ḥabaqquq 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

asqsi amzwaru

¹ awal n‑rbbi ġmklli‑t‑iẓra nnabi ḥabaqquq.

² wa sidi rbbi, mnšk a‑rad‑qamaġ ar‑fllak‑ssmummuyġ, d‑kiyi ur‑a‑yyi‑tsflidt? d‑mnšk a‑rad‑qamaġ ar‑srk‑aqraġ f‑lbaḍl, d‑kiyi ur‑ta‑yġ‑tjjnjmt?

³ mah̬ a‑yyi‑tudjt ar‑tmnadġ ḍḍulm? mah̬ a‑tqamat ar‑ttssmuqqult ġ‑tmmara‑nġ? ha‑yyi ġ‑wammas n‑willi kkatnin ar‑ssduyyn, ar‑kullu‑ssnkarn ṭaẓit ula timiġt.

⁴ han sskušmn almmud, d‑lḥqq ur‑a‑t‑zzgan. bu‑lh̬ʷšant a‑issmuttuln wad iṣlaḥn baš a‑n‑fllas‑iluḥ lbaḍl. [ijawb‑d sidi rbbi:]

⁵ «mnadat ġ‑iqbiln n‑ddunit tẓrm, rad‑awn‑iḍr lɛjb bahra. ašku rad‑skrġ kra ġ‑uwssan‑nun, iġ‑awn‑fllas‑nnan ur‑ra‑tn‑tamnm.

⁶ ašku han ra‑d‑ssnkrġ ayt‑kaldan [ayt‑babil], awiġ‑d aqbil išqan iqjr, ad‑fttun ġ‑kullu ddunit, ar‑tamẓn timdinin n‑wiyyaḍ.

⁷ ġuwḍn zġ‑gisn kullu mddn, ḍrnt‑d‑fllasn‑tksaḍ ggutnin. ar‑ssrbaḥn ih̬f‑nsn s‑lḥukm lli‑s‑a‑kkatn.

⁸ han agmarn‑nsn fssusn f‑wagrzamn, qjrn ula f‑uwššann n‑takʷya n‑tafukt. tjhhdn imnayn‑nsn, ar‑di‑tazzaln zġ‑tuggʷag, ar‑di‑taylaln zund igidr‑n‑yukʷin f‑tgʷmrt‑ns.

⁹ skrn kullu f‑imiġ, qṣadn ad‑rẓẓan. ar‑kššmn ikabarn‑nsn zund ijawan n‑lh̬la, ar‑tkksn winna umẓn zund tiẓratin n‑umlal.

¹⁰ ar‑ṭṭnaẓn ġ‑igldan ar‑tḥgarn lḥukkam. ar‑ḍṣṣan ġ‑ugadir nna‑illan, ar‑d‑fllas‑ssgudin akal amẓn‑t.

¹¹ zrin ilmma zund ijawan, ḥarrun s‑mani yaḍni. han ddnub‑nsn f‑ih̬f‑nsn, ašku jjhd‑nsn kayn tɛbadn.»

asqsi wis sin

¹² is‑ur‑tllit kullu mayd izrin, a‑rbbi‑nu amẓlay? wa rbbi da‑bdda‑illan, s‑ṣṣaḥt ur‑ra‑nmmt. tskrt‑tn a‑sidi rbbi baš ad‑fllanġ‑ḥkamn, tẓlit‑tn a‑rbbi itjhhdn ad‑fllanġ‑zzuguzn lɛqubit.

¹³ kiyi lli‑ur‑a‑itndasn iẓri‑nk s‑iskkirn n‑willi ʷh̬šnnin, d‑ur‑a‑ttiḥmalt a‑di‑ttmnadt ġ‑willi itsalan taɛddiyt, mah̬ a‑sul‑ttgabalt takndawt n‑mddn‑ad? mah̬ a‑tfssat lliġ a‑šttan ayt‑lh̬ʷšant willi ṣlaḥnin uggʷar‑nsn?

¹⁴ hati tflt bnadm a‑ig zund islman n‑umda ula zund ibh̬h̬ḥušn lli‑ur‑dar ma‑gisn‑itnbaḍn.

¹⁵ ar‑tn‑itamẓ‑ungmar s‑tukṭṭ, ildi‑tn‑d ġ‑ššbkt, ar‑tn‑issmunu ġ‑tasllit, ifrḥ ifjjij s‑tgʷmrt‑ns,

¹⁶ inkr ġakudan ar‑n‑issakmur tiwafkiw i‑ššbkt‑ns, ar‑itbh̬h̬ar i‑tasllit‑ns, ašku ar‑srsnt‑issigat lh̬ir i‑ih̬f‑ns, ar‑itfjjij s‑tiram mimnin.

¹⁷ aḥḥ‑inu, izd ġmkan a‑ra‑iqama ar‑n‑itluḥ ššbkt‑ns, ar‑igʷmmr iqbiln n‑ddunit bla lḥnant?