imrwasn 6 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

⁶ ddu s‑dar‑tuwḍfit ay‑amɛgaz, tmnadt ġ‑maylli tskar, tlmdt dars taḥkimt.

⁷ wah̬h̬a ur‑dars agllid ula angabal ula amġar,

⁸ ar‑tssmunu lmunt‑ns ġ‑ṣṣif, ar‑ttḥḍu amššu‑ns ġ‑tizi n‑tmgra.

⁹ mnšk a‑rad‑sul‑tgnt ay‑amɛgaz? managu a‑ra‑di‑tnkrt zġ‑iyṭs?

¹⁰ imikk n‑unuddm d‑imikk n‑tguni d‑imikk n‑iniḍi n‑ifassn a‑tsunfut,

¹¹ s‑k‑id‑yuška ẓẓlḍ zund amh̬h̬ar, inġ‑k laẓ zund aqṭṭaɛ.

¹² han bu‑lɛar ula bu‑lbaḍl, s‑wawal iɛwwjn a‑s‑a‑itlulliy,

¹³ ar‑issmnqaš ṭiṭṭ‑ns, ar‑itšiyyar s‑uḍar‑ns, ar‑itnaɛt s‑uḍaḍ‑ns,

¹⁴ ar‑itnuwwa ššrr ġ‑uwl‑ns yʷh̬šnn, ar‑bdda‑issnkar ṭaẓit.

¹⁵ imma nttan ra‑ti‑tut tagat ġ‑yat tasaɛt ur‑itam, ra‑itthlk ġakudan, d‑ur‑ra‑yaf mamnk a‑itjji.

¹⁶ sḍist‑tġawsiwin a‑itkrhu sidi rbbi, d‑ssa ur‑a‑tnt‑itiḥmal:

¹⁷ ṭiṭṭ itḥgarn, d‑ils isskirkisn, d‑ufus itffin idammn ġusnin,

¹⁸ d‑uwl itnuwwan ššrr, d‑iḍarn itazzaln ġ‑lh̬ʷšant,

¹⁹ d‑inigi n‑ẓẓur lli‑d‑issunfusn ibaḍan, d‑wanna issnkarn ṭaẓit ġ‑gr aytmatn.