iḥazqyal 18 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

kraygatt yan d‑mad‑as‑igan

¹ yašk‑iyi‑d‑wawal n‑sidi rbbi yini:

² «ma‑tɛnam s‑lmɛna‑yad lli‑tkkatm f‑tmazirt n‑israyil lliġ a‑ttinim: ‹ššan lajdud wasmmum, ggurgzn‑uwh̬ṣan n‑tarwa›?

³ ha ma‑inna rbbi siditun: awal izgan zund tudrt‑inu ayd‑awn‑nniġ. ur‑sul‑ra‑tkkatm lmɛna‑yad ġ‑wakal n‑israyil.

⁴ ašku kraygatt rruḥ n‑bnadm, tinu a‑tga. zund rruḥ n‑warraw zund rruḥ n‑babas. han rruḥ nna‑iɛṣan, nttat a‑ra‑immt.

⁵ «iġ‑illa yan iṣlaḥn ar‑iskar s‑ufulki d‑lḥqq,

⁶ d‑ur‑a‑ittidu s‑dar‑tġrṣiw f‑iggi n‑iwrar, ula da‑itqasa laṣnam n‑ayt‑israyil, ula inds tamġart n‑wadjar‑ns, ula ign d‑tmġart ġ‑llan idammn,

⁷ ula itɛdda f‑yan, ar‑itrara ḍḍmant i‑bab‑ns, d‑ur‑jjid nttan a‑yukʷrn, ifk aġrum i‑wanna yaġ laẓ, issls wanna yaġ‑usmmiḍ,

⁸ ur‑a‑itrbaḥ s‑urṭṭal ula da‑itamẓ lfḍl iḥrmn, ar‑issrwal afus‑ns zġ‑lbaḍl, ar‑izzga lḥqq ġ‑gr yan d‑wayya,

⁹ ar‑bdda‑iskar s‑tnbaḍin‑inu, ar‑tt‑itawi bdda ġ‑luṣiyat‑inu. wanna iskarn kullu mayan, hati iga wad iṣlaḥn, s‑ṣṣaḥt rad‑as‑tili tudrt. inna‑t rbbi siditun da‑bdda‑illan.

¹⁰ «walaynni iġ‑yuru arraw, ig amh̬h̬ar ar‑itffi idammn, ar‑itsala lh̬ʷšant lli‑ur‑a‑itsala babas,

¹¹ iddu s‑dar‑tġrṣiw f‑iggi n‑iwrar, inds tamġart n‑wadjar‑ns,

¹² itɛdda f‑imẓlaḍ d‑willi yaġ laẓ, ikks‑d ma‑ur‑igin wins, d‑yagʷi a‑irar ḍḍmant i‑bab‑ns, iqasa laṣnam, isala tillay jlh̬nin,

¹³ irbḥ s‑urṭṭal, yamẓ lfḍl iḥrmn, nttan is‑rad‑as‑tili tudrt? uhu, kullu iskkirn jlh̬nin ayn iskr, s‑ṣṣaḥt ra‑immt, ilin idammn‑ns f‑ih̬f‑ns.

¹⁴ «walaynni iġ‑yuru ula ntta arraw, ig wad itmnadn kullu lh̬ʷšanat lli‑itsala babas, iẓr‑tnt walaynni ur‑a‑iskar zund babas,

¹⁵ ur‑a‑ittidu s‑dar‑tġrṣiw f‑iggi n‑iwrar, ula iqasa laṣnam n‑ayt‑israyil, ula inds tamġart n‑wadjar‑ns,

¹⁶ ula itɛdda f‑yan, ula yumẓ ḍḍmant zġ‑bab‑ns, ur‑jjid nttan a‑yukʷrn, ifk aġrum i‑wanna yaġ laẓ, issls wanna yaġ‑usmmiḍ,

¹⁷ ar‑issrwal afus‑ns zġ‑lbaḍl, ur‑a‑itrbaḥ s‑urṭṭal, ula da‑itamẓ lfḍl iḥrmn, ar‑tt‑itawi bdda ġ‑luṣiyat‑inu, ar‑bdda‑iskar s‑tnbaḍin‑inu, nttan ur‑ra‑immt f‑ssibt n‑ddnub n‑babas. s‑ṣṣaḥt rad‑as‑tili tudrt.

¹⁸ imma babas lli‑išttan ayt‑darsn, ikks‑asn ma‑igan winsn, ar‑iskar ma‑yʷh̬šnn i‑mddn‑ns, han ra‑immt f‑ddnub‑ns.

¹⁹ «iġ‑iyi‑tsqsam: ‹is‑ur‑ra‑yasi‑warraw ddnub n‑babas?› rad‑awn‑jawbġ: iġ‑a‑iskar‑warraw s‑ufulki ula lḥqq, ar‑tt‑itawi ġ‑tnbaḍin‑inu ar‑tnt‑bdda‑izzga, s‑ṣṣaḥt rad‑as‑tili tudrt.

²⁰ imma wanna itɛṣun, hatin ra‑immt. arraw ur‑ra‑itasi ddnub n‑babas. ula walli yurun ur‑ra‑itasi ddnub n‑yus. wanna iṣlaḥn, nttan a‑mi‑rad‑ḥasbġ iskkirn‑ns ṣlaḥnin. ula wanna yʷh̬šnn, nttan a‑mi‑rad‑ḥasbġ iskkirn‑ns ʷh̬šnnin.

²¹ «iġ‑iwrri yan yʷh̬šnn ifl kullu iskkirn‑ns ʷh̬šnnin, ar‑iskar s‑tnbaḍin‑inu, ar‑izzga lḥqq d‑ufulki, s‑ṣṣaḥt rad‑as‑tili tudrt. ur‑ra‑immt.

²² ur‑rad‑as‑ḥasbġ kullu ma‑s‑iyi‑iɛṣa ġayd izrin. hati f‑ssibt n‑iskkirn‑ns ṣlaḥnin a‑f‑ra‑iṭṭaf tudrt.

²³ is‑a‑tfraḥġ nkki s‑lmut n‑yan yʷh̬šnn? uhu, walaynni iġ‑d‑iwrri zġ‑uġaras‑ns baš a‑iṭṭaf tudrt, mayan a‑yyi‑issfraḥn. inna‑t rbbi siditun da‑bdda‑illan.

²⁴ imma yan iṣlaḥn, iġ‑iwrri ifl iskkirn‑ns ṣlaḥnin, itɛdda f‑wiyyaḍ, isala tajlh̬it zund ayt‑lh̬ʷšant, is‑ra‑iṭṭaf tudrt d‑nttan ar‑sul‑iskar ġmkan? uhu. ur‑rad‑as‑ḥasbġ iskkirn ṣlaḥnin lli‑iskr ġayd izrin. ntta iġḍr s‑tkndawt‑ns, iɛṣu s‑ddnub‑ns. hati f‑ġayan a‑f‑ra‑immt.

siditnġ ar‑itḥkam s‑lḥqq

²⁵ «han da‑ttinim: ‹siditnġ ur‑a‑iskar s‑lḥqq.› sfldayt ay‑ayt‑israyil. is‑urd s‑lḥqq ayd‑s‑a‑skarġ nkki? is‑urd kunni a‑ur‑iskarn s‑lḥqq?

²⁶ iġ‑iwrri yan iṣlaḥn ifl iskkirn‑ns ṣlaḥnin ar‑itɛdda f‑wiyyaḍ, ra‑immt f‑ssibt n‑tɛddiyt‑ns. han f‑ssibt n‑tɛddiyt‑ns a‑f‑ra‑immt.

²⁷ imma yan yʷh̬šnn, iġ‑iwrri ifl iskkirn‑ns ʷh̬šnnin, ar‑iskar s‑ufulki d‑lḥqq, nttan rad‑as‑tili tudrt.

²⁸ ašku iswangm d‑ih̬f‑ns, iwrri‑d ifl‑n kullu ġaylli‑s‑a‑yyi‑itɛṣu. s‑ṣṣaḥt rad‑as‑tili tudrt. ur‑ra‑immt.

²⁹ imma ayt‑israyil ar‑sul‑ttinin: ‹ur‑a‑iskar siditnġ s‑lḥqq.› way‑ayt‑israyil, is‑urd lḥqq ayd‑s‑a‑skarġ? is‑urd kunni a‑ur‑iskarn s‑lḥqq?

³⁰ «way‑ayt‑israyil, f‑ġayan a‑f‑rad‑fllawn‑utġ lḥukm, kraygatt yan f‑ġaylli iskar. inna‑t rbbi siditun da‑bdda‑illan. flayt kullu ġaylli tskarm yʷh̬šn, twrrim‑d f‑a‑ur‑thlkm s‑ddnub‑nun.

³¹ luḥayt‑n zġ‑giwn kullu lh̬ʷšant lli‑s‑a‑yyi‑ttɛṣum. skrayt i‑ih̬f‑nun ul n‑ljdid ula rruḥ n‑ljdid. ma‑tram lmut ay‑ayt‑israyil?

³² ur‑a‑tfraḥġ nkki s‑lmut n‑wanna immutn. inna‑t rbbi siditun da‑bdda‑illan. wrryat‑d ġilad tddrm.»