imurign 118 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

škrġ‑k ašku tsfldt‑iyi

¹ alġat sidi rbbi ašku nttan a‑ifulkin, ar‑bdda‑iskar s‑lḥnant‑ns izgan.

² inyat ay‑ayt‑israyil: «ar‑bdda‑iskar s‑lḥnant‑ns izgan.»

³ inyat a‑tarwa n‑harun: «ar‑bdda‑iskar s‑lḥnant‑ns izgan.»

⁴ inyat a‑willi ituqqarn sidi rbbi: «ar‑bdda‑iskar s‑lḥnant‑ns izgan.»

⁵ tizi n‑tassast ġriġ i‑rbbi da‑illan, isfld‑iyi issufġ‑iyi‑d s‑illi yusɛan.

⁶ sidi rbbi ibidd didi, ur‑ksuḍġ yat. ma‑ra‑yyi‑iskr bnadm?

⁷ sidi rbbi ibidd didi, ig aɛwin‑inu, ẓrġ tirẓi n‑willi‑yyi‑ikurhan.

⁸ yuf a‑izawg yan ġ‑sidi rbbi wala ittkl f‑bnadm.

⁹ yuf a‑izawg yan ġ‑sidi rbbi wala ittkl f‑iriyasn.

¹⁰ kkan‑ttin iqbiln kullutn glin‑iyi. s‑ism n‑rbbi da‑illan, bbiġ‑tn zġ‑ddunit.

¹¹ hati glin‑iyi‑d zġ‑kraygatt tasga. s‑ism n‑rbbi da‑illan, bbiġ‑tn zġ‑ddunit.

¹² hati glin‑iyi‑d zund uglif n‑tizzwa, imil jdrn zund afrig laḥ‑tn. s‑ism n‑rbbi da‑illan, bbiġ‑tn zġ‑ddunit.

¹³ dḥin‑iyi s‑ifaddn aylliġ rad‑ḍrġ, yašk‑id sidi rbbi, ig‑iyi tannalt.

¹⁴ rbbi da‑illan a‑s‑zɛmġ ar‑ttirirġ, iwrri iga anjjam‑inu.

¹⁵ hay‑awal nsfld‑as ġ‑ih̬iyyamn n‑ayt‑ufulki, hatni frḥn kullu s‑unjjam‑nsn: «afus n‑sidi rbbi a‑itjhhdn.

¹⁶ afus n‑sidi rbbi a‑inran, afus n‑sidi rbbi a‑itjhhdn.»

¹⁷ ur‑rad‑mmtġ, ha‑yyi rad‑sul‑ddrġ, ar‑addrġ iskkirn n‑rbbi da‑illan.

¹⁸ issnm‑iyi sidi rbbi s‑lɛqubit išqan, walaynni ur‑iyi‑n‑idḥi i‑lmut.

¹⁹ rẓmayt imawn s‑dar walli iṣlaḥn, a‑n‑zġ‑gisn‑kšmġ ar‑ttalġġ sidi rbbi.

²⁰ ġwad a‑igan imi lli‑itawin s‑sidi rbbi, rad‑zġ‑gis‑kšmn willi ṣlaḥnin.

²¹ ha‑yyi škrġ‑k ašku tsfldt‑iyi, twrrit tgit anjjam‑inu.

²² hay‑aẓru lli‑n‑luḥn ibnnayn, nttan a‑iwrrin iga ih̬f n‑uġʷẓu.

²³ mayad, sidi rbbi a‑t‑iskrn, nẓra‑t ar‑gis‑ntɛjjab.

²⁴ ġwad a‑igan ass lli‑iskr sidi rbbi, ra‑srs‑nfrḥ ar‑gis‑ntfjjij.

²⁵ sfld a‑sidi rbbi tjjnjmt‑aġ, sfld a‑sidi rbbi, tssnjḥt‑aġ.

²⁶ ambarki a‑iga ġwad‑d‑yuškan s‑ism n‑sidi rbbi, nssbrrk‑kʷn‑in zġ‑tgmmi n‑rbbi da‑illan.

²⁷ walli bdda illan, nttan a‑igan rbbi. isufa fllanġ tifawt‑ns. asyat‑d tiṣṭṭwin, tmunm‑d f‑lɛid tmnaggarm‑n dar tisi n‑tġrṣi.

²⁸ rbbi‑nu a‑tgit, d‑kiyi a‑ra‑tškarġ, rbbi‑nu a‑tgit, d‑kiyi a‑ra‑tmjjadġ.

²⁹ alġat sidi rbbi ašku nttan a‑ifulkin, ar‑bdda‑iskar s‑lḥnant‑ns izgan.