iḥazqyal 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

iḥazqyal ġ‑tmazirt n‑babil

¹ ġ‑usggʷas wis kraḍ id‑mraw (30) ġ‑wayyur wis kkuẓ ġ‑wass wis smmus, lliġ nkki ġ‑gr imsukfn ġ‑tama n‑trga n‑kbar, s‑ha ignwan nurẓmn, bannt‑iyi‑d tiwuẓra n‑rbbi.

² ġ‑usggʷas wis smmus tigira n‑ukuf n‑ugllid yahuyah̬in, ġ‑wayyur wis smmus,

³ yuška‑d‑wawal n‑sidi rbbi s‑umsakmur iḥazqyal yus n‑buzi ġ‑tama n‑trga n‑kbar ġ‑tmazirt n‑ayt‑kaldan [ayt‑babil], ittrs‑d‑flla‑ufus n‑sidi rbbi.

tawaẓrit n‑lmjd n‑sidi rbbi

⁴ mnadġ‑n s‑han kra n‑ijawan kkan‑d ššamal, d‑yat‑tmdlut bahra imqqurn, tsutl‑as tifawt itjhhdn, ar‑d‑zġ‑gis‑kkatn‑uwsmann. tuẓẓunt n‑lɛafiyt‑an trwas anas issmrġan.

⁵ iffuġ‑d ilmma zġ‑lɛafiyt kra irwas kkuẓṭ lmh̬luqat ddrnin. ġmkad a‑tga ssift‑nsnt. rwasnt bnadm,

⁶ imma kud yat teṭṭaf kkuẓ‑uwdmawn d‑kkuẓ ifrawn.

⁷ iḍarn‑nsnt nmn, iwurzan‑nsnt gan zund ifnza n‑igiz, ar‑ssmrġant zund anas isqln.

⁸ ġ‑ddu ifrawn‑nsnt ṭṭafnt zund ifassn n‑bnadm ġ‑kkuẓṭ‑tsgiw‑nsnt. ġmkad ad‑gant s‑kkuẓṭ ġ‑uwdmawn‑nsnt ula ġ‑ifrawn‑nsnt.

⁹ ifrawn n‑kraygatt yat ar‑n‑tggrn i‑win ṭiyyaḍ, ftunt kullu s‑lgddam, ur‑a‑tlulliynt.

¹⁰ udmawn‑nsnt, irwas win bnadm ġ‑lgddam, d‑win izm ġ‑ufasi, d‑win‑uzgr ġ‑uẓlmaḍ, d‑win igidr ġ‑tġurdin.

¹¹ ġmkan ad‑gan‑uwdmawn‑nsnt. ifrawn‑nsnt fsrn s‑uflla. kraygatt yat dars sin ifrawn, d‑kraygatt ifr ar‑n‑itggr i‑win ṭayyaḍ. sin ifrawn yaḍni ar‑srsn‑dalnt ddat‑nsnt.

¹² kraygatt yat tfta s‑lgddam. inna tra rruḥ, ddunt srs, ur‑a‑tlulliynt.

¹³ imma ssift n‑lmh̬luqat‑an ddrnin tga zund tirgin rġanin, ar‑takʷin isufa i‑ngratsnt. ar‑ttsufu lɛafiyt‑an bahra ar‑d‑zġ‑gis‑kkatn‑uwsman.

¹⁴ ar‑tkkant lmh̬luqat ġid ula ġid zund usmann.

¹⁵ lliġ a‑ssmuqqulġ ġ‑lmh̬luqat‑an ddrnin, ẓrġ‑n yat rrwiḍa ġ‑tama n‑kraygatt yat gisnt, ar‑ttslay akal.

¹⁶ ġmkad a‑tga ssift n‑rrwayḍ d‑isiwala‑nsnt. ssift‑nsnt tga zund aẓru umlil issmrġan. mrwasnt ntnti s‑kkuẓṭ, gnt kullu zund iġ‑tlla rrwiḍa ġ‑ugʷns n‑ṭayyaḍ.

¹⁷ ġakud nna‑ftant, ar‑fttunt s‑yat‑tsga ġ‑kkuẓṭ‑tsgiw‑nsnt, ur‑a‑tlulliynt lliġ a‑fttunt.

¹⁸ tamiw n‑rrwayḍ‑an attuynt bahra, lɛjb ad‑gant. tamiw‑nsnt s‑kkuẓṭ ɛmmrnt s‑walln lulliynt‑asnt ġ‑kraygatt tasga.

¹⁹ ġakud nna‑ftant lmh̬luqat ddrnin, ftunt rrwayḍ ġ‑tama‑nsnt. ġakud nna‑attuynt lmh̬luqat f‑wakal, attuynt ula rrwayḍ didsnt.

²⁰ innas‑tnt‑tiwi rruḥ, ddunt srs, attuynt didsnt rrwayḍ, ašku rruḥ n‑lmh̬luqat ddrnin tlla ġ‑rrwayḍ.

²¹ ġakud nna‑ftant lmh̬luqat, ftunt rrwayḍ. ġakud nna‑biddnt h̬tid, biddnt h̬tin. d‑ġakud nna‑attuynt lmh̬luqat f‑wakal, attuynt didsnt rrwayḍ, ašku rruḥ n‑lmh̬luqat tlla ġ‑rrwayḍ.

²² f‑iggi n‑ih̬f n‑lmh̬luqat ddrnin, illa kra irwasn taduli yusɛan n‑udfl. lɛjb a‑iga, ifsr fllasnt ar‑issmrġa.

²³ d‑ifrawn n‑lmh̬luqat‑an tyawfsarn ġ‑ddu‑tduli. kraygatt yat, sin zġ‑ifrawn‑ns ar‑n‑tggrn i‑win ṭiyyaḍ. sin ifrawn‑nsnt yaḍni, ar‑srsn‑dalnt ddat‑nsnt.

²⁴ ġakud nna‑ftant lmh̬luqat, ar‑sflidġ i‑ijjij n‑ifrawn‑nsnt zund aqqryan n‑waman ggutnin, ula zund aqqur n‑rbbi itjhhdn ula zund tiġuya n‑ayt‑imiġ ggutnin. ġakud nna‑biddnt, ar‑ssmununt ifrawn‑nsnt.

²⁵ sfldġ ilmma i‑waqqur zġ‑iggi n‑tduli ġ‑uflla n‑ih̬fawn‑nsnt. ġakud lliġ biddnt, ssmunnt ifrawn‑nsnt.

²⁶ yili ġin kra irwasn lɛrš n‑uẓru azrqi f‑iggi n‑tduli ġ‑uflla n‑ih̬fawn‑nsnt. yili yan irwasn bnadm iskiws f‑lɛrš ġ‑tattuyt.

²⁷ lliġ‑t‑in‑ẓriġ iban‑iyi‑n zund anas issmrġan zġ‑wammas‑ns tasawnt, tlulliy‑as lɛafiyt. ammas‑ns tagsart iban‑iyi‑n zund lɛafiyt s‑tifawt itjhhdn.

²⁸ asmrqiqi lli‑as‑isutln iga zund taslit n‑unẓar ġ‑gr imdla. ġmkan a‑di‑tban ṣṣurt n‑lmajd n‑rbbi da‑bdda‑illan. lliġ‑t‑ẓriġ, ḍrġ‑n f‑uwdm‑inu, s‑sfldġ i‑waqqur n‑yan isawaln.