iḥazqyal 37 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

azaġar iɛmmrn s‑ih̬ṣan qqurnin

¹ ittrs‑d‑flla‑ufus itjhhdn n‑sidi rbbi. yawi‑yyi rruḥ n‑sidi rbbi, issbidd‑iyi ġ‑wammas n‑yan‑uzaġar. iɛmmr‑uzaġar‑an s‑ih̬ṣan.

² yawi‑yyi issayk‑iyi ġ‑gratsn. ẓrġ‑tn ggutn s‑kigan f‑uwdm n‑uzaġar, hatni qqurn bahra.

³ yini‑yyi‑d: «wa yus n‑bnadm, is‑ẓḍarn ad‑wrrin ddrn ih̬ṣan‑ad?» iniġ‑as: «wa‑rbbi siditnġ, kiyi a‑issnn.»

⁴ yini‑yyi‑d ilmma: «sawl i‑ih̬ṣan‑ad f‑ma‑rad‑asn‑yili, tinit‑asn: ‹wa ih̬ṣan qqurnin, sfldayt i‑wawal n‑sidi rbbi.

⁵ ha ma‑ywn‑inna rbbi siditnġ a‑ih̬ṣan‑ad. ra‑giwn‑ṣuḍġ s‑rruḥ, twrrim tddrm.

⁶ rad‑awn‑gġ lɛṣub d‑tfiyi, dlġ‑kʷn s‑ilm, gġ giwn rruḥ, twrrim tddrm, f‑a‑tissanm is‑giġ walli bdda illan.› »

⁷ sawlġ‑asn ġakudan f‑ma‑ra‑ijru ġmklli‑s‑iyi‑inna. sul a‑sawalġ s‑sfldġ i‑kra, s‑ha ih̬ṣan‑an ar‑tkrkurn ar‑kullu‑tmunun, kraygatt ih̬ṣ izdi d‑wada‑t‑id‑iwalan.

⁸ mnadġ‑n s‑ha lɛṣub d‑tfiyi bann‑d fllasn, idl‑tn ilm. walaynni ur‑gisn rruḥ.

⁹ yini‑yyi ġakudan: «sawl i‑rruḥ. nkr tsawlt, a‑yus n‑bnadm, f‑ma‑ra‑yili, tinit i‑rruḥ: ‹ha ma‑inna rbbi siditnġ da‑bdda‑illan. ašk‑id a‑rruḥ zġ‑kkuẓṭ‑tsgiw n‑ddunit, tṣuḍt f‑inaġan‑ad, f‑ad‑wrrin ddrn.› »

¹⁰ sawlġ‑asn f‑ma‑ra‑yili ġmklli‑s‑iyi‑inna, s‑tn‑tkšm rruḥ, wrrin ddrn. nkrn f‑iḍarn‑nsn, gn akabar iggutn bahra.

¹¹ izayd ilmma yini‑yyi: «wa yus n‑bnadm, ih̬ṣan‑ad gan kullu ayt‑israyil. hatni ar‑ttinin: ‹qqurn ih̬ṣan‑nġ, ibbi rrja‑nġ, ha‑yaġ nmmut.›

¹² walaynni sawl‑asn ġilad f‑ma‑rad‑asn‑yili, tinit‑asn: ‹ha ma‑inna rbbi siditnġ da‑bdda‑illan. rad‑rẓmġ ismḍal‑nun a‑mddn‑inu, ssnkrġ‑kʷn‑d zġ‑ismḍal‑nun, rarġ‑kʷn‑d s‑wakal n‑israyil.

¹³ ra‑tissanm ġakudan is‑giġ walli bdda illan, lliġ rẓmġ ismḍal‑nun, a‑mddn‑inu, ssnkrġ‑kʷn‑d zġ‑ismḍal‑nun.

¹⁴ ra‑giwn‑gġ rruḥ‑inu, twrrim tddrm, tilim ġ‑wakal‑nun. ġakudan a‑ra‑tissanm is‑giġ walli bdda illan. nkki a‑isawln, d‑nkki a‑ra‑t‑iskr. inna‑t rbbi da‑bdda‑illan.› »

snat tilwaḥ

¹⁵ yašk‑iyi‑d‑wawal n‑sidi rbbi yini‑yyi:

¹⁶ «wa yus n‑bnadm, asi‑d yat talluḥt tarat fllas ‹tin yahuda d‑usmun‑ns ġ‑ayt‑israyil›. tasit‑d yat talluḥt yaḍni, tarat fllas ‹tin yusf, a‑stt‑igan d‑talluḥt n‑afraym d‑usmun‑ns kullut ġ‑ayt‑israyil›.

¹⁷ tzaydt ilmma tzdit tilwaḥ‑an ad‑gnt zund yat talluḥt, gnt ntnti yat ġ‑ufus‑nk.

¹⁸ iġ‑ak‑sqsan mddn‑nk: ‹is‑ur‑rad‑aġ‑tmlt ma‑tɛnit s‑mayad?›

¹⁹ tinit‑asn: ‹ha ma‑inna rbbi siditnġ da‑bdda‑illan. imikk rad‑d‑asiġ talluḥt n‑yusf lli‑igan win afraym d‑usmun‑ns ġ‑tqbilin n‑israyil, zdiġ‑t d‑talluḥt n‑yahuda, f‑ad‑gnt yat talluḥt, gnt ntnti yat ġ‑ufus‑inu.›

²⁰ amẓ snat tilwaḥ‑an lli‑f‑turit, baš a‑tnt‑ẓrn mddn.

²¹ tinit‑asn: ‹ha ma‑inna rbbi siditnġ da‑bdda‑illan. rad‑d‑ssufġġ ayt‑israyil zġ‑gr iqbiln lli‑s‑ddan, ssmunġ‑tn‑d zġ‑kraygatt tasga, awiġ‑tn‑d s‑wakal‑nsn.

²² ra‑zġ‑gisn‑skrġ yan‑uqbil ġ‑wakal n‑iwrar n‑israyil, yili‑asn yan‑ugllid lli‑ra‑ig agllid‑nsn kullutn. ur‑sul‑rad‑gn sin iqbiln, ula bḍan f‑snat‑tglday.

²³ ur‑sul‑rad‑tndasn ih̬fawn‑nsn s‑laṣnam‑nsn ula s‑ikʷlan‑nsn jlh̬nin ula s‑kullu lh̬ʷšanat lli‑s‑a‑yyi‑tɛṣun ġayd izrin. ašku ra‑tn‑d‑jjnjmġ zġ‑kullu illiġ‑n‑jlan. ġakudan a‑ra‑tn‑ssġusġ, gn ntni mddn‑inu, gġ nkki rbbi‑nsn.

lɛhd lli‑ur‑sar‑ra‑itmmu

²⁴ « ‹ah̬ddam‑inu dawd a‑ra‑fllasn‑ig agllid, d‑yan‑umksa a‑rad‑asn‑yili. rad‑kullu‑skarn s‑luṣiyat‑inu, ar‑tti‑tawin ġ‑tnbaḍin‑inu ar‑tnti‑tqasan.

²⁵ rad‑zdġn ġ‑wakal lli‑fkiġ i‑uh̬ddam‑inu yaɛqub, iga akal lli‑ġ‑zdġn id‑babatun. ra‑gis‑zdġn ntni d‑tarwa‑nsn ula tarwa n‑tarwa‑nsn kullu mayd iftan. d‑uh̬ddam‑inu dawd a‑ra‑ig agllid‑nsn kullu mayd iftan.

²⁶ rad‑asn‑fkġ yan lɛhd n‑sslamt lli‑ur‑sar‑ra‑itmmu. ra‑tn‑gġ ġ‑wakal ssigtġ‑tn, gġ tigmmi‑nu tamẓlayt ġ‑wammas‑nsn kullu mayd iftan.

²⁷ ra‑didsn‑zdġġ, gġ rbbi‑nsn, gn ntni mddn‑inu.

²⁸ rad‑issann ayt‑tmizar n‑ddunit izd rbbi da‑bdda‑illan a‑iẓlin ayt‑israyil ad‑gn wins, ašku rad‑ẓrn tigmmi‑inu tamẓlayt ġ‑wammas‑nsn kullu mayd iftan.› »