iḥazqyal 33 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

illa f‑waḍaf a‑itɛlam mddn‑ns

¹ yašk‑iyi‑d‑wawal n‑sidi rbbi yini‑yyi:

² «wa yus n‑bnadm, sawl s‑ayt‑tmazirt‑nk tinit‑asn: ‹ma‑ra‑yili iġ‑uznġ ayt‑uwzzal ad‑utn kra n‑tmazirt, nkrn imzdġn n‑tmazirt‑an stin yan zġ‑gratsn a‑ig aḍaf‑nsn,

³ iẓr‑n‑ilmma‑waḍaf‑an id‑bu‑uwzzal ftan‑d s‑tmazirt, yut nnffar iɛlm ayt‑tmazirt‑ns?

⁴ ġakudan iġ‑illa ma‑isfldn i‑nnffar ur‑tt‑gis‑yiwi, lkmn‑t‑id ilmma id‑bu‑uwzzal nġn‑t, llan idammn‑ns f‑ih̬f‑ns.

⁵ ašku isfld i‑nnffar walaynni ur‑tt‑gis‑yiwi. han idammn‑ns f‑ih̬f‑ns. mra is‑tt‑gis‑yiwi, lukun ifukka tudrt‑ns.

⁶ walaynni iġ‑n‑iẓra‑waḍaf id‑bu‑uwzzal ftan‑d, d‑nttan ur‑yut nnffar wala iɛlm ayt‑tmazirt‑ns, lkmn‑tn‑d ilmma id‑bu‑uwzzal nġn kra n‑yan gisn, han ġwalli immutn ityattay d‑ddnub‑ns, imma idammn‑ns ra‑tn‑ḥasbġ f‑waḍaf‑an.›

⁷ «ha kiyi a‑yus n‑bnadm, giġ‑k d‑waḍaf f‑ayt‑israyil. ġakud nna tsfldt i‑mad‑ak‑ttiniġ, illa fllak a‑tn‑tɛlmt.

⁸ iġ‑nniġ i‑yan yʷh̬šnn: ‹wa bu‑lh̬ʷšant, han lmut a‑k‑id‑iqqann›, walaynni ur‑ti‑tɛlmt a‑d‑iwrri zġ‑uġaras‑ns, han ra‑immt d‑ddnub‑ns, imma idammn‑ns ra‑tn‑ḥasbġ fllak.

⁹ walaynni iġ‑tɛlmt bu‑lh̬ʷšant tinit‑as: ‹wrri‑d zġ‑uġaras‑nk›, d‑nttan ur‑d‑iwrri, ra‑immt d‑ddnub‑ns, imma kiyi tfukkit ih̬f‑nk.»