imurign 37 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

rad‑as‑kullu‑tggru s‑sslamt

amarg n‑dawd

¹ ad‑ur‑tqlaqlt f‑ssibt n‑ayt‑lɛar, wala tḥsadt willi itsalan lh̬ʷšant.

² ġir imikk rad‑sllawn zund tuga, iqarn zund igʷlasn n‑lbur.

³ amn ġ‑sidi rbbi tsalat afulki, s‑tzdġt ġ‑wakal tksst ġ‑laman.

⁴ ssfrḥ ih̬f‑nk s‑rbbi da‑illan, ifk‑ak ma‑ira‑uwl‑nk.

⁵ g‑n aġaras‑nk ġ‑gr ifassn n‑sidi rbbi, tamnt gis d‑nttan a‑ra‑t‑ikmml.

⁶ ra‑irar afulki‑nk a‑yisfiw zund azal, ar‑issmrġa lḥqq‑nk zund tuẓẓunt n‑wass.

⁷ ġir thnna ġ‑lgddam n‑sidi rbbi, tqlt srs s‑ṣṣbr. ad‑ur‑tqlaqlt f‑bu‑tillay da‑itnjaḥn ġ‑iskkirn‑ns.

⁸ ssitti‑n fllak iriyn, tssh̬sit lġaḍab lli‑gik‑illan, ašku han aqlaql ar‑itawi s‑ššrr

⁹ rbbi da‑illan ra‑issukf ayt‑lɛar, d‑willi‑n‑gis‑irjan a‑ra‑iṭṭaf akal.

¹⁰ ġir imikk rad‑laḥ bu‑lh̬ʷšant. iġ‑srs‑tsigglt ġ‑illiġ illa, ur‑sul‑ra‑t‑in‑taft.

¹¹ han willi itṣbarn a‑ra‑iṭṭaf akal, frḥn bdda ntni s‑sslamt yuwfan.

¹² bu‑lh̬ʷšant ar‑imddi i‑wad iṣlaḥn, ar‑fllas‑itigẓaẓ uh̬ṣan‑ns.

¹³ imma siditnġ ar‑iḍṣṣa ġ‑bu‑lh̬ʷšant, iẓr‑n ass n‑lhalak‑ns yakmur‑d.

¹⁴ ayt‑lɛar ldin‑d uzzal, mdin ula lqus, ad‑utn willi dar idrus d‑willi ur‑dar yat, irin ad‑ġrṣn i‑willi isalan afulki.

¹⁵ imma ntni, rad‑rẓn lqwas‑nsn, ikʷi‑n‑uwzzal ġ‑uwl‑nsn.

¹⁶ imikk nna‑illan ġ‑ufus n‑yan iṣlaḥn yuf kigan lli‑ṭṭafn ayt‑lh̬ʷšant ggutnin.

¹⁷ sidi rbbi a‑yusin willi ṣlaḥnin, irẓ taġruṭṭ n‑ayt‑lɛar.

¹⁸ sidi rbbi a‑igabln ussan n‑willi ṣfanin, yili‑asn lwrt idumn.

¹⁹ rad‑šbɛn ġ‑uwssan n‑uġʷni inqqan, d‑ur‑rad‑nḥaššamn ġ‑uzmz išqan.

²⁰ han ayt‑lɛar rad‑tthlkn laḥ‑tn, zrin inuwwašn n‑sidi rbbi zund ijddign n‑lh̬la, imikk s‑tn‑laḥ, ġmklli tlaḥ awwu.

²¹ ar‑d‑irṭṭl bu‑lh̬ʷšant, ur‑akkʷ‑a‑itrara. imma wad iṣlaḥn da‑yakka s‑lḥnant.

²² willi‑ġ‑ibark sidi rbbi a‑ra‑iṭṭaf akal, imma willi ih̬za, rad‑kullu‑zġ‑gis‑akufn.

²³ iġ‑irḍa sidi rbbi s‑uġaras n‑yan, da‑gis‑izzga tawada‑ns.

²⁴ wah̬h̬a‑t‑yut ifikš, ur‑ra‑n‑iḍr f‑uwdm‑ns, ašku sidi rbbi ad‑as‑yumẓn afus.

²⁵ kkiġ‑tt‑in mẓẓiġ, ha‑yyi ġilad uwssrġ, ur‑jji‑ẓriġ yan iṣlaḥn, ityawfal waḥdut, ula ẓriġ tarwa‑ns ar‑tjaran aġrum.

²⁶ ass kullut ar‑itḥnnu ar‑irṭṭl, imbarkiyn a‑rad‑gn tarwa‑ns.

²⁷ itti zġ‑lh̬ʷšant, ar‑ttsalat afulki, hati ra‑tzdġt bdda ġ‑wakal.

²⁸ ašku sidi rbbi, iɛzza dars lḥqq, ur‑sar‑ifil willi yumẓn aġaras‑ns. kullu mayd iftan rad‑fllasn‑itḥṣar, issukf amud n‑willi ʷh̬šnnin.

²⁹ willi ṣlaḥnin a‑ra‑iṭṭaf akal, rad‑gis‑zdġn kullu mayd iftan.

³⁰ imi n‑wad iṣlaḥn ar‑isawal s‑tḥkimt, d‑ils‑ns ar‑bdda‑izzga lḥqq.

³¹ almmud n‑rbbi‑ns a‑illan ġ‑uwl‑ns, d‑ur‑sar‑nšgn iḍarn‑ns.

³² han bu‑lh̬ʷšant ar‑itḍuf walli iṣlaḥn, ar‑bdda‑isiggil mamnk a‑ra‑t‑ihlk.

³³ imma sidi rbbi ur‑ra‑t‑ifl ġ‑ufus‑ns, d‑ur‑ra‑t‑yadj a‑fllas‑ittut lbaḍl.

³⁴ rju‑n ġ‑sidi rbbi, tqamat ġ‑uġaras‑ns, hatin ra‑k‑yall baš a‑teṭṭaft akal, tẓrt willi ʷh̬šnnin akufn zġ‑gis.

³⁵ ẓriġ bu‑lh̬ʷšant lli‑iqjrn ar‑issiwid, zund aṣġar ibuġlan ifsrn iṣṭṭwan‑ns.

³⁶ yan kra d‑ntta ur‑sul‑iqama, hati sigglġ srs, ur‑t‑sul‑ufiġ.

³⁷ tmnad ġ‑wad iṣfan, tawit‑stt ġ‑wad inmn, ašku rad‑as‑kullu‑tggru s‑sslamt.

³⁸ han imɛṣan ra‑tthlkn laḥ‑tn, d‑lfna a‑s‑ra‑tggru i‑ayt‑lh̬ʷšant.

³⁹ sidi rbbi a‑ra‑ijjnjm willi ṣlaḥnin, ig‑asn antal n‑laman ġ‑tizi n‑tnukmut.

⁴⁰ sidi rbbi a‑ra‑tn‑iɛawn ifukku‑tn, ifukku‑tn zġ‑ayt‑lɛar ijjnjm‑tn, ašku nttan a‑ġ‑a‑n‑tzawagn.