imurign 145 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ra‑ki‑tmjjadġ ay‑agllid imqqurn

amarg n‑tulġa, win dawd

¹ ra‑ki‑tmjjadġ ay‑agllid imqqurn, rad‑bdda‑ttalġġ ism‑nk kullu mayd iftan.

² kraygatt ass ra‑ki‑tškarġ a‑rbbi‑nu, ar‑tḥmadġ ism‑nk kullu mayd iftan.

³ mnšk a‑s‑imqqur sidi rbbi. tuška‑d dids tulġa. ur‑illi ma‑ilkmn tawassna n‑tmuġra‑ns.

⁴ tasut ra‑ttɛawad i‑ṭayyaḍ f‑iskkirn‑nk, ar‑tbrraḥn f‑lquwwat lli‑tqṣadt.

⁵ ra‑ttalġn lmajd‑nk lli‑issmrġan s‑ufulki, ar‑addrġ kullu lɛjayb lli‑tskrt.

⁶ rad‑sawaln f‑lḥkamat‑nk issiwidn, ar‑asn‑malaġ mnšk a‑tmqqurt.

⁷ ra‑tasin imurign f‑ufulki‑nk ikmmln, ar‑ttirirn f‑lḥqq lli‑s‑a‑bdda‑tskart.

⁸ sidi rbbi iga wad itḥnnun ar‑itrḥam. ur‑a‑izrab a‑iġḍb, tigat dars tayri izgan.

⁹ sidi rbbi ar‑iskar afulki i‑kullu ma‑illan, ar‑itḥnnu f‑kullu ma‑ih̬lq.

¹⁰ kullu ma‑th̬lqt a‑sidi rbbi ra‑k‑ittalġ, ar‑ki‑tškarn kullu ayt‑uġaras‑nk.

¹¹ rad‑sawaln f‑lmajd n‑tgldit‑nk, ar‑addrn taẓḍḍart‑nk itjhhdn.

¹² ar‑tɛlamn tarwa n‑bnadm s‑lquwwat‑nk, ula tagldit‑nk lli‑issmrġan s‑ufulki.

¹³ tagldit‑nk a‑igan tad bdda idumn, rad‑bdda‑ttḥkamt f‑kullu tasutin. sidi rbbi iga wad issuwfan iwaliwn‑ns, ar‑bdda‑iskar s‑lḥnant‑ns izgan.

¹⁴ sidi rbbi iga tannalt i‑wanna ra‑iḍr, yall‑d wanna illan ġ‑ddu taẓẓayt.

¹⁵ tyalalnt‑srk‑walln n‑kullu ma‑illan, ar‑asn‑di‑takkat tiram ġ‑uzmz‑nsnt.

¹⁶ ar‑ttnurẓumt tidiklt n‑ufus‑nk, ar‑tššbaɛt kullu ma‑iddrn s‑tamimt.

¹⁷ sidi rbbi iga wad bdda iqṣadn afulki, ar‑bdda‑iskar s‑lḥnant‑ns izgan.

¹⁸ sidi rbbi yakmur‑d s‑wanna‑n‑srs‑yaqran, s‑wanna‑n‑srs‑yaqran s‑nniyt n‑uwl‑ns.

¹⁹ ar‑yakka i‑willi‑t‑ituqqarn aynna‑f‑lkmn, ar‑isflid i‑tġuya‑nsn ifukku‑tn.

²⁰ sidi rbbi ar‑issntal winna‑t‑ittirin, imma willi ʷh̬šnnin, ra‑tn‑kullu‑ihlk.

²¹ tulġa n‑sidi rbbi a‑s‑ra‑isawal imi‑nu, f‑a‑d‑inkr kullu ma‑igan tifiyi, ar‑ittalġ ism‑ns iṣfan kullu mayd iftan.