imurign 139 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tawassna

i‑rrays n‑umarg, amarg n‑dawd

¹ wa sidi rbbi tẓrit agʷns‑inu tissant‑iyi,

² tissant iġ‑gawrġ ula iġ‑nkrġ, tissant‑d zġ‑tuggugt ma‑ġ‑a‑swingimġ.

³ tissant iġ‑ffuġġ ula iġ‑gnġ, tissant a‑rbbi kullu mad‑skarġ.

⁴ ur‑ta‑immuss ils‑inu, tssnt a‑sidi rbbi kullu ma‑rad‑iniġ.

⁵ tsutlt‑iyi bdda zġ‑kraygatt tasga, tḥṣart flla s‑jjhd n‑ufus‑nk.

⁶ tɛjjbġ a‑rbbi ġ‑twassna‑yad‑nk, tattuy bahra flla, ur‑as‑ẓḍarġ.

⁷ manis rad‑dduġ ad‑anfġ i‑rruḥ‑nk? ula manis rad‑rwlġ a‑fllak‑rgsġ?

⁸ iġ‑ġliġ s‑ignna, ġin a‑ġ‑tllit kiyi. iġ‑n‑gnġ ġ‑tdrut n‑wakal ula ġin tllit gis.

^9-10 iġ‑nkrġ ayllġ s‑usġlay n‑tafukt, ula ġin afus‑nk a‑ra‑yyi‑iguwwd. iġ‑bbiġ amda zdġġ‑n ġ‑tsga yaggugn, ula ġin ra‑yyi‑gis‑yamẓ‑ufus‑nk afasi.

^11-12 iġ‑ḍalbġ tillas a‑yyi‑dlnt, ġ‑iẓri‑nk a‑rbbi ur‑akkʷ‑llasnt. iġ‑ḍalbġ azal a‑iwrri ig iḍ, ġ‑dark a‑rbbi iga iḍ zund azal, tillas ula tifawt yan ad‑dark‑gant.

¹³ kiyin a‑iskrn igzman n‑ddat‑inu, tzzdit‑iyi‑n s‑tntla ġ‑waḥlig n‑inna.

¹⁴ tɛjjbġ ġ‑tḥkimt lli‑s‑iyi‑th̬lqt. lɛjb ad‑gan kullu iskkirn‑nk. issanġ mayad bahra, iḥmd‑k‑uwl‑inu.

¹⁵ lliġ‑iyi‑di‑th̬lqt ġ‑tdrut n‑ddunit, ur‑fllak‑ntiln ih̬ṣan n‑wazzan. tɛdlt iẓuran‑inu ġ‑uruku irgsn,

¹⁶ ar‑iyi‑tmnadt lliġ ur‑ta‑lulġ. tarat flla ussan n‑tudrt‑inu kullutn. ilin ġ‑warra‑nk ur‑ta‑ẓriġ tifawt.

¹⁷ tɛjjbġ a‑rbbi ġ‑iswingimn‑nk. kraygatt kra illan ar‑gis‑tswingimt.

¹⁸ iġ‑tn‑kullu‑ssmunġ rad‑igatn f‑umlal, sul ur‑rad‑issanġ mamnk a‑tgit.

¹⁹ amar yufan a‑thlkt ayt‑lh̬ʷšant a‑rbbi, tssittit‑n flla ġwid inuwwan ad‑nqqan.

²⁰ hatni ar‑gik‑ṭṭnaẓn ar‑rggmn ġ‑ism‑nk.

²¹ is‑ur‑kurhiġ willi‑k‑ikurhan a‑sidi rbbi? is‑ur‑ḥašaġ willi srk yusin tanuwwašt?

²² ur‑tn‑ḥmilġ ula sar ra‑tn‑iḥmalġ. hati giġ‑tn d‑inuwwašn‑inu.

²³ wa rbbi siggl gigi tissant ul‑inu. arm‑iyi tissant mad‑swingimġ,

²⁴ tẓrt is‑gigi‑illa kra yʷh̬šnn, tguwwdt‑iyi‑bdda ġ‑uġaras idumn.