imrwasn 3 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

amn ġ‑rbbi issnm‑ak aġaras

¹ wa iwi, a‑ur‑tettut ilmmudn‑inu. tgt luṣiyat‑inu ġ‑uwl‑nk baš ad‑bdda‑stt‑gisnti‑ttawit.

² han rad‑ak‑zaydn ussan d‑isggʷasn, sshnnun tudrt‑nk.

³ a‑ur‑tadjt lḥnant izgan ula tayri idumn a‑k‑flnt. tgt‑tnt d‑tifilit ġ‑umggrḍ‑nk, tarat‑tnt f‑talluḥt n‑uwl‑nk.

⁴ ġmkan a‑s‑ra‑tamẓt rrḍa, tgt bu‑lɛaql ġ‑dar rbbi ula bnadm.

⁵ amn ġ‑sidi rbbi zġ‑ttmi n‑uwl‑nk, d‑a‑ur‑ttkalt f‑tfhimt n‑ih̬f‑nk.

⁶ kullu ma‑tqṣadt, swangm ġ‑sidi rbbi, s‑ak‑issnm tiġarasin‑nk.

⁷ a‑ur‑tinit d‑ih̬f‑nk is‑tgit bu‑tḥkimt, walaynni iksaḍ sidi rbbi, tanft i‑kullu ma‑yʷh̬šnn.

⁸ ġmkan a‑s‑rad‑ak‑tili ṣṣaḥt i‑ddat‑nk ula tadwast i‑ih̬ṣan‑nk.

⁹ zzwur sidi rbbi ġ‑tmih̬ar nna‑dark‑illan, ar‑as‑takkat timzwura n‑kullu lġllat‑nk.

¹⁰ ġmkan a‑s‑ra‑tɛmmarn iḥuna‑nk, ar‑tfiyyaḍnt‑th̬abatin‑nk s‑waman n‑waḍil.

¹¹ wa iwi, rar lɛaql iġ‑k‑issnm sidi rbbi, a‑ur‑ak‑ṭiyr iġ‑k‑iẓi.

¹² ašku sidi rbbi ar‑itẓi wanna dars iɛzzan, ġmklli itẓi‑urgaz yus nna‑s‑ifrḥ.

imbarkin ad‑gan ayt‑tḥkimt

¹³ ambarki a‑iga wanna yufan taḥkimt ula yan iṭṭafn lfhmt.

¹⁴ ašku ra‑ti‑tnfɛa uggʷar n‑nnʷqrt, tawi‑d lh̬ir uggʷar n‑uwrġ.

¹⁵ tɛzza nttat uggʷar n‑ljuhr. kullu ma‑ttirit, ur‑ra‑iruḥ atig‑ns.

¹⁶ afus‑ns afasi, tlla gis tudrt iġzzifn. imma aẓlmaḍ‑ns, illa‑gis‑wayda d‑ššan.

¹⁷ yan dids imunn ra‑ifttu s‑lfrḥ, yaf‑n kullu iġarasn‑ns gan win lhna.

¹⁸ tga taṣġart n‑tudrt i‑wanna gis iġwin. isaɛdiyn ad‑gan winna bdda gis yumẓn.

¹⁹ taḥkimt a‑s‑izzugz sidi rbbi llsas n‑ddunit, d‑tfhimt a‑s‑ifsr ignwan.

²⁰ tawassna a‑s‑issbbaqi iġbula n‑tdrut n‑wakal, d‑srs a‑s‑a‑d‑issaddum tiġli zġ‑imdla.

²¹ wa iwi, a‑ur‑tadjt taḥkimt iṣḥan d‑iẓmẓlayn ad‑ffuġn zġ‑gr‑walln‑nk.

²² rad‑ak‑gn tudrt i‑uwl‑nk, gn tifilit išwan ġ‑umggrḍ‑nk.

²³ srsn a‑s‑rad‑bdda‑tfttut ġ‑uġaras‑nk s‑laman, d‑ur‑sar‑ra‑yut ifikš aḍar‑nk.

²⁴ ġakud nna‑tẓlt ur‑ra‑tiksaḍt, d‑ġakud nna‑tgnt ra‑imim‑iyṭs‑nk.

²⁵ a‑ur‑ttasit taġuft f‑tagat issiwidn ula lhalak ittutn f‑ayt‑lɛar.

²⁶ ašku sidi rbbi a‑ra‑ig laman‑nk, igabl aḍar‑nk a‑ur‑sar‑ityamaẓ.

²⁷ a‑ur‑tḥḍut afulki f‑wanna‑t‑isthllan iġ‑tẓḍart kiyi ad‑as‑ti‑tskrt.

²⁸ a‑ur‑tinit i‑wadjar‑nk «zayd ar azkka fkġ‑ak» iġ‑dark ma‑ys‑takkat.

²⁹ a‑ur‑tnuwwat ššrr ġ‑wadjar lli‑izdġn s‑nniyt iṣfan ġ‑tama‑nk,

³⁰ wala taštkkat s‑yan bla sabab d‑nttan ur‑ak‑iskir yat.

³¹ a‑ur‑tḥsadt yan itɛddan f‑wiyya, ula da‑tskart zund nttan.

³² ašku sidi rbbi ikurha willi dar iɛzza ma‑iɛwwjn, walaynni ar‑itmšawar d‑willi dar iɛzza ma‑inmn.

³³ sidi rbbi ar‑ith̬zu tigmmi n‑ayt‑lh̬ʷšant, walaynni ar‑itbarak tazdġt n‑ayt‑ufulki.

³⁴ ar‑iteṭnaẓ ġ‑willi teṭnaẓnin, walaynni ar‑yakka rrḍa‑ns i‑willi tṣbarnin.

³⁵ hay‑ayt‑tḥkimt rad‑wrtn ššan, imma ayt‑unufl rad‑amẓn agʷri.