‑d‑imla ġ‑miṣr, ula lɛjayb lli‑iskr ġ‑uzaġar n‑ṣuɛan,

⁴⁴ irur isaffn‑nsn gn idammn, d‑ur‑ẓḍarn ad‑sun ġ‑iġbula‑nsn.

⁴⁵ irẓm‑d fllasn izan ggutnin ar‑tn‑lbbin, yazn‑asn‑d igʷra ad‑ssrkun tamazirt.

⁴⁶ ifk ilmma ṣṣabt n‑igran i‑tmurġi, yadj lġllt‑nsn i‑ibršan.

⁴⁷ aḍil igr‑t‑id s‑ibruri, ikuzarn issh̬ṣr‑tn s‑ugris.

⁴⁸ yut kullu lksibt‑nsn s‑ibruri, ula lbhaym‑nsn s‑uwsman.

⁴⁹ irẓm‑d i‑uqlaql d‑urfufn ula lġaḍab ijddrn, zund yan‑ukabar n‑lmlayka lli‑ifnnun.

⁵⁰ ur‑n‑iḥṣar iriyn‑ns ula issunf‑asn lmut. isrs‑n tudrt‑nsn i‑waṭṭan inqqan.

⁵¹ yut kullu ifh̬dditn n‑ayt‑miṣr, imzwura n‑udwas‑nsn ġ‑ih̬iyyamn n‑ayt‑ḥam.

⁵² izwur‑d ilmma i‑mddn‑ns zund tawrut, iṣug‑tn zund ulli ġ‑wammas n‑lh̬la.

⁵³ yawi‑tn ġ‑laman a‑ur‑iksaḍn yat, han ula inuwwašn‑nsn, iṣrṭ‑tn‑umda.

⁵⁴ isslkm‑tn ar awttu n‑wakal lli‑iẓli, s‑uwrir‑ad lli‑ifra s‑ufus‑ns afasi.

⁵⁵ hati iṭṭay iqbiln ġ‑lgddam‑nsn, ibḍu‑asn ikalln lli‑rad‑ṭṭafn, izzdġ tiqbilin n‑israyil ġ‑iduran‑nsn.

⁵⁶ nkrn daġ ar‑tarmn rbbi amattuy, ɛṣun‑t, ur‑tt‑iwin ġ‑tuggʷa‑ns.

⁵⁷ fln‑t ġḍrn‑t zund id‑babatsn, ɛwwjn zund lqus lli‑izgaln ḍḍrbt.

⁵⁸ ssṭiyrn‑as‑tt lliġ a‑knnun i‑iẓran nqšnin, ssqlaqln‑t s‑ikʷrkar‑nsn ġ‑iggi n‑iwrar.

⁵⁹ isfld‑asn sidi rbbi nkrn‑d gis iriyn, iwrri f‑ayt‑israyil ġakudan ifl‑tn.

⁶⁰ iffuġ tazdġt‑ns lli‑illan ġ‑šiluh, ifl ah̬iyyam lli‑ġ‑illa ġ‑wammas n‑bnadm.

⁶¹ yadj ṣṣnduq n‑lɛhd‑ns a‑ityamaẓ, ig tamatart n‑lmajd‑ns ġ‑ufus n‑inuwwašn.

⁶² iluḥ‑n mddn‑ns ġ‑ifassn n‑ayt‑uwzzal, izzugz lġaḍab‑ns f‑willi igan wins.

⁶³ d‑lɛafiyt a‑išttan iɛyyaln ġ‑gratsn, laḥ i‑tɛyyalin tallġatin n‑tmġra.

⁶⁴ ḍrn imsakmurn kullutn s‑uwzzal, d‑ur‑ufint‑tmġarin‑nsn mamnk a‑allant.

⁶⁵ inkr‑d rbbi‑nġ zund yan‑d‑yukʷin zġ‑iyṭs, zund amdwas lli‑ihajn ar‑itġuwwat.

⁶⁶ hati issrwl inuwwašn‑ns issukt‑tn, irar‑tn a‑tn‑bdda‑tigʷraẓ.

⁶⁷ ur‑iẓli tarwa n‑yusf ula isti taqbilt n‑afraym.

⁶⁸ hati ira taqbilt n‑yahuda, d‑uwrir n‑ṣiyun lli‑dars‑iɛzzan.

⁶⁹ ibnu tazdġt‑ns zund ignna yattuyn, izzga‑tt zund ddunit lli‑rad‑bdda‑idum.

⁷⁰ isti dawd a‑ig ah̬ddam‑ns, yawi‑t‑id zġ‑gr‑tuwrutin n‑uwlli,

⁷¹ a‑ur‑sul‑itḍfur tihray lli‑ssngaynin, walaynni a‑ikssa mddn‑ns n‑ayt‑yaɛqub, d‑ayt‑israyil lli‑ra‑ig lwrt‑ns.

⁷² izayd ntta ar‑tn‑ikssa s‑uwl inmn, d‑ifassn ḥaršnin a‑s‑a‑ysn‑izgguru.