imurign 27 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ma‑zġ‑rad‑iksaḍġ?

amarg n‑dawd

¹ sidi rbbi iga tifawt‑inu ig anjjam‑inu. ma‑zġ‑rad‑iksaḍġ? sidi rbbi iga lbrj‑inu iḥḍu tudrt‑inu. ma‑ra‑yyi‑issiwd?

² iġ‑d‑uškan id‑bu‑lh̬ʷšant a‑yyi‑hlkn, rad‑knukin ḍrn inuwwašn‑an.

³ d‑iġ‑iyi‑sutln ayt‑imiġ ggutnin, ur‑ra‑yiksaḍ‑uwl‑inu. d‑iġ‑d‑kullu‑ġlin s‑imqlad n‑imiġ, ha nkki rad‑zɛmġ.

⁴ yat‑tġawsa ad‑ḍalbġ zġ‑sidi rbbi, ġir nttat ad‑riġ. ḍalbġ‑as ad‑zdġġ ġ‑tgmmi‑ns tamẓlayt kullu ma‑rad‑ddrġ, ar‑gis‑swingimġ ġ‑illiġ illa nttan, issanġ tamimt‑ns.

⁵ ra‑yyi‑iḥḍu sidi rbbi ġ‑ddu‑tduli‑ns ġ‑uzmz n‑tnukmut. rad‑bdda‑yyi‑issntal ġ‑untal‑ns izgan, ig‑iyi‑n f‑ujarif yattuyn n‑laman,

⁶ yall ih̬f‑inu f‑inuwwašn lli‑yyi‑isutln. rad‑allġ awal‑inu s‑lfrḥ iggutn, ssakmurġ‑as‑n tiwafkiw ġ‑untal‑ns amẓlay, asiġ amarg, ayrirġ i‑sidi rbbi.

⁷ sfld‑iyi a‑sidi rbbi, ha‑yyi ġriġ‑ak‑n. ḥnnu flla tɛawnt‑iyi.

⁸ tnnit: «akmurat‑d tissanm‑iyi.» yini‑ak‑uwl‑inu: «kiyi a‑sidi rbbi a‑s‑n‑akmurġ.»

⁹ a‑ur‑twrrit taggugt‑n zġ‑gigi. ha kiyi a‑igan lɛawan‑inu. a‑ur‑iyi‑tagʷit tbzgt flla tflt‑iyi. ha kiyi a‑igan anjjam‑inu.

¹⁰ iġ‑iyi‑akkʷ‑ifl baba ula immi, kiyi a‑sidi rbbi ra‑yyi‑bdda‑tirit.

¹¹ ml‑iyi a‑sidi rbbi ma‑gigi‑tqṣadt, tguwwdt‑iyi bdda ġ‑uġaras yasstwan, ar‑iyi‑tssinift i‑willi‑yyi‑itkrhun.

¹² a‑ur‑iyi‑tflt ġ‑ufus n‑inuwwašn ar‑flla‑sskirkisn ar‑gigi‑rggmn.

¹³ umnġ is‑rad‑ẓrġ ġ‑tudrt n‑ddunit‑ad afulki n‑sidi rbbi.

¹⁴ rju ġilad ġ‑sidi rbbi, tdust tzzɛamt ul‑nk. rju ġilad ġ‑sidi rbbi.