imurign 51 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

wa rbbi skr gigi ul iṣfan

i‑rrays n‑umarg, amarg n‑dawd, lliġ‑d‑srs‑yuška nnabi natan tigira n‑ma‑ikšm f‑batšibaɛ

¹ wa rbbi, ḥnnu flla s‑tayri‑nk idumn, tsfiḍt takndawt‑inu s‑rrḥmt‑nk yuwfan.

² sird‑iyi bahra zġ‑lɛib‑ad skrġ, tssġust‑iyi zġ‑lh̬ʷšant‑inu.

³ ašku ssnġ mnšk a‑s‑jliġ nkki, ar‑bdda‑swingimġ ġ‑lbaḍl‑inu.

⁴ kiyin ad‑ġḍrġ s‑uggʷar, skrġ ma‑yʷh̬šnn ġ‑iẓri‑nk. trart‑d flla s‑wawal yʷġẓann, tḥkamt flla s‑lḥqq iṣḥan.

⁵ zġ‑ungaẓ n‑tlalit ad‑skarġ lh̬ʷšant. gġ bu‑ddnub zġ‑lliġ tusi inna aḥlig.

⁶ ssnġ izd lḥqq a‑trit ġ‑uwl n‑yan. sslmd‑iyi taḥkimt a‑gigi‑ttnbaḍ.

⁷ rušš‑iyi s‑uzukkʷni, ṣfuġ. sird‑iyi, mllulġ uggʷar n‑udfl.

⁸ adj‑iyi ad‑daġ‑sfldġ i‑taḍṣa ma‑issfraḥn, trart‑d ih̬ṣan lli‑tbrit ad‑daġ‑fjjijn.

⁹ dl alln‑nk f‑tkndawin‑inu, tsfiḍt flla lḥsab n‑lɛyub‑inu.

¹⁰ wa rbbi, skr gigi ul iṣfan, trart‑d rruḥ izgan ġ‑ugʷns‑inu.

¹¹ a‑ur‑iyi‑teṭṭayt zġ‑dark a‑rbbi, wala tkkst flla rruḥ‑nk iṣfan.

¹² fk‑iyi ad‑daġ‑frḥġ s‑ujnjm‑nk, tssdust‑iyi s‑nniyt a‑k‑bdda‑rḍuġ.

¹³ rad‑malaġ iġarasn‑nk i‑imɛṣan, wrrin‑d dark willi ijlan.

¹⁴ fukku‑yyi a‑rbbi zġ‑watig n‑idammn‑an, f‑a‑ittirir ils‑inu f‑ufulki‑nk, ay‑anjjam‑inu.

¹⁵ wa rbbi‑nu, rẓm infurn‑inu, s‑ha imi‑nu ar‑itbrraḥ s‑lḥmd‑nk.

¹⁶ mrad is‑ra‑tfrḥt s‑tġrṣiw, rad‑ak‑tnt‑fkġ, imma kiyi ur‑a‑ttrḍut s‑twafkiw jdrnin.

¹⁷ tawafka lli‑ira rbbi, tga‑tt rruḥ irẓan. d‑uwl ityagasn s‑nndamt, ur‑ra‑ti‑tḥgart a‑rbbi.

¹⁸ a‑trḍut f‑ṣiyun tskrt‑as afulki, tbnut daġ igudar n‑urušalim.

¹⁹ tfrḥt ġakudan s‑tġrṣiw ṣlaḥnin, d‑isakmurn jdrnin lli‑rad‑ak‑ityawfka, ar‑ak‑n‑tattuyn igayzn f‑umġraṣ‑nk.