hušaɛ 6 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

riġ darun lḥnant urd tiġrṣi

¹ «aškat‑d a‑nwrri s‑sidi rbbi. hati irẓa‑yaġ baš a‑yġ‑ijjuji. yut‑aġ f‑a‑yġ‑d‑iqqn aggas.

² ard zrin sin‑uwssan rad‑aġ‑d‑irar tudrt, issnkr‑aġ‑d wis kraḍ‑uwssan f‑ad‑dars‑nddr.

³ rwaḥat a‑nissan sidi rbbi, ng‑n tiqqi a‑t‑nissan. zund tawaġla n‑tafukt a‑s‑rad‑aġ‑d‑iban. ġ‑uzmz‑ns a‑rad‑darnġ‑yašk zund aršiš, zund anẓar amzwaru da‑isswan akal.»

⁴ [yini sidi rbbi:] «ma‑ra‑dik‑skrġ ay‑afraym [israyil]? ma‑ra‑dik‑skrġ a‑yahuda? tayri‑nk tga zund tamdlut n‑zikk ṣbaḥ, imikk zund tiġli ar‑ttattuy laḥ‑tt.

⁵ uznġ‑awn‑in lanbiya f‑a‑kʷn‑rẓẓaġ, ar‑kʷn‑nqqaġ s‑iwaliwn lli‑s‑awn‑nniġ, ar‑fllawn‑kkatġ lḥkamat zund usmann.

⁶ ašku riġ darun lḥnant urd tiġrṣi, iriġ giwn tawassna n‑rbbi, urd isakmurn jdrnin.»