ḥaggay 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tlkm tizi n‑tbnnayt

¹ ġ‑usggʷas wis‑sin n‑tgldit n‑ugllid daryus, ġ‑wayyur wis sḍis, ġ‑wass izwarn a‑d‑yuška‑wawal n‑sidi rbbi f‑imi n‑nnabi ḥaggay i‑zarubbabil lli‑igan yus n‑šyaltyal ig lḥakm ġ‑tmazirt n‑yahuda, d‑umsakmur ihiyyan yahušaɛ yus n‑yuṣadaq, yini:

² «ha ma‑inna sidi rbbi n‑lmlayka. ẓrat mddn‑an‑nun ar‑ttinin: ‹ur‑ta‑tlkim tizi baš a‑ttyawbnna‑tgmmi n‑sidi rbbi.› »

³ yašk‑asn‑d‑daġ‑wawal n‑sidi rbbi f‑imi n‑nnabi ḥaggay yini:

⁴ «tizi‑ad is‑ifulki a‑tzdġm ġ‑tgʷmma‑nun šwanin, imma tigmmi‑nu tga uh̬rib?

⁵ ġilad ha ma‑ywn‑d‑inna siditun rbbi n‑lmlayka. swangmat ġ‑ma‑tskarm.

⁶ han tkrzm kigan, tmgrm imikk. ar‑tšttam, ur‑a‑kʷn‑ituwdu. ar‑tssam, yaġ‑kʷn sul fad. ar‑tlssam, ur‑giwn‑illi yan irġan. wanna yumẓn tiġrad‑ns, igr‑tnt‑in ġ‑uqrab ibbin.

⁷ «ha ma‑inna siditun rbbi n‑lmlayka. swangmat ġ‑ma‑tskarm.

⁸ awnat s‑iwrar, tawim‑d ikššuḍn, tbnum tigmmi‑nu, a‑srs‑frḥġ, ibayyn gis lmajd‑inu. rbbi siditun ad‑awn‑t‑id‑innan.

⁹ ha kunni trjam‑n kigan, imil yašk‑awn‑d imikk. tawim‑d mayan s‑dar takat‑nun, imil suḍġ gis, laḥ‑t. mah̬ ad‑darun‑ijra ġmkan? ašku th̬ʷla‑tgmmi‑nu, d‑kraygatt yan giwn ar‑itlhu s‑tgmmi‑ns. rbbi siditun ad‑awn‑t‑id‑innan.

¹⁰ mayan a‑f‑n‑umẓn ignwan anẓar, yamẓ‑n‑wakal ṣṣabt‑ns.

¹¹ utġ aġʷni f‑igran d‑iwrar, iqarn irdn d‑waḍil d‑zzit ula kullu ma‑d‑issmġay‑wakal, utġ srs mddn d‑lbhaym ula kullu tawuri‑nsn.»

¹² isfld srs lḥakm zarubbabil yus n‑šyaltyal, ula yahušaɛ lli‑igan yus n‑yuṣadaq ig amsakmur ihiyyan, ula kullu willi iqaman ġ‑ayt‑yahuda. awin‑tt ġ‑ma‑inna rbbi siditsn f‑imi n‑nnabi ḥaggay, uqqrn kullu rbbi siditsn.

¹³ ġakudan a‑isawl ḥaggay arqqas n‑sidi rbbi s‑kullu mddn‑an, isslkm‑asn‑d awal n‑sidi rbbi yini‑asn: «ha‑yyi didun. inna‑yawn‑t‑id rbbi siditun.»

¹⁴ idḥi sidi rbbi rruḥ n‑zarubbabil yus n‑šyaltyal lḥakm ġ‑tmazirt n‑yahuda, idḥi ula rruḥ n‑yahušaɛ yus n‑yuṣadaq amsakmur ihiyyan, izayd idḥi rruḥ n‑kullu ayt‑rbbi lli‑iqaman. munn‑d ġakudan lhun s‑tbnnayt n‑tgmmi n‑sidi rbbi n‑lmlayka lli‑igan rbbi‑nsn.

¹⁵ ġassan iga ass wis sin id‑mraw d‑kkuẓ (24), ġ‑wayyur wis sḍis, ġ‑usggʷas wis sin n‑ugllid daryus.