hušaɛ 11 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

iḥnna sidi rbbi ġ‑mddn‑ns

¹ [yini sidi rbbi:] «lliġ sul iga aḥšmi imẓẓin, iɛzzu dari israyil. ġrġ i‑iwi a‑d‑iffuġ zġ‑miṣr.

² walaynni kra‑s‑a‑ysn‑aqraġ, ar‑n‑zġ‑gigi‑taggugn, ar‑n‑ssakmurn tiġrṣiw i‑‹baɛl›, ar‑n‑tbh̬h̬arn i‑laṣnam.

³ nkkin a‑imalan i‑afraym a‑izzigiz, ar‑asn‑tamẓġ ġ‑ifassn‑nsn. walaynni ur‑fhimn izd nkki a‑tn‑ijjnjamn.

⁴ ar‑tn‑d‑lddiġ s‑izikr n‑rrḍa, gġ fllasn aḥlas n‑lḥnant, gġ darsn walli‑asn‑ifssin algamu f‑tqʷsmart, ar‑n‑knnuġ ar‑tn‑tɛlafġ.

⁵ «ur‑rad‑wrrin s‑wakal n‑miṣr, walaynni ayt‑aššur a‑ra‑fllasn‑iḥkam, ašku agʷin ad‑d‑sri‑wrrin nkki.

⁶ han uzzal a‑ra‑yakʷi f‑tmdinin‑nsn, ibbi ifggagn n‑imawn‑nsnt, ihlk kullu ma‑f‑d‑mšaškan i‑ngratsn.

⁷ mddn‑inu hatni ar‑bahra‑ttirin a‑yyi‑fln. wah̬h̬a da‑aqran s‑walli yattuyn, ur‑ra‑tn‑ssattuyġ nkki.

⁸ «mamnk a‑ra‑k‑in‑dḥiġ, ay‑afraym? mamnk a‑ra‑k‑in‑fkġ ġ‑ifassn‑nsn, a‑israyil? is‑ra‑k‑hlkġ ġmklli hlkġ tamdint n‑adama? is‑ra‑k‑h̬luġ ġmklli h̬ʷliġ tamdint n‑ṣabuyim? ul‑inu ur‑akkʷ‑iri ġmkan, ašku iɛmmr s‑lḥnant.

⁹ ur‑ra‑k‑utġ s‑lġaḍab išqan. ur‑rad‑daġ‑h̬luġ afraym. ašku nkki giġ rbbi, urd bnadm. gġ bab n‑ufulki ikmmln ġ‑wammas‑nun. urd s‑lġaḍab a‑s‑ra‑n‑darun‑aškiġ.»