imurign 66 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

allayt awal‑nun a‑imzdġn n‑ddunit

i‑rrays n‑umarg, tallġat, amarg

¹ allayt awal‑nun a‑imzdġn n‑ddunit, ar‑taqram i‑rbbi s‑lfrḥ iggutn,

² ar‑ttirirm ar‑ttmjjadm ism‑ns, ar‑kullu‑ttalġm timuġra‑ns.

³ tinim i‑rbbi: «mnšk a‑s‑a‑ssġuwḍn iskkirn‑nk. mnšk a‑tggut lquwwa‑nk itjhhdn, aylliġ a‑n‑tkmmašn inuwwašn‑nk ġ‑umnid‑nk.

⁴ ar‑ak‑tsjadn kullu imzdġn n‑ddunit, ar‑ak‑ttirirn, ar‑tsbbaḥn i‑ism‑nk.»

⁵ aškat‑d a‑tẓrm ma‑iskr rbbi. lɛjayb‑ns ar‑ssġuwḍnt tarwa n‑bnadm.

⁶ irur amda ig taġart, bbin ula asif f‑uḍar. ġin a‑ġ‑nfrḥ s‑iġarasn‑ns.

⁷ ar‑bdda‑itnbaḍ‑ufus‑ns itjhhdn, ḍufnt‑walln‑ns kullu ayt‑tmizar, a‑ur‑srs‑nkrn imɛṣan.

⁸ alġat rbbi‑nġ a‑iqbiln n‑ddunit, a‑itkka lḥmd‑ns ula darun.

⁹ nttan a‑iḥṣarn f‑tudrt‑nġ, ur‑yudji iḍarn‑nġ ad‑nšgn.

¹⁰ wa rbbi, hati turmt‑aġ, tṣṣfut‑aġ zund nnʷqrt.

¹¹ tgt‑aġ ġ‑ššbkt, tsrst fllanġ ma‑iẓẓayn.

¹² tawit‑d imnayn ar‑taḍḍrn ih̬fawn‑nġ. tzzrit‑aġ zġ‑lɛafiyt d‑unggay n‑waman, tssufġt‑aġ‑d tigira s‑udġar n‑laman.

¹³ rad‑dduġ s‑tgmmi‑nk s‑isakmurn jdrnin, ssafuġ kullu maylli‑f‑ak‑ggulliġ,

¹⁴ fkġ‑ak maylli‑s‑ak‑qawln infurn‑inu, inna‑yak‑t imi‑nu ġ‑tasaɛt n‑tnukmut.

¹⁵ rad‑ak‑ssattuyġ ma‑iḍnin ġ‑tġrṣiw jdrnin, s‑wawwu n‑izamarn d‑win imugayn d‑ibukirn.

¹⁶ aškat‑d tsfldm, a‑willi ituqqarn rbbi, mlġ‑awn kullukʷn ma‑iskr ġ‑tudrt‑inu.

¹⁷ nttan a‑mi‑iġra imi‑nu d‑nttan a‑ittalġ ils‑inu.

¹⁸ mrad is‑ḥḍiġ kra n‑lɛib ġ‑uwl‑inu, ur‑rad‑iyi‑isfld rbbi‑nu.

¹⁹ s‑lḥqq isfld‑iyi rbbi, yawi‑tt ġ‑mad‑as‑ḍalbġ.

²⁰ a‑yili lḥmd i‑rbbi lli‑ur‑d‑iqqin f‑tẓallit‑inu, ula ikks flla tayri‑ns izgan.