imurign 103 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ḥmd i‑rbbi

amarg n‑dawd

¹ ḥmd i‑sidi rbbi a‑ul‑inu, ula kullu ma‑gigi‑illan, tmjjdt ism‑ns iɛzzan.

² ḥmd i‑sidi rbbi a‑ul‑inu. a‑ur‑tettut kullu timih̬ar‑ns.

³ ar‑ak‑itṣamaḥ f‑kullu ddnub‑nk. ar‑ijjuji kullu timuḍan‑nk.

⁴ ar‑issinif ddat‑nk i‑umḍḍal. ig‑ak ttaj n‑tayri d‑rrḥmt.

⁵ ibark kullu ussan n‑tudrt‑nk. irar afud‑nk zund jjhd n‑lbaz.

⁶ ar‑itbddad sidi rbbi d‑yan‑f‑iḍr lbaḍl, iḥkam s‑lḥqq ifk‑as taġamt‑ns.

⁷ imla i‑musa ma‑iqṣad, yadj ayt‑israyil ad‑ẓrn ma‑iskar.

⁸ sidi rbbi ar‑itḥnnu ar‑itrḥam, yigat dars ṣṣbr ula tayri izgan.

⁹ ur‑ra‑n‑itqama bdda ġ‑lġaḍab, ur‑ra‑yġ‑ig d‑willi ikurha.

¹⁰ ur‑ra‑yġ‑bdda‑itẓi f‑ddnub‑nġ, ula da‑yaġ‑yakka f‑ġunšk lli‑sthllan.

¹¹ tigat tayri‑ns f‑willi‑t‑ituqqarn sunšk lli‑attuyn ignwan f‑wakal.

¹² issaggug‑n fllanġ ddnub‑nġ sunšk lli‑n‑yaggug lġrb f‑ššrq.

¹³ ġmklli itḥnnu yan ġ‑tarwa‑ns, a‑itḥnnu sidi rbbi ġ‑ġwilli‑t‑ituqqarn

¹⁴ ašku issn ma‑zġ‑ntyawskar, iswangm‑d izd ġir akal a‑nga.

¹⁵ hati zund tuga ad‑zrayn‑uwssan‑nġ. nmġi‑d nimġur zund ajddig n‑tagant,

¹⁶ iṣuḍ‑d‑waḍu yawi‑t, laḥ ajddig ih̬wu‑udġar‑ns.

¹⁷ tayri n‑sidi rbbi ur‑dars ttmi, tlla bdda f‑willi‑t‑ituqqarn. ar‑bdda‑iskar s‑ufulki‑ns izgan, i‑kullu tasutin n‑mddn‑ns,

¹⁸ i‑willi umẓnin ġ‑lɛhd‑ns, awin‑tt bdda ġ‑luṣiyat‑ns.

¹⁹ iḥkam sidi rbbi kullu ma‑illan, iskr lɛrš‑ns ġ‑iggi n‑ignwan.

²⁰ ḥmdat i‑sidi rbbi a‑lmlayka tjhhdnin, kunni da‑isflidn i‑iwaliwn n‑rbbi, ar‑kullu‑tskarm s‑mad‑awn‑ittini.

²¹ ḥmdat i‑sidi rbbi a‑inmġurn n‑ignwan, kunni da‑iskarn ma‑giwn‑ittiri.

²² ḥmdat i‑sidi rbbi a‑kullu lmh̬luqat inna‑ġ‑n‑tllamt ġ‑ddu‑ufus‑ns. ḥmd i‑sidi rbbi a‑ul‑inu.