iḥazqyal 5 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lḥkamat n‑rbbi f‑urušalim

¹ «imma kiyi a‑yus n‑bnadm, asi yat‑tuzzalt imsidn, tssmakkrḍt srs ih̬f‑nk d‑tamart‑nk. tawit‑d lmizan, tuwznt azzar‑nk tbḍut‑t f‑kraṭṭ‑twal.

² lliġ kmmln‑uwssan lli‑ġ‑tglit tamdint, tjdrt yat gisnt ġ‑lɛafiyt ġ‑wammas n‑tmdint [n‑idqqi]. tasit ilmma tis snat, ar‑tti‑tkkat s‑tuzzalt ġ‑kullu tisgiw n‑tmdint. tawit ilmma tis kraṭṭ, tzuzzrt‑stt i‑waḍu. ašku ra‑tn‑ṭṭayġ s‑tuzzalt.

³ tasit‑d ilmma kra n‑wazzar idrusn, tkrst‑t ġ‑uḥbiš n‑tmlsit‑nk.

⁴ tasit‑d ilmma imikk zġ‑mayan, tluḥt‑t‑in ġ‑lɛafiyt a‑ijdr. ašku ra‑tznd lɛafiyt ġin, ard tjdr kullu ayt‑israyil.

⁵ «ha ma‑inna rbbi siditun da‑bdda‑illan: ġmkad a‑tga urušalim. giġ‑tt ġ‑wammas n‑iqbiln n‑ddunit, sutlnt‑as‑tmizar.

⁶ imma nttat tɛṣa luṣiyat‑inu, ar‑tyʷh̬šann uggʷar n‑kullu iqbiln‑an, tanf i‑tnbaḍin‑inu uggʷar n‑ayt‑tmizar lli‑as‑sutlnin. han imzdġn‑ns ɛṣan luṣiyat‑inu, agʷin ad‑skarn s‑tnbaḍin‑inu.

⁷ «ġayan a‑f‑inna ġilad rbbi siditun da‑bdda‑illan: kunni tduyym uggʷar n‑kullu iqbiln lli‑awn‑sutlnin. tagʷim a‑tskarm s‑tnbaḍin‑inu, ula da‑tsflidm s‑luṣiyat‑inu, wala tẓḍarm kunni i‑tnbaṭṭ ula taḥkimt n‑iqbiln lli‑awn‑sutlnin.

⁸ ġayan a‑f‑inna ġilad rbbi siditun da‑bdda‑illan: ha‑yyi giġ ḍiḍḍ‑nun. ra‑kʷn‑kkatġ s‑lḥkamat ġ‑iẓri n‑iqbiln‑an.

⁹ f‑ssibt n‑kullu ma‑tsalam yʷh̬šn a‑f‑rad‑awn‑skrġ kra ur‑jji‑skirġ, ula ra‑t‑daġ‑skrġ.

¹⁰ ra‑tddum ard a‑tšttam tarwa‑nun, ššn tarwa willi‑tn‑yurun ġ‑tmdint‑an. ra‑kʷn‑kkatġ s‑lḥkamat, d‑aynna‑giwn‑iqaman, ra‑tn‑zuzzrġ s‑waḍu lli‑itawin s‑kraygatt tasga.

¹¹ «yini‑awn rbbi da‑bdda‑illan: awal izgan zund tudrt‑inu ayd‑awn‑nniġ nkki da‑igan rbbi siditun. lliġ tndsm tigmmi‑nu tamẓlayt s‑ikʷlan‑nun jlh̬nin ula s‑iskkirn‑nun ʷh̬šnnin, han ra‑kʷn‑flġ. ur‑ra‑giwn‑ḥnnuġ ula rḥmġ‑kʷn.

¹² ra‑kʷn‑bḍuġ f‑kraṭṭ‑twal. yat gisnt ra‑tmmt s‑waṭṭan d‑uġʷni ġ‑wammas‑nun. tis snat ra‑tmmt s‑tuzzalt ġ‑kullu tisgiw n‑tmdint. tis kraṭṭ ra‑stt‑zuzzrġ s‑waḍu lli‑itawin s‑kraygatt tasga. ašku ra‑tn‑ṭṭayġ s‑tuzzalt.»