imrwasn 2 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

laman ula lhna

¹ wa iwi, iġ‑a‑tsflidt s‑iwaliwn‑inu, ar‑ttḥḍut luṣiyat‑inu ġ‑uwl‑nk,

² iġ‑a‑trẓẓmt imzgan‑nk i‑ulmmud, ar‑n‑ttggat tiqqi‑nk a‑tfhmt,

³ iġ‑a‑tssɛyyaḍt i‑tḥkimt ar‑di‑taqrat i‑tfhimt s‑dark,

⁴ iġ‑a‑srs‑tsiggilt zund nnʷqrt, ar‑srs‑ttqllabt zund urġ irgsn,

⁵ ha kiyi ra‑tfhmt tiksaḍ n‑walli bdda illan, tlkmt tawassna n‑rbbi.

⁶ ašku rbbi da‑illan, nttan a‑d‑yakkan taḥkimt. d‑imi‑ns a‑di‑ttkka‑twassna ula lfhmt.

⁷ ar‑issnjaḥ willi ṣlaḥnin, ar‑itḥṣar f‑willi nmnin,

⁸ ar‑itgabal tawada n‑willi iskarn s‑lḥqq, ar‑itḍuf aġaras n‑willi igan ayt‑lḥnant.

⁹ ġmkad a‑s‑ra‑tfhmt lḥqq d‑ṣṣaḥt d‑lmɛqul, tissant kullu tiġarasin n‑ufulki.

¹⁰ ašku taḥkimt ra‑tkšm s‑ih̬f‑nk, ula tawassna ra‑tssfraḥ ul‑nk.

¹¹ rad‑bdda‑tilit ġ‑laman ašku tssnt a‑tẓẓmẓlayt, tqamat ġ‑lhna ašku tfhmt ma‑ittilin.

¹² taḥkimt a‑ra‑k‑issanf i‑uġaras n‑lɛar ula tamunt n‑ayt‑tkndawt,

¹³ tfukku‑k ula zġ‑willi ifln ma‑iṣlaḥn ar‑fttun ġ‑tillas,

¹⁴ frḥn ntni a‑tsalan ma‑ihršn, rḍun s‑ma‑yʷh̬šnn iɛwwj,

¹⁵ gn imuttiln ar‑skarn mnnaw‑uwdmawn.

¹⁶ taḥkimt a‑ra‑k‑issaggug zġ‑tmġart itfsadn ula tamggant itġrrun mddn s‑iwaliwn‑ns mimnin.

¹⁷ tfl nttat walli ttahl ġ‑mẓẓiy‑ns, tettu lɛhd n‑rbbi‑ns.

¹⁸ han wanna ikšmn s‑tgmmi‑ns, ikšm s‑lmut. wanna dids imunn, imun dids s‑umḍḍal.

¹⁹ ur‑ra‑d‑iwrri yan dars iddan, ula ra‑d‑yaḍu s‑uġaras n‑tudrt.

²⁰ ġmkad a‑s‑ra‑ttɛišt d‑mddn fulkinin, tmunt d‑uġaras n‑willi‑s‑irḍa rbbi.

²¹ ašku willi ṣlaḥnin a‑ra‑izdġ ġ‑wakal‑ad, d‑willi nmnin a‑ra‑gis‑iqama.

²² imma willi ʷh̬šnnin rad‑tyawbbayn zġ‑wakal, d‑imġḍarn rad‑kullu‑zġ‑gis‑akufn.