imurign 107 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ar‑bdda‑iskar s‑lḥnant‑ns izgan

¹ alġat sidi rbbi ašku nttan a‑ifulkin, ar‑bdda‑iskar s‑lḥnant‑ns izgan.

² alġat sidi rbbi a‑kunni lli‑ifukka, ikks‑kʷn‑d i‑lhalak ig‑kn ġ‑laman.

³ issmun‑kn‑d kullukʷn zġ‑tmizar aggugnin, yawi‑kn‑d zġ‑uẓlmaḍ ula afasi, zġ‑usġlay n‑tafukt ar amṭar‑ns.

⁴ kra giwn ar‑itlulliy ġ‑lbur ih̬wan. ur‑ufin tamdint ma‑ġ‑a‑tgguzn.

⁵ itġaša‑uwl‑nsn tḍr‑tdwast‑nsn, inġ‑tn irifi ula laẓ iggutn.

⁶ ġ‑tnukmut‑an ad‑ġran i‑sidi rbbi, hati ijjnjm‑tn zġ‑taġuft‑nsn.

⁷ yawi‑tn ḥina ġ‑yan‑uġaras inmn, aylliġ ruḥn tamdint lli‑ġ‑rad‑zdġn.

⁸ ad‑alġn sidi rbbi f‑lḥnant‑ns da‑izgan, d‑lɛjayb lli‑iskar f‑ssibt n‑bnadm.

⁹ ar‑isswa rbbi kullu wanna yaġ irifi, ar‑iššbaɛ s‑lh̬ir wanna inġa laẓ.

¹⁰ kra giwn ityawkrraf s‑ssnasl n‑uwzzal, rfufnn ġ‑tillas d‑umalu n‑lmut.

¹¹ ġin a‑ġ‑qaman ašku ɛṣan rbbi, ḥgrn ntni luṣiyat n‑walli yattuyn.

¹² issknuki‑tn s‑unhataf išqan, ḍrn s‑wakal, laḥ ma‑tn‑itɛawann.

¹³ ġ‑tnukmut‑an ad‑ġran i‑sidi rbbi, hati ijjnjm‑tn zġ‑taġuft‑nsn.

¹⁴ issufġ‑tn‑d zġ‑tillas ula amalu n‑lmut, ibbi ssnasl‑nsn irẓm‑asn.

¹⁵ ad‑alġn sidi rbbi f‑lḥnant‑ns da‑izgan, d‑lɛjayb lli‑iskar f‑ssibt n‑bnadm.

¹⁶ ar‑irẓẓa rbbi iflwan n‑wanas, ar‑itbbi ula ifggign n‑uwzzal.

¹⁷ kra giwn iwrri inufl s‑ddnub‑ns, hršn ašku ffuġn zġ‑iwaliwn n‑rbbi.

¹⁸ krhun amššu akmurn‑in s‑lmut.

¹⁹ ġ‑tnukmut‑an ad‑ġran i‑sidi rbbi, hati ijjnjm‑tn zġ‑taġuft‑nsn.

²⁰ yazn‑d awal ḥina, hati ijjuji‑tn, ikks‑tn‑d i‑lhalak n‑umḍḍal illasn.

²¹ ad‑alġn sidi rbbi f‑lḥnant‑ns da‑izgan, d‑lɛjayb lli‑iskar f‑ssibt n‑bnadm.

²² ad‑fkn i‑rbbi tiwafkiw n‑ššukr, ar‑ttirirn bdrn kullu iskkirn‑ns.

²³ ar‑ssudun wiyyaḍ ġ‑wanawn f‑imdwan, ar‑saġn ar‑zznzan ġ‑tama n‑waman.

²⁴ ġ‑umda idran a‑ġ‑ẓran lɛjayb n‑sidi rbbi, ġin a‑ġ‑ssmaqqln jjhd n‑iskkirn‑ns.

²⁵ yazn‑d awal yawi‑d aḍu itjhhdn, issduyy amda issattuy taḍangiwin.

²⁶ ar‑aqlayn ar iggi ar‑tgguzn ar izdar, ġuwḍn bahra akmurn ad‑h̬sin.

²⁷ ar‑tmlilliyn ar‑ṭṭarn zund iskayriyn, duhdun ur‑akkʷ‑ssinn ma‑rad‑skrn.

²⁸ ġ‑tnukmut‑an ad‑ġran i‑sidi rbbi, hati ijjnjm‑tn zġ‑taġuft‑nsn.

²⁹ issfssa aḍu issbidd taḍangiwin,

³⁰ isshnnu ul‑nsn s‑umda izgan. yawi‑tn ġ‑laman ar antal lli‑ran.

³¹ ad‑alġn sidi rbbi f‑lḥnant‑ns da‑izgan, d‑lɛjayb lli‑iskar f‑ssibt n‑bnadm.

³² ad‑ḥmdn sidi rbbi ġ‑tamunt n‑mddn‑ns, mjjdn‑t ġ‑umnaggar n‑imġarn.

³³ issruḥ‑d taġart i‑isaffn n‑waman, irar talɛinin gnt igʷḍyan irufan.

³⁴ lliġ iẓra lh̬ʷšant n‑willi ġin izdġn, irar akal išwan ig amlal imarġn.

³⁵ ifk talɛinin i‑lbur irufan, irar akal iqqurn ig timdwin n‑waman.

³⁶ yawi‑d s‑tmazirt‑an ġwilli inġa laẓ, bnun yat‑tmdint a‑gis‑zdġn.

³⁷ awin‑d amud ẓẓun aṣġar n‑waḍil, asin timih̬ar zġ‑igran‑nsn.

³⁸ ibark‑tn rbbi igatn darsn tarwa, ur‑yudji aṭṭan a‑ilkm lksibt‑nsn.

³⁹ lliġ knukin ntni, nrun‑tn inuwwašn, ḍrn ġ‑trfufnt ula takrrayt.

⁴⁰ yasi‑n fllasn rbbi willi fllasn ittakʷln, ijlu‑tn‑in ġ‑lh̬la yaggugn.

⁴¹ ikks‑d ġwilli dɛfnin i‑tnukmut išqan, issigt‑asn tarwa zund lksibt‑nsn.

⁴² frḥn ayt‑ufulki s‑mayd iskr rbbi, imma ayt‑lh̬ʷšant laḥ‑asn ma‑ttinin.

⁴³ yan dar lɛaql, a‑stt‑yawi ġ‑kullu mayad, iswangm ġ‑lḥnant n‑sidi rbbi da‑izgan.