imurign 40 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

iswangm‑iyi‑d bdda

i‑rrays n‑umarg, amarg n‑dawd

¹ giġ‑n rrja‑nu ġ‑sidi rbbi, qamaġ ar‑srs‑tqlġ. igrawl‑d ilmma sri, isfld i‑twaġra‑inu.

² yall‑iyi‑d zġ‑tnuḍfi n‑uqqryan ġ‑wammas n‑ubluẓ idran, issbidd iwurzan‑inu f‑uẓru irṣan, izzga tawada‑nu ġ‑uġaras yasstwan.

³ ig amarg n‑ljdid ġ‑imi‑nu, amarg n‑lḥmd i‑rbbi‑nġ. iggut ma‑ra‑yyi‑iẓr iġuwḍ, iwrri yamn ġ‑sidi rbbi.

⁴ ambarki a‑iga‑urgaz lli‑istamnn ġ‑sidi rbbi, ur‑a‑ibnnu f‑id‑bu‑isfurrugn, ula da‑itḍfur id‑bu‑tkrkas.

⁵ wa sidi rbbi‑nu, ggutnt lɛjayb‑nk ula tiġawsiwin lli‑ginġ‑tqṣadt. hati iskkirn‑nk ssurfn lḥsab. iġ‑a‑fllasn‑sawalġ, ur‑rad‑iẓḍarġ a‑tn‑kmmlġ.

⁶ tiġrṣiw d‑twafkiw, ur‑a‑tnti‑ttirit, walaynni trẓmt imẓgan‑inu ad‑sflidġ. tiġrṣiw jdrnin d‑isakmurn f‑tjli, ur‑jjid kiyi a‑srsn‑irḍan.

⁷ imma nkki nniġ‑ak: «ha‑yyi uškiġ‑d, ġmklli flla ityaran ġ‑warra‑nk,

⁸ iriġ ad‑skrġ ma‑trit a‑rbbi‑nu. hati almmud‑nk illa ġ‑uwl‑inu.»

⁹ brrḥġ s‑ujnjm ġ‑tamunt imqqurn, tssnt a‑sidi rbbi is‑ur‑qqinġ imi‑nu.

¹⁰ sawlġ‑asn f‑tayri‑nk idumn. ur‑fssaġ f‑mamnk a‑yyi‑tfukkit. ur‑ssrgsġ f‑tamunt imqqurn lḥnant‑nk ula tayri‑nk izgan.

¹¹ wa sidi rbbi, a‑ur‑n‑flla‑tḥḍut rrḥmt‑nk. zayd tgablt‑iyi s‑tayri‑nk ula lḥnant‑nk izgan.

¹² hati kigan d‑lh̬ʷšanat ayd‑iyi‑isutln, ssaykn flla ddnub‑inu ssbukḍn‑iyi. hatnin utin inẓaḍn n‑ih̬f‑inu, ššġašan ul‑inu.

¹³ wa sidi rbbi, rḍu flla tjjnjmt‑iyi. ḥarru‑d a‑rbbi da‑illan, tɛawnt‑iyi.

¹⁴ had flla willi iran a‑yyi‑kksn tudrt. ašk‑id tssmuttlt‑tn f‑ad‑kullu‑nḥaššamn. ha willi inuwwan a‑yyi‑ssyagasn. ssgrawl‑tn tiġurdin ad‑amẓn agʷri.

¹⁵ hay‑ayt‑lɛar ar‑gigi‑ṭṭnaẓn. ssġuwḍ‑tn f‑h̬ziyt lli‑rad‑asn‑yili.

¹⁶ ad‑kullu‑srk‑fjjijn willi‑k‑isiggiln. frḥn willi iran ajnjm‑nk ar‑bdda‑ttinin: «mnšk a‑s‑imqqur sidi rbbi.»

¹⁷ nkki ur‑giġ yat wala dari yat, walaynni rbbi‑nu iswangm‑iyi‑d bdda. kiyi tgit aɛwin‑inu tgt anjjam‑inu. a‑ur‑n‑tmaṭlt ġilad a‑rbbi‑nu.