imurign 143 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

yaġ‑iyi irifi‑nk

amarg n‑dawd

¹ wa sidi rbbi sfld i‑twaġra‑nu, tssḥssut sri, ḍalbġ‑ak a‑flla‑tḥnnut, tjawbt‑iyi‑d s‑tayri‑nk d‑ufulki‑nk izgan.

² a‑ur‑n‑tawit ah̬ddam‑nk s‑lmḥkama‑nk, ašku ur‑illi yan iṣlaḥn ġ‑umnid‑nk.

³ hay‑anuwwaš ar‑isshraš lɛaql‑inu, imzi tudrt‑inu d‑wakal, izzugz‑iyi ġ‑tillas zund willi mmutnin ġ‑zman,

⁴ aylliġ ttġaša rruḥ, iġuwḍ‑uwl‑inu.

⁵ ha‑yyi ktiġ‑d ussan lli‑zrinin, ar‑addrġ i‑ih̬f‑inu kullu ma‑tskrt, ar‑d‑swingimġ iskkirn n‑ifassn‑nk.

⁶ ha‑yyi mdiġ‑ak‑n ifassn‑inu, yaġ‑iyi irifi‑nk zund akal iqqurn.

⁷ ḥarru‑d a‑sidi rbbi, tɛawnt‑iyi. imikk ur‑th̬si rruḥ‑inu. a‑ur‑n‑flla‑tdlt udm‑nk, a‑ur‑munġ d‑willi iggʷzn s‑ugʷḍi n‑lmut.

⁸ sawl‑iyi‑d zikk f‑lḥnant‑nk izgan, ašku kiyi a‑ġ‑umnġ. ml‑iyi aġaras ma‑ġ‑a‑ttiduġ, ašku kiyi a‑mi‑n‑ullġ rruḥ‑inu.

⁹ jjnjm‑yyi a‑sidi rbbi zġ‑inuwwašn‑inu, ašku gik a‑ġ‑zawgġ.

¹⁰ sslmd‑iyi a‑tlhuġ s‑ma‑k‑irḍan, ašku kiyin a‑igan rbbi‑nu. adj rruḥ‑nk ifulkin a‑yyi‑iguwwd ġ‑uġaras yasstwan.

¹¹ s‑ism‑nk a‑rbbi da‑bdda‑illan, ḥṣar f‑tudrt‑inu. tfukkut rruḥ‑inu zġ‑tnukmut s‑ufulki‑nk izgan.

¹² s‑tayri‑nk idumn a‑s‑ra‑tfnut inuwwašn‑inu, thlkt willi isshrašn lɛaql‑inu, ašku ha nkki ah̬ddam‑nk ad‑giġ.