hušaɛ 14 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

rad‑jjnjmġ imjlan

¹ wrryat‑d ay‑ayt‑israyil s‑rbbi da‑illan ig rbbi‑nun, ašku ifikš n‑lh̬ʷšant‑nun a‑kʷn‑yutn tḍrm.

² asyat iwaliwn twrrim s‑rbbi tinim: «ssitti fllanġ kullu lh̬ʷšant‑nġ, trḍut fllanġ ad‑ak‑n‑nssakmur lġllt n‑infurn‑nġ.

³ ur‑rad‑aġ‑jjnjmn ayt‑aššur, d‑ur‑sul‑ra‑nssidu f‑iysan n‑imiġ. ur‑sar‑ra‑nttini ‹id‑rbbi‑nġ› i‑laṣnam lli‑nɛdl s‑ifassn‑nġ. ašku kiyi a‑ġ‑a‑itafa igigil lḥnant.»

⁴ [yini sidi rbbi:] «rad‑jjnjmġ wid jllunin, rḍuġ a‑gisn‑ḥnnuġ, ašku ssunfġ‑asn lġaḍab‑inu irġan.

⁵ zund tiġli a‑ra‑n‑aškiġ i‑israyil, iflujju nttan zund afru, ar‑izzigiz iẓuran‑ns zund idgl n‑lubnan,

⁶ ar‑ifssr tizlatin‑ns. ra‑ifulki ġ‑iẓri zund tazitunt, ifk tujjut imimn zund tujjut n‑lubnan.

⁷ rad‑d‑wrrin mddn zdġn ġ‑ddu‑umalu‑ns. rad‑buġlun zund igʷlas n‑irdn, arun zund ddilit, iwrri ism‑nsn ityawssan zund aman n‑waḍil n‑lubnan.

⁸ way‑afraym, ma‑s‑sul‑trit laṣnam? nkki a‑ra‑k‑igabl, fkġ‑ak aynna‑f‑tlkmt. gġ dark zund taṣġart bdda izgzawn, d‑nkki a‑ġ‑ra‑ttafam lġllt.»

⁹ wanna iṭṭafn taḥkimt, illa fllas a‑ifhm tiġawsiwin‑ad. wanna issnn a‑iẓli ma‑ifulkin zġ‑ma‑yʷh̬šnn, illa fllas a‑iẓr mamnk ad‑gant. ašku aġaras n‑sidi rbbi, hati inm bahra. ar‑gis‑fttun willi ṣlaḥnin, imma willi ɛṣanin ar‑gis‑tknukin.