imurign 34 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

mḍyat afulki n‑rbbi

amarg n‑dawd, lliġ iskr zund inufl ġ‑dar abimalik, aylliġ‑t‑issmsr iddu

¹ ra‑ttalġġ sidi rbbi kraygatt luqt. ar‑bdda‑itkka lḥmd‑ns imi‑nu.

² ul‑inu ar‑issɛzza rbbi da‑illan. sfldayt‑iyi a‑igllinn, tfjjijm.

³ nkrat a‑didi‑ttmjjadm sidi rbbi, a‑kullu‑nssattuy ism‑ns iɛzzan.

⁴ sigglġ s‑sidi rbbi ġikkan isfld‑iyi, ifukku‑yyi‑d zġ‑kullu ma‑yyi‑issiksaḍn.

⁵ willi srs ittalln alln, hatni ar‑sufun, d‑ur‑sar‑nḥaššamn‑uwdmawn‑nsn.

⁶ giġ igllin ġrġ i‑sidi rbbi, isfld‑iyi, ijjnjm‑iyi zġ‑kullu ma‑yyi‑ihuwwln.

⁷ hati isslulliy‑d lmalak n‑sidi rbbi i‑willi‑t‑ituqqarn, ar‑tn‑d‑itfukku.

⁸ mḍyat tẓrm mnšk a‑s‑ifulki sidi rbbi. ambarki a‑iga wanna gis izawgn.

⁹ uqqrat sidi rbbi ġ‑kraygatt luqt a‑imẓlayn‑ns, ašku willi‑t‑ituqqarn, ur‑ra‑tn‑ih̬ṣṣa yat.

¹⁰ ula ikzinn n‑izm ar‑tiḍɛafn s‑laẓ, imma willi isiggiln sidi rbbi, ur‑ra‑ysn‑tlaḥ ma‑ifulkin.

¹¹ aškat‑d a‑tarwa tsfldm‑iyi, f‑ad‑awn‑sslmdġ a‑ttuqqarm sidi rbbi.

¹² is‑illa ma‑iran a‑issfjjij tudrt‑ns, issigt ussan‑ns, iṭrrḥ bdda ġ‑lh̬ir?

¹³ ih̬ṣṣa a‑tssittit lɛib zġ‑ils‑nk, tkkst takndawt i‑infurn‑nk,

¹⁴ twrrit‑d zġ‑ma‑yʷh̬šnn, ar‑ttsalat afulki, ar‑tsiggilt sslamt, tẓẓut gis a‑stti‑tamẓt.

¹⁵ alln n‑sidi rbbi ar‑tgabalnt willi iṣlaḥn, imẓgan‑ns rẓmn‑d i‑ismummʷin‑nsn.

¹⁶ udm n‑sidi rbbi iga ḍiḍḍ i‑ayt‑lɛar, ra‑isfiḍ akttay‑nsn zġ‑wakal.

¹⁷ imma willi yaqran s‑sidi rbbi, hati isfld‑asn, ifukku‑tn zġ‑kullu ma‑tn‑ihuwwln.

¹⁸ sidi rbbi yakmur‑d s‑wanna‑mi‑tjdr tasa‑ns, ar‑ijjnjam willi mi ttyagas rruḥ.

¹⁹ ar‑ttigatnt tassasin dar yan iṣlaḥn, ifukku‑t sidi rbbi zġ‑kraygatt yat,

²⁰ ijjnjm ih̬ṣan‑ns, ur‑gisn‑irẓi yan.

²¹ taguḍi a‑s‑rad‑hlkn ayt‑lh̬ʷšant, yili lḥukm f‑willi ikurhan ayt‑ufulki.

²² sidi rbbi ra‑ifukku tudrt n‑ih̬ddamn‑ns, ur‑ra‑ihlk yan zġ‑ġwilli gis izawgn.