imurign 33 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

frḥat s‑sidi rbbi

¹ frḥat s‑sidi rbbi a‑kullu willi‑f‑irḍa. illa f‑willi inmn a‑ti‑ttalġn.

² kkatat rribab ar‑ttškarm rbbi da‑illan, ar‑as‑ttirirm s‑imis bu‑mraw luṭrat.

³ asyat‑as amarg n‑ljdid, s‑tijjijt n‑luṭar išwan ula s‑twaġra n‑lfrḥ.

⁴ hati yʷġẓan‑wawal n‑sidi rbbi, iban‑d laman‑ns ġ‑kullu ma‑iskar.

⁵ sidi rbbi, iɛzza‑dars‑ufulki ula lḥqq, tɛmmr ddunit s‑tayri‑ns izgan.

⁶ awal n‑sidi rbbi a‑s‑tyawskarn ignwan, d‑uṣwaḍ n‑imi‑ns a‑s‑kullu‑llan itran.

⁷ issmun aman n‑umda issgudi‑tn, iḥḍu aman n‑tdrut ġ‑tnuḍfi‑ns.

⁸ illa f‑kullu ddunit a‑ttuqqar sidi rbbi, ġuwḍn kullu imzdġn n‑wakal ġ‑umnid‑ns.

⁹ aynna‑s‑inna yili, d‑aynna‑s‑yumr ijru.

¹⁰ sidi rbbi ar‑issmuttul imšiwirn n‑iqbiln, ar‑irẓẓa ma‑tnuwwan ayt‑tmizar.

¹¹ kra iqṣad sidi rbbi a‑rad‑bdda‑yili, izga maylli inuwwa‑uwl‑ns zġ‑tasut ar tasut.

¹² ambarki a‑iga‑uqbil da‑mi‑iga siditsn rbbi da‑illan, imbarkiyn ad‑gan willi iẓli ad‑gn wins.

¹³ ar‑d‑itmnad sidi rbbi zġ‑ignwan, igabl kullu tarwa n‑bnadm.

¹⁴ igawr f‑lɛrš ar‑d‑issmuqqul, iẓr kullu imzdġn n‑ddunit.

¹⁵ nttan a‑ih̬lqn ul n‑kraygatt yan, ar‑ituwzan kullu iskkirn‑ns.

¹⁶ urd tugtt n‑lɛskr a‑s‑a‑itnjam‑ugllid, nġd afus itjhhdn a‑itfukkun bab n‑imiġ.

¹⁷ yan itɛnnan s‑wayyis, rad‑as‑yili‑ugʷri. urd bu‑ifaddn a‑ra‑t‑ifukku zġ‑uwzzal.

¹⁸ sidi rbbi a‑itgabaln willi‑t‑ituqqarn, gn‑n kullu rrja‑nsn ġ‑tayri‑ns izgan.

¹⁹ d‑nttan a‑ra‑ifukku rruḥ‑nsn zġ‑lmut, ijjnjm tudrt‑nsn ġ‑uzmz n‑uġʷni.

²⁰ ha‑yaġ ar‑ntql s‑sidi rbbi, nttan a‑igan aɛwin‑nġ ig antal‑nġ.

²¹ nttan a‑s‑a‑itfraḥ‑uwl‑nġ, ašku ntɛnna s‑ism‑ns yattuyn iṣfan.

²² a‑fllanġ‑tili tayri‑nk izgan a‑sidi rbbi, ašku rrja‑nġ gik a‑ġ‑n‑illa.