iḥazqyal 6 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ra‑sul‑giwn‑adjġ kra iddrn

¹ yašk‑iyi‑d‑wawal n‑sidi rbbi yini:

² «wa yus n‑bnadm, rar‑n udm‑nk s‑idrarn n‑israyil, tmlt‑asn ma‑rad‑asn‑ijru,

³ tinit‑asn: ‹wa idrarn n‑israyil, sfldayt i‑wawal n‑sidi rbbi da‑bdda‑illan. ha ma‑inna rbbi siditun i‑idrarn d‑iwrar, yini‑t ula i‑talatin d‑izaġarn. ra‑n‑srun‑aznġ uzzal, h̬luġ idġarn‑nun imattuyn,

⁴ ssḍrġ ikʷrkar‑nun n‑tġrṣi, rẓġ tisiwin lli‑f‑a‑ttbh̬h̬arm, nnġ mddn‑nun ġ‑lgddam n‑laṣnam‑nun.

⁵ han ra‑n‑srsġ inaġan n‑ayt‑israyil ġ‑lgddam n‑laṣnam‑nsn, ssuktġ ih̬ṣan‑nun ġ‑tamiw n‑ikʷrkar‑nun.

⁶ kullu innaġ tzdġm rad‑gnt‑tmdinin uh̬ribn, h̬lun idġarn‑nun imattuyn, hlkn h̬lun ikʷrkar‑nun n‑tġrṣi, rẓn ḍrn laṣnam‑nun, bbint tisiwin n‑lbh̬ur. han rad‑laḥ kullu ġaylli tskrm,

⁷ ḍrn‑in inaġan‑nun ġ‑wammas‑nun. tissanm ġakudan is‑giġ rbbi da‑bdda‑illan.

⁸ « ‹walaynni ra‑sul‑giwn‑adjġ kra iddrn, injm zġ‑uwzzal ġakud lliġ takutm ġ‑gr iqbiln ula timizar n‑ddunit.

⁹ han willi giwn njmnin, ra‑yyi‑d‑kttin ġ‑tmizar lli‑s‑tyattayn s‑iskraf. ġakudan a‑rad‑fhmn is‑iyi‑stt‑bahra‑ssṭiyrn lliġ‑iyi‑fln ḍfurn ul‑nsn itfsadn s‑dar laṣnam lli‑tšthunt‑walln‑nsn. rad‑krhun ih̬fawn‑nsn f‑ssibt n‑lh̬ʷšanat lli‑skarn ula f‑iskkirn jlh̬nin lli‑tsalan.

¹⁰ ġakudan a‑rad‑fhmn is‑giġ rbbi da‑bdda‑illan, issann izd lḥqq a‑s‑asn‑nniġ lliġ‑asn‑mliġ tagat‑ad lli‑ra‑d‑fllasn‑zzugzġ.› »