hušaɛ 3 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

isġa‑d hušaɛ tamġart‑ns

¹ yini‑yyi sidi rbbi: «zayd tis snat‑twal tḥubbut yat‑tmġart, tɛzza dar‑usmun‑ns tg tamggant. ḥubbu‑tt ġmklli iḥubba sidi rbbi ayt‑israyil, wah̬h̬a da‑ttidun ntni s‑id‑rbbi iġribn, ar‑darsn‑tšthun tummitin n‑zzbib.»

² sġġ‑tt‑id ġakudan s‑smmus d‑mraw (15) n‑uqarid n‑nnʷqrt d‑miyya d‑smmus id‑mraw (150) kilu n‑ṭmẓin.

³ iniġ‑as: «ra‑dari‑tṣbrt ussan ggutnin. ur‑sul‑ra‑tgt tamggant ula tmunt d‑yan. rad‑fllam‑ṣbrġ ula nkki.»

⁴ ašku illa f‑ayt‑israyil ad‑ṣbrn ussan ggutnin. ur‑rad‑darsn‑yili‑ugllid ula iriyasn, bbin isakmurn d‑ifariwn lli‑dar‑tɛbadn, laḥ‑asn abannk n‑tkššuḍin d‑laṣnam n‑tgmmi.

⁵ tigira n‑mayan rad‑d‑wrrin ar‑siggiln s‑rbbi da‑bdda‑illan ig rbbi‑nsn. rad‑siggiln ula s‑yus n‑dawd a‑ig agllid‑nsn. s‑trgagayt a‑s‑rad‑d‑akmurn s‑rbbi da‑illan, ar‑siggiln s‑ifulkitn‑ns ġ‑uwssan ggʷranin.