iḥazqyal 2 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

isawl‑d sidi rbbi s‑iḥazqyal

¹ yini‑yyi‑d: «wa yus n‑bnadm, bidd f‑iḍarn‑nk ad‑srk‑sawlġ.»

² lliġ‑d‑sri‑isawl ikšm‑iyi rruḥ, issbidd‑iyi f‑iḍarn‑inu, sfldġ‑as inna:

³ «wa yus n‑bnadm, ra‑k‑aznġ i‑ayt‑israyil, s‑uqbil n‑imɛṣan lli‑yyi‑itɛṣun, ar‑didi‑tẓin ntni d‑imzwura‑nsn sul s‑ġassad.

⁴ tasut‑ad mi‑iqqur‑uwl, ur‑a‑ys‑itḥšam‑uwdm. ntni a‑s‑ra‑k‑aznġ tinit‑asn: ‹ha ma inna sidi rbbi da‑bdda‑illan.›

⁵ iġ‑srk‑sfldn ula iġ‑ur‑srk‑sfldn, rad‑issann imɛṣan‑an is‑d‑darsn‑ikka yan nnabi.

⁶ imma kiyi a‑yus n‑bnadm, a‑ur‑zġ‑gisn‑tiksaḍt ntni, wala tksuḍt zġ‑iwaliwn‑nsn. iġ‑ddan ard‑ak‑lulliyn isnnann d‑tskra tgawrt f‑iġrdmiwn, ad‑ur‑tiksaḍt zġ‑iwaliwn‑nsn ula ssiwdn‑k‑uwdmawn‑nsn, ašku han imɛṣan ad‑gan.

⁷ iqqan‑k‑id ad‑asn‑tsslkmt iwaliwn‑inu, iġ‑ran a‑srsn‑sfldn ula iġ‑ur‑rin a‑srsn‑sfldn, ašku imɛṣan ad‑gan.

⁸ imma kiyi a‑yus n‑bnadm, sflid i‑ma‑s‑a‑yk‑ttiniġ. ad‑ur‑tɛṣut zund imɛṣan‑an. rẓm imi‑nk, tššt mayd‑ak‑fkiġ.»

⁹ mnadġ‑n ġakudan s‑ẓriġ yan‑ufus ityawmday‑d, illa gis yan ifr imuttln.

¹⁰ irẓm‑t ġ‑lgddam‑inu, ilint fllas tirra f‑snat‑tsgiw‑ns, tyaran gis iwaliwn n‑usmammi d‑tndra d‑tguḍi.