iḥazqyal 34 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

imksawn ʷh̬šnnin

¹ yašk‑iyi‑d‑wawal n‑sidi rbbi yini‑yyi:

² «wa yus n‑bnadm, ml i‑imksawn n‑israyil ma‑rad‑asn‑yili. nkr tmlt‑asn ma‑rad‑asn‑ijru. tinit i‑imksawn‑an: ‹ha ma‑inna sidi rbbi da‑bdda‑illan. wa imksawn n‑israyil, wa kunni‑ad ikssan ih̬fawn‑nun, is‑ur‑illi f‑imksawn ad‑ksn ulli?

³ imma kunni ar‑tšttam tadunt, ar‑tlssam taḍut, ar‑tqqrṣm i‑tilli jjinin, walaynni ur‑a‑tkssam tawrut.

⁴ han tilli ḍɛfnin, ur‑a‑tnti‑ttɛawanm. tilli hršnin, ur‑a‑tnti‑ttdawam. tilli rẓanin, ur‑a‑tnti‑ttqqnm. tilli mzrnin, ur‑a‑tnt‑id‑tssmunum. tilli jlanin, ur‑a‑srsnt‑tsiggilm. walaynni ar‑tnti‑tdḥḥim s‑ifaddn ar‑tnt‑kkatn s‑ukuray.

⁵ han mzrnt‑uwlli, ašku ur‑darsnt amksa, aylliġ wrrint gnt tirmt i‑kullu luḥuš n‑lh̬la.

⁶ ar‑jllunt‑uwlli‑nu ġ‑kullu idrarn d‑iwrar attuynin. hatnti mzrnt f‑uwdm n‑wakal kullut, d‑ur‑illi ma‑gisnt‑isqsan ula ma‑srsnt‑isiggiln.

⁷ « ‹f‑ġayan a‑imksawn, sfldayt i‑wawal n‑rbbi da‑bdda‑illan.

⁸ awal izgan zund tudrt‑inu ayd‑awn‑nniġ nkki da‑igan rbbi siditun. han tawrut‑inu twrri tga tagʷmrt, tg tirmt i‑kullu luḥuš n‑lh̬la. ur‑darsnt amksa, ašku imksawn lli‑asnt‑skrġ nkki ur‑a‑siggiln s‑uwlli. hati ar‑ššbaɛn ih̬f‑nsn, ur‑a‑kssan tawrut‑inu.

⁹ f‑ġayan a‑imksawn, sfldayt i‑wawal n‑rbbi da‑bdda‑illan.

¹⁰ ha mad‑awn‑inna rbbi siditun. giġ ḍiḍḍ i‑imksawn‑an. ra‑zġ‑gisn‑ḍalbġ tawrut‑inu, kksġ‑asn tayssa‑ns. ur‑rad‑adjġ imksawn‑an a‑sul‑ššbaɛn ih̬f‑nsn. rad‑jjnjmġ ulli‑nu zġ‑imi‑nsn a‑ur‑tnt‑sul‑šttan.

sidi rbbi ra‑d‑issmun tawrut‑ns

¹¹ « ‹ha ma‑inna rbbi siditun da‑bdda‑illan. rad‑siggilġ s‑uwlli‑nu ard‑tnt‑afġ.

¹² ġmklli iffuġ‑umksa zġ‑gr‑uwlli a‑isiggil s‑tilli mzrnin, ġmkan a‑s‑rad‑srsnt‑siggilġ, jjnjmġ‑tnt‑d zġ‑kullu illiġ mzrnt ġ‑uwssan n‑imdla llasnin.

¹³ ra‑tnt‑d‑ssufġġ zġ‑gr iqbiln, ssmunġ‑tnt‑d zġ‑tmizar aggugnin, awiġ‑tnt‑d s‑wakal‑nsnt. ra‑tnt‑kssaġ ġ‑idrarn n‑israyil ula talatin, ula kullu iduran n‑tmazirt.

¹⁴ ra‑tnt‑kssaġ ġ‑igʷdlan buġlanin, yili‑n‑wazrib‑nsnt f‑iggi n‑idrarn n‑israyil, sunfunt ġ‑untal ihnnan, ffrdnt ġ‑tuga imimn ġ‑idrarn n‑israyil.

¹⁵ nkki a‑ra‑ig amksa n‑uwlli‑nu, d‑nkki a‑ra‑tnt‑d‑yawi ad‑sunfunt. inna‑t rbbi siditun da‑bdda‑illan.

¹⁶ rad‑siggilġ s‑tanna ijlan, rarġ tanna imzrn, qqnġ tanna irẓan, ɛawnġ tanna iḍɛfn. imma tilli ḍninin ula tilli tjhhdnin, ra‑tnt‑hlkġ. hati s‑lḥqq a‑s‑ra‑tnt‑kullu‑kssaġ.

¹⁷ « ‹imma kunni ay‑ayt‑tuwrut‑inu, ha ma‑rad‑awn‑yini rbbi siditun da‑bdda‑illan. rad‑ḥkamġ s‑lḥqq ġ‑gr‑thruyt t‑ṭayyaḍ, ula ġ‑gr ihray d‑waġaḍn.

¹⁸ is‑ur‑kʷn‑yuwdi a‑tffrdm ġ‑igʷdlan buġlanin? mah̬ a‑ttaḍḍrm igʷdlan n‑aytmatun s‑iḍarn‑nun? is‑ur‑kʷn‑yuwdi a‑tssam aman zddignin? mah̬ a‑n‑tẓẓriẓm aman i‑aytmatun s‑iḍarn‑nun?

¹⁹ is‑iɛdl ad‑ffrdnt‑uwlli‑nu ġ‑ġaylli uḍḍrn iḍarn‑nun, sunt aman lli‑ẓẓriẓn iḍarn‑nun?

²⁰ f‑ġayan a‑f‑awn‑inna rbbi siditun da‑bdda‑illan. rad‑ḥkamġ ġ‑gr‑thruyt iḍnin d‑tad isdidn.

²¹ ha kunni ar‑tdḥḥim tilli ḍɛfnin s‑ufud d‑uġruḍ, ar‑tnti‑ttuggʷim tssyagasm‑tnt s‑waskawn aylliġ mzrnt s‑kraygatt tasga.

²² ha‑yyi rad‑jjnjmġ tawrut‑inu. ur‑sul‑rad‑gnt tagʷmrt. rad‑ḥkamġ ġ‑gr‑uhruy d‑wayyaḍ,

²³ ssbiddġ fllasn yan‑umksa ma‑tn‑ikssan. iga‑t‑uh̬ddam‑inu dawd. ra‑tn‑ikssa ig‑asn amksa.

²⁴ nkki‑ad igan rbbi da‑bdda‑illan, rad‑gġ rbbi‑nsn. ah̬ddam‑inu dawd ra‑ig agllid ġ‑wammas‑nsn. nkki giġ walli bdda illan. nkki a‑t‑innan.

lɛhd n‑sslamt

²⁵ « ‹rad‑didsn‑skrġ yan lɛhd n‑sslamt. ra‑ysn‑ssittiġ luḥuš šqanin zġ‑wakal, f‑ad‑zdġn ġ‑lh̬la ar‑nssan s‑laman ġ‑tagant.

²⁶ rad‑barkġ kullu tamazirt lli‑ilulliyn i‑uwrir‑inu amẓlay, ar‑asn‑taznġ inẓritn ġ‑izmaz‑nsn, gn inẓritn n‑lbaraka.

²⁷ tiṣġarin n‑uwrtan rad‑akkant lġllat‑nsnt, ar‑akkan igran ṣṣabt‑nsn. s‑sslamt a‑s‑rad‑zdġn ntni ġ‑wakal‑nsn. rad‑issann is‑giġ rbbi da‑bdda‑illan, ġakud lliġ rẓiġ ifggign n‑iḥlasn lli‑fllasn‑illan, fukkuġ‑tn‑d zġ‑ufus n‑willi‑tn‑igan d‑ismgan.

²⁸ ur‑sul‑rad‑gn tagʷmrt i‑iqbiln yaḍni, ula da‑tn‑šttan luḥuš n‑tagant. rad‑zdġn ġ‑laman, d‑ur‑sul‑ra‑yili ma‑tn‑issiwidn.

²⁹ rad‑asn‑d‑ẓẓuġ igran buġlanin s‑lh̬ir. ur‑sul‑ra‑yili ma‑yaġ laẓ ġ‑wakal‑nsn, d‑ur‑sar‑ra‑gisn‑ṭṭnaẓn ayt‑tmizar yaḍni.

³⁰ rad‑issann is‑giġ walli bdda illan, gġ rbbi siditsn lli‑didsn‑imunn, gn ntni mddn‑inu n‑ayt‑israyil. inna‑t rbbi siditun da‑bdda‑illan.

³¹ kunni tgam tawrut‑inu n‑bnadm lli‑kssaġ, d‑nkki giġ rbbi‑nun. inna‑t rbbi siditun da‑bdda‑illan.› »