imurign 25 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

kiyin a‑ġ‑n‑giġ rrja

amarg n‑dawd

¹ kiyin a‑sidi rbbi a‑mi‑n‑ullġ rruḥ‑inu.

² kiyin a‑rbbi‑nu a‑ġ‑bahra‑umnġ. a‑ur‑iyi‑tadjt ad‑nḥaššamġ, wala tudjt inuwwašn a‑flla‑ssfurrugn.

³ s‑lḥqq ur‑sar‑inḥaššam wanna‑n‑gik‑irjan. han iknnadn a‑ra‑inḥaššam s‑wawal‑nsn ih̬wan.

⁴ wa sidi rbbi, mala‑yyi‑d kullu ma‑tqṣadt, ar‑iyi‑tsslmadt iġarasn‑nk,

⁵ tguwwdt‑iyi s‑lḥqq n‑ulmmud‑nk, ašku kiyin a‑igan rbbi anjjam‑inu, d‑kiyin a‑ġ‑a‑n‑trjuġ ass kullut.

⁶ wa sidi rbbi a‑ur‑tettut rrḥmt‑nk ula tayri‑nk izgan, ašku zġ‑zman ad‑bdda‑srsnti‑tskart.

⁷ a‑ur‑di‑tswingimt ddnub n‑mẓẓiy‑inu ula mamnk ad‑jliġ zġ‑uġaras‑nk. awi‑tt gigi ġilad s‑tayri‑nk izgan, tskrt a‑sidi rbbi s‑ufulki‑nk yuwfan.

⁸ ifulki sidi rbbi, ig wad bdda inmn, ar‑imala aġaras i‑wanna zġ‑gis ijlan.

⁹ ar‑itguwwad ġ‑uġaras n‑lḥqq yan iran a‑isfld ar‑isslmad ma‑iqṣad i‑yan iran a‑t‑yissan.

¹⁰ sidi rbbi ar‑bdda‑iskar s‑lḥqq ula lḥnant i‑willi iqaman ġ‑lɛhd‑ns ula ġ‑tuggʷa‑ns.

¹¹ f‑ssibt n‑ism‑nk a‑rbbi da‑bdda‑illan, a‑f‑ḍalbġ a‑yyi‑tṣamḥt, ašku iggut lɛib‑inu.

¹² manwa ġ‑bnadm a‑ituqqarn sidi rbbi? nttan a‑mi‑ra‑iml aġaras a‑t‑yamẓ.

¹³ lh̬ir a‑ġ‑ra‑iqama‑uwl‑ns, iṭṭaf‑wamud‑ns akal.

¹⁴ sidi rbbi iga amddakkʷl n‑willi‑t‑ituqqarn, d‑ntni a‑mi‑ra‑d‑imala lɛhd‑ns.

¹⁵ rurġ‑n bdda alln‑inu s‑rbbi da‑illan, ašku nttan a‑d‑itkksn iḍarn‑inu zġ‑ššbkt.

¹⁶ mnad gigi tḥnnut flla, ha‑yyi ġ‑urfufn d‑ur‑dari yan.

¹⁷ tggut‑tkrrayt n‑uwl‑inu. ašk‑id tkkst flla taġuft‑ad.

¹⁸ mnad‑d ġ‑tguḍi‑nu išqan, tṣamḥt‑iyi f‑kullu lɛyub‑inu.

¹⁹ ẓr matta ġunškad gan inuwwašn‑inu, han tanuwwašt iqjrn ayd‑s‑a‑yyi‑tkrhun.

²⁰ ḍuf tudrt‑inu, tfukkut‑iyi, d‑a‑ur‑iyi‑tadjt ad‑nḥaššamġ, ašku kiyin a‑ġ‑zawgġ.

²¹ amsntl‑inu iga‑t‑uwl inmn d‑nniyt iṣfan, ašku kiyin a‑ġ‑n‑giġ rrja.

²² fukku ayt‑israyil a‑rbbi, zġ‑kullu tiġufiwin‑nsn.