iḥazqyal 36 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ism‑inu yattuyn iṣfan

¹⁶ yašk‑iyi‑d‑wawal n‑sidi rbbi yini‑yyi:

¹⁷ «wa yus n‑bnadm, lliġ yadlli zdġn ayt‑israyil ġ‑wakal‑nsn, ndsn‑t bahra s‑ġaylli tsalan ula s‑ġaylli skarn. han iskkirn‑nsn gan dari zund nndast n‑tmġart ġ‑llan idammn.

¹⁸ ffiġ‑n fllasn iriyn‑inu f‑ssibt n‑idammn n‑bnadm lli‑ffin ġ‑wakal ula laṣnam lli‑s‑t‑ndsn.

¹⁹ ssuktġ‑tn ġ‑gr iqbiln, zzmzrġ‑tn‑in ġ‑tmizar aggugnin. utġ fllasn lḥukm f‑ma‑tsalan ula mad‑skarn.

²⁰ imma ntni, lliġ kšmn s‑gr iqbiln‑an, innas ddan ar‑daġ‑tndasn ism‑inu yattuyn iṣfan, aylliġ a‑fllasn‑ttinin wiyyaḍ: ‹ġwid gan mddn n‑rbbi da‑bdda‑illan, walaynni iṭṭay‑tn‑d zġ‑wakal‑ns.›

²¹ «ha nkki, ṭiyr‑iyi f‑lɛar lli‑d‑iwin ayt‑israyil i‑ism‑inu yattuyn iṣfan ġ‑gr iqbiln lli‑dar‑kšmn.

²² zayd ġilad tinit i‑ayt‑israyil: ‹ha ma‑inna rbbi siditun da‑bdda‑illan. urd f‑ssibt n‑is‑tsthllam a‑f‑rad‑skrġ mayad ay‑ayt‑israyil, walaynni f‑ism‑inu yattuyn iṣfan lli‑tndsm ġ‑gr iqbiln lli‑dar‑tkšmm.

²³ rad‑ssbayynġ is‑yattuy iṣfa ism‑inu lli‑iwrrin ig lɛar dar iqbiln‑an, ašku lɛar a‑d‑fllas‑tiwim kunni ġ‑gratsn. rad‑issann ayt‑tmizar n‑ddunit izd nkkin a‑igan walli bdda illan, ašku rad‑ẓrn mamnk ad‑ssbayynġ afulki‑nu ikmmln ġ‑ma‑rad‑awn‑skrġ. inna‑t rbbi siditun da‑bdda‑illan.

ul n‑ljdid ula rruḥ n‑ljdid

²⁴ « ‹han ra‑kʷn‑d‑ssufġġ zġ‑gr iqbiln, ssmunġ‑kʷn‑d zġ‑kullu timizar‑an, awiġ‑kʷn‑d s‑wakal‑nun.

²⁵ ra‑kʷn‑ruššġ s‑waman zddignin a‑tṣfum zġ‑nndast‑nun, ssġusġ‑kʷn zġ‑tjlh̬it lli‑giwn‑illan.

²⁶ rad‑awn‑fkġ ul n‑ljdid, gġ giwn rruḥ n‑ljdid, kksġ zġ‑giwn ul n‑uẓru, gġ‑n giwn ul n‑tfiyi.

²⁷ ra‑n‑gġ rruḥ‑inu ġ‑ugʷns‑nun, rarġ‑kʷn‑d ar‑tsflidm s‑luṣiyat‑inu ar‑tskarm s‑tnbaḍin‑inu.

²⁸ ra‑tzdġm ġ‑wakal lli‑fkiġ i‑id‑babatun, tgm mddn‑inu, gġ rbbi‑nun.

²⁹ han ra‑kʷn‑fukkuġ zġ‑kullu nndast‑nun, uṣṣaġ irdn ad‑darun‑ttigatn d‑ur‑sar‑darun‑illi‑uġʷni.

³⁰ rad‑awn‑ssigtġ lġllat n‑iṣġarn ula ṣṣabt n‑igran, d‑ur‑sar‑tgim lɛar f‑ssibt n‑laẓ ġ‑iẓri n‑ayt‑tmizar yaḍni.

³¹ ġ‑uwssan‑an ra‑di‑tkttim ġaylli tskarm yʷh̬šn ula lɛib lli‑ttsalam, tkrhum ih̬fawn‑nun f‑ssibt ddnub‑nun d‑iskkirn‑nun jlh̬nin.

³² walaynni issanat is‑urd f‑ssibt n‑is‑tsthllam a‑f‑rad‑skrġ kullu mayad. inna‑t rbbi siditun da‑bdda‑illan. ašku illa fllawn a‑tḥššmm, tʷgraẓ‑kʷn bahra, f‑ġaylli yadlli tsalam ay‑ayt‑israyil.›

akal zund talɛrṣt n‑ɛadan

³³ «ha ma‑inna rbbi siditun da‑bdda‑illan: ass lli‑ġ‑ra‑kʷn‑ssġusġ zġ‑kullu ddnub‑nun, ra‑kʷn‑adjġ a‑ttɛmmarm timdinin ar‑tbnnum ih̬rubba.

³⁴ ra‑ttkrzm akal ih̬wan. winna zraynin ur‑sul‑ra‑ttinin: ‹lh̬la ayad›.

³⁵ ra‑ttinin: ‹akal‑ad yadlli ih̬wa, hati iwrri iga zund talɛrṣt n‑ɛadan. timdinin lli‑ḍrnin h̬lunt gnt uh̬ribn, hatnti wrrint s‑igudar dusnin ɛmmrnt s‑mddn.›

³⁶ ra‑kʷn‑ẓrn ayt‑tmizar lli‑iqaman ġ‑tsgiw‑nun, issann izd nkki a‑igan rbbi da‑bdda‑illan. ẓrn is‑bniġ illi ih̬ʷlan, ẓẓuġ illi ih̬wan. s‑ṣṣaḥt giġ walli bdda illan. nkki a‑isawln, d‑nkki a‑ra‑t‑iskr.

³⁷ «ha ma‑inna rbbi siditun da‑bdda‑illan: rad‑adjġ ayt‑israyil ad‑ḍalbn kra yaḍni f‑ad‑asn‑t‑skrġ. rad‑ḍalbn f‑ad‑asn‑ssigatġ mddn‑nsn ard wrrin gn tawrut imqqurn,

³⁸ gn zund tawrut n‑uwlli ġ‑izmaz n‑lɛid ġ‑urušalim. ġmkan a‑s‑rad‑ɛmmrnt‑tmdinin lli‑h̬wanin s‑tuwrutin n‑mddn ggutnin, issann ġakudan is‑giġ walli bdda illan.»