iḥazqyal 4 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tamdint n‑idqqi

¹ «wa kiyi a‑yus n‑bnadm, asi‑d talluḥt n‑idqqi, tsrst‑stt ġ‑lgddam‑nk, tnqšt gis yat‑tmdint, a‑stt‑igan d‑tmdint n‑urušalim.

² tglit‑stt s‑wašbarn, tskrt lbruj ġ‑tama‑ns, tssgudit‑as akal, tsutlt‑as ikabarn n‑iɛskriyn, tsrst‑n iggjda ma‑irẓẓan iflwan‑ns zġ‑kraygatt tasga.

³ tasit‑d ilmma yat lmqla n‑uwzzal, tssbiddt‑stt zund aġʷrab n‑uwzzal ġ‑grak d‑tmdint. trart udm‑nk s‑tmdint f‑a‑tujad nttat i‑ugllay, tglit‑stt ġakudan s‑jjhd. ha mayan iga tamatart i‑ayt‑israyil.

⁴ «zayd ilmma tgnt f‑tsga‑nk taẓlmaṭṭ, tsrst fllak ddnub n‑ayt‑israyil. kullu ussan lli‑tgnt f‑tsga‑nk taẓlmaṭṭ a‑ra‑tasit ddnub‑nsn.

⁵ giġ‑ak ussan ġunšk lli‑gan isggʷasn n‑ddnub‑nsn. kraḍ id‑miyya d‑ṭẓa n‑id‑mraw (390) n‑wass a‑ra‑tasit ddnub n‑ayt‑israyil.

⁶ ard‑tn‑tkmmlt, tzaydt tgnt f‑tsga‑nk tafasiyt ula nttat, a‑tasit ddnub n‑ayt‑yahuda. giġ‑ak kkuẓ id‑mraw (40) n‑wass, ġunšk lli‑gan isggʷasn‑nsn.

⁷ trart ilmma udm‑nk s‑ugllay n‑urušalim, tšmmrt iġil‑nk, tmlt‑asn ma‑rad‑asn‑ijru.

⁸ ra‑k‑krfġ s‑izakarn f‑ad‑ur‑tiẓḍart a‑tgrawlt s‑tsga‑ya ula h̬ta ard tkmmlt ussan n‑ugllay‑nk.

⁹ «tasit‑d kra n‑irdn d‑ṭmẓin d‑ibawn d‑tniltit d‑usngar d‑uḍkkuy, tgt‑tn ġ‑yan‑uruku, tskrt srsn aġrum, ar‑ti‑tšttat kullu ussan lli‑ra‑tgnt f‑tsga‑nk, kraḍ n‑id‑miyya d‑ṭẓa n‑id‑mraw (390) n‑wass.

¹⁰ ar‑ttuwzant tirmt lli‑tšttat, sin id‑miyya (200) n‑gram i‑wass, ar‑tšttat ġunškan ass f‑wass.

¹¹ ula aman, ra‑tn‑tssat s‑lɛbar, mnaṣṣ n‑litru i‑wass. ġunškan a‑ra‑tssat ass f‑wass.

¹² ra‑tšttat ġmklli šttan mddn tunnirt n‑ṭmẓin, tssnut‑stt ġ‑lgddam‑nsn f‑lɛafiyt n‑tiššišin n‑bnadm.»

¹³ izayd sidi rbbi yini‑yyi: «han ġmkan a‑rad‑šttan ayt‑israyil amššu indsn, ġ‑gr ayt‑tmizar lli‑s‑ra‑tn‑ṭṭayġ.»

¹⁴ iniġ‑as ġakudan: «aḥḥ a‑sidi rbbi‑nu, ur‑jji‑ndsġ ih̬f‑inu, zġ‑mẓẓiy‑inu sul s‑ġilad. ur‑jji‑ššiġ kra n‑miḍrus ula kra ssyagasn luḥuš, ula tkšm‑d kra n‑tfiyi indsn imi‑nu.»

¹⁵ ijawb‑iyi‑d sidi rbbi: «wah̬h̬a. ha‑yyi udjġ‑ak tiššišin n‑umugay, a‑fllasnt‑tssnwat aġrum‑nk, urd tin bnadm.»

¹⁶ yini‑yyi ilmma: «wa yus n‑bnadm, hati rad‑bbiġ aġrum lli‑f‑a‑tbiddadn ayt‑urušalim. taġuft a‑s‑rad‑tuwzann aġrum i‑umššu. taguḍi a‑s‑rad‑tɛbbarn aman i‑tissi.

¹⁷ ard‑asn‑laḥ aġrum d‑waman, duhdun kullu i‑ngratsn, aḍnn s‑lɛqubit lli‑fllasn‑illan.»