imurign 138 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lḥnant‑nk ula tayri‑nk izgan

amarg n‑dawd

¹ ar‑ki‑tškarġ a‑sidi rbbi zġ‑ttmi n‑uwl‑inu. ġ‑umnid n‑kullu ayt‑ignna ar‑ak‑ttirirġ.

² ar‑knnuġ s‑tsga n‑tgmmi‑nk tamẓlayt, mjjdġ ism‑nk f‑lḥnant‑nk ula tayri‑nk izgan. hati tssattuyt awal‑nk d‑ism‑nk f‑iggi n‑kullu ma‑illan.

³ ġ‑wass lli‑ġ‑ak‑ġriġ, hati tsfldt‑iyi, tssmasst rruḥ‑inu s‑zzɛmt.

⁴ kullu igldan n‑ddunit ra‑ki‑ttalġn a‑sidi rbbi, ġakud nna‑sfldn i‑maylli‑s‑tnnit.

⁵ ar‑kullu‑ttirirn f‑ma‑tqṣadt a‑sidi rbbi, ašku iggut lmajd n‑walli bdda illan.

⁶ wah̬h̬a yattuy sidi rbbi, ar‑d‑itlhu s‑ayt‑iyzdar. imma ih̬fawn mqqurnin, ar‑tn‑in‑itannay ġ‑tuggugt.

⁷ wah̬h̬a ftiġ ġ‑wammas n‑tnukmut, tjjnjmt bdda tudrt‑inu. tḥṣart‑n flla takurhit n‑inuwwašn, tfukkut‑iyi‑d s‑ufus‑nk afasi.

⁸ sidi rbbi ra‑issafu maylli gigi iqṣad. tayri‑nk izgan a‑sidi rbbi, rad‑bdda‑tdum. mayd skrn ifassn‑nk, a‑ur‑ti‑tflt.