iḥazqyal 3 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

¹ izayd yini‑yyi: «wa yus n‑bnadm, išš mayd illan ġ‑umnid‑nk. išš ifr‑ad, tddut tsawlt s‑ayt‑israyil.»

² rẓmġ imi‑nu ġakudan, isrs‑iyi‑n gis ifr,

³ yini‑yyi: «a‑yus n‑bnadm, išš ifr‑ad‑ak‑fkiġ, tššbaɛt srs aḥlig‑nk.» lliġ‑t‑ššiġ, imim ġ‑imi‑nu zund tammnt.

⁴ izayd yini‑yyi: «wa yus n‑bnadm, ddu ġilad s‑dar ayt‑israyil tsawlt‑asn s‑iwaliwn‑inu.

⁵ han ur‑k‑uznġ s‑dar kra n‑uqbil isawaln s‑iwaliwn iġribn d‑ils iẓẓayn. uznġ‑k s‑ayt‑israyil.

⁶ mra is‑k‑uznġ s‑iqbiln ggutnin lli‑isawaln s‑ils iẓẓayn d‑iwaliwn iġribn lli‑ur‑tfhimt, rad‑srk‑sflidn.

⁷ walaynni ayt‑israyil ur‑rad‑irin a‑srk‑sfldn, ašku ur‑rin ad‑sri‑sfldn nkki. ašku ayt‑israyil kullutn iqqur ignzi‑nsn, iqjr‑uwl‑nsn.

⁸ ha‑yyi ssiqarġ udm‑nk a‑ig zund winsn, ssiqarġ ula ignzi‑nk a‑ig zund winsn,

⁹ rarġ ignzi‑nk iqqur zund aẓru n‑usmsd, uggʷar n‑uẓru n‑uznad. a‑ur‑zġ‑gisn‑tiksaḍt ntni ula ssiwdn‑k‑uwdmawn‑nsn, ašku imɛṣan ad‑gan.»

¹⁰ izayd yini‑yyi: «wa yus n‑bnadm, rar lɛaql s‑kullu iwaliwn lli‑rad‑ak‑iniġ, tḥḍut‑tn ġ‑uwl‑nk.

¹¹ nkr ġilad tddut dar imsukfn n‑ayt‑tmazirt‑nk, tsawlt srsn iġ‑ran ad‑sfldn ula iġ‑ur‑rin ad‑sfldn, tinit‑asn: ‹ha ma‑inna sidi rbbi da‑bdda‑illan.› »

¹² yawi‑yyi rruḥ, s‑sfldġ i‑ijjij iggutn ġ‑tġurdin‑inu zund iġ‑immussa‑wakal s‑jjhd, yini: «ambarki a‑iga sidi rbbi ġ‑tattuyt.»

¹³ ijjij‑an ar‑d‑itkka ifrawn n‑lmh̬luqat lliġ a‑tggrn i‑ngratsn, ula aqqryan n‑rrwayḍ n‑tama‑nsnt, ig zund iġ‑immussa‑wakal s‑jjhd.

¹⁴ yasi‑yyi rruḥ yawi‑yyi. dduġ nkki s‑uwl ismmumn d‑tasa ijddrn, itjhhd‑flla‑ufus n‑sidi rbbi.

¹⁵ aškiġ‑d s‑dar imsukfn lli‑izdġn ġ‑uduwwar n‑talabib ġ‑tama n‑trga n‑kbar. skiwsġ ġ‑illiġ a‑tskiwisn, d‑nkki duhdiġ ġ‑gratsn ssa n‑uwssan.

aḍaf f‑ayt‑israyil

¹⁶ lliġ zrin ssa n‑uwssan, yašk‑iyi‑d wawal n‑sidi rbbi,

¹⁷ yini: «wa yus n‑bnadm, giġ‑k d‑waḍaf f‑ayt‑israyil, a‑tsflidt i‑mad‑ak‑ttiniġ, tɛlmt‑tn‑in zġ‑dari.

¹⁸ iġ‑nniġ i‑yan yʷh̬šnn: ‹han lmut a‑k‑id‑iqqann›, iġ‑ur‑tɛlmt bu‑lh̬ʷšant‑an ula tġrit‑as‑n a‑d‑iwrri zġ‑lh̬ʷšant‑ns f‑a‑iddr, han ra‑immt ġwalli yʷh̬šnn s‑ddnub‑ns, d‑idammn‑ns, ra‑tn‑fllak‑ḥasbġ kiyi.

¹⁹ walaynni iġ‑tɛlmt bu‑lh̬ʷšant, d‑nttan ur‑d‑iwrri zġ‑lh̬ʷšant‑ns, ra‑immt s‑ddnub‑ns, imma kiyi tfukkit ih̬f‑nk.

²⁰ d‑iġ‑idda yan inmn ard iɛwwj ar‑iskar lbaḍl, gġ‑as ifikš ma‑t‑issknukin, ra‑immt. iġ‑ur‑ti‑tɛlmt, s‑ṣṣaḥt ra‑immt s‑ddnub‑ns, ašku ifulkitn lli‑yadlli‑iskr ur‑rad‑as‑gn yat, d‑idammn‑ns, ra‑tn‑fllak‑ḥasbġ kiyi.

²¹ walaynni iġ‑tɛlmt yan inmn tġrt‑as‑n a‑ur‑iɛwwj, d‑nttan ur‑iɛwwj, ra‑ifukku tudrt‑ns, ašku isfld srk ġ‑lliġ‑ti‑tɛlmt, ula kiyi hati tfukkit ih̬f‑nk.»

²² ittrs‑d‑flla‑ufus n‑sidi rbbi ġ‑darsn yini‑yyi: «nkr tffuġt s‑uzaġar. rad‑srk‑sawlġ ġin.»

²³ nkrġ ġakudan ffuġġ s‑uzaġar, s‑ha lmajd n‑sidi rbbi ibidd‑n sri, zund ġmklli‑t‑ẓriġ ġ‑tama n‑trga n‑kbar. knuġ ar akal f‑uwdm‑inu.

²⁴ ikšm‑iyi rruḥ, issbidd‑iyi f‑iḍarn‑inu yini‑yyi: «ddu s‑tgmmi‑nk tḥḍut gis.

²⁵ kiyi a‑yus n‑bnadm, ra‑k‑krfn s‑izakarn, ttyasast f‑a‑ur‑tiẓḍart a‑tffuġt s‑gr mddn.

²⁶ rad‑slġġ ils‑nk i‑wanġa‑nk, tgt aẓnẓum f‑a‑ur‑tiẓḍart a‑tn‑ttẓit, ašku han imɛṣan ad‑gan.

²⁷ walaynni tizi nna‑d‑srk‑sawlġ, rad‑rẓmġ imi‑nk tinit‑asn: ‹ha ma‑inna rbbi da‑bdda‑illan.› wanna iran a‑isfld isfld. wanna yagʷin yagʷi‑t. ašku imɛṣan ad‑gan.»