hušaɛ 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tamġart n‑hušaɛ d‑tarwa‑ns

¹ awal n‑sidi rbbi lli‑d‑yuškan i‑hušaɛ yus n‑biyri, ġ‑uwssan n‑ɛuzziyah d‑yutam d‑aḥaz d‑ḥizqiyah igldan n‑yahuda. ġ‑uwssan‑an iga yarabɛam yus n‑yuwaš agllid n‑israyil.

² lliġ ibda sidi rbbi ar‑isawal f‑imi n‑hušaɛ, yini sidi rbbi i‑hušaɛ: «zayd ttahlt zġ‑gr willi ifsadn, tarut dids tarwa n‑lfsad. ašku tamazirt‑ad tfsad bahra, fln rbbi da‑bdda‑illan.»

³ iddu itahl gumar illis n‑diblayim, tffuġ ar‑trbbu taru‑as yan‑warraw.

⁴ yini sidi rbbi i‑hušaɛ: «g‑as ism ‹izraɛil› [tga lmɛna‑ns ‹rbbi iluḥ amud›]. ašku yan imikk rad‑rarġ i‑tarwa n‑yahu f‑idammn n‑ayt‑izraɛil lli‑iffi jdditsn yahu [agllid n‑israyil], sstmmuġ tagldit n‑israyil.

⁵ ġassan a‑rad‑rẓġ lqus n‑israyil ġ‑talat n‑izraɛil.»

⁶ ar‑daġ‑trbbu gumar, taru yat‑tfruh̬t. yini sidi rbbi i‑hušaɛ: «g‑as ism ‹lu‑ruḥama› [tga lmɛna‑ns ‹laḥ rrḥmt›]. ašku ur‑sul‑rad‑rḥmġ ayt‑israyil ula da‑ysn‑tṣamaḥġ.

⁷ walaynni rad‑sul‑rḥmġ ayt‑yahuda jjnjmġ‑tn. urd s‑lqus nġd uzzal nġd imiġ nġd iysan d‑imnayn, walaynni ra‑tn‑jjnjmġ s‑ih̬f‑inu nkki‑ad igan rbbi da‑bdda‑illan gġ rbbi‑nsn.»

⁸ lliġ tkkis tibbišt i‑lu‑ruḥama, tffuġ ar‑daġ‑trbbu gumar, taru yan‑warraw.

⁹ yini sidi rbbi i‑hušaɛ: «g‑as ism ‹lu‑ammi› [tga lmɛna‑ns ‹urd mddn‑inu›]. ašku ur‑sul‑tgim mddn‑inu ula giġ rbbi‑nun.

¹⁰ walaynni rad‑sul‑igatn ayt‑israyil zund amlal n‑tama n‑umda lli‑mi‑ur‑iẓḍar yan a‑t‑iɛbbr ula iḥasb‑t. ġ‑illiġ‑asn‑nniġ ‹ur‑sul‑tgim mddn‑inu›, rad‑asn‑iniġ ‹tgam tarwa n‑rbbi iddrn›.

¹¹ ayt‑yahuda d‑ayt‑israyil rad‑gn yan, skrn yan‑uriyas‑nsn, ar‑aqlayn zġ‑wakal. ass ihiyyan a‑ra‑ig‑wass‑an n‑izraɛil.»