ɛazra 9 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

timġarin ula nndast n‑iqbiln

¹ lliġ skrn kullu mayan, aškin‑d dari iriyasn n‑mddn‑nġ inin‑iyi: «han ayt‑israyil d‑imsakmurn d‑ayt‑lawi ur‑ẓlin ih̬f‑nsn zġ‑iqbiln n‑ddunit ula zġ‑iskkirn‑nsn jlh̬nin. ur‑ngaran d‑ayt‑kanɛan d‑ayt‑ḥit d‑ayt‑fariz d‑ayt‑yabus d‑ayt‑ɛammun d‑ayt‑muwab d‑ayt‑miṣr d‑ayt‑amur.

² ašku iwin kra zġ‑istitsn tahln‑tnt, fkn‑tnt ula i‑tarwa‑nsn, aylliġ iwrri‑wamud amẓlay ih̬lḍ d‑win iqbiln n‑ddunit. han ih̬fawn d‑inmġurn n‑mddn‑nġ a‑izwurn ġ‑tjli‑ad.»

³ lliġ sfldġ nkki i‑ġayan, bbiġ aqššab‑inu d‑uslham‑inu, bjrġ azzar n‑ih̬f‑inu d‑tamart‑inu, gawrġ duhduġ.

⁴ aškin‑d kullu willi ituqqarn awal n‑rbbi n‑israyil, munn‑d flla f‑ssibt n‑tjli n‑willi yakufn. gawrġ duhduġ aylliġ tlkm tizi n‑usakmur n‑tdggʷat.

⁵ tasaɛt n‑usakmur n‑tdggʷat, nkrġ zġ‑tdallit‑inu, ġmklli ibbi‑uqššab‑inu d‑uslham‑inu, ḍrġ f‑ifaddn‑inu, mdiġ‑n ifassn‑inu s‑rbbi da‑illan ig rbbi‑nu

⁶ iniġ: «wa rbbi‑nu, ha‑yyi ḥššmġ bahra. ur‑ẓḍarġ a‑n‑allġ udm‑inu s‑dark a‑rbbi‑nu, ašku ar‑ttigatn iskkirn‑nġ ʷh̬šnnin, ar‑ttrasn f‑iguya‑nġ aylliġ lkmn lɛyub‑nġ ignna.

⁷ nʷh̬šn dik zġ‑uwssan n‑id‑babatnġ sul s‑ġassad. f‑ssibt n‑iskkirn‑nġ ʷh̬šnnin a‑f‑nḍr nkkʷni d‑igldan‑nġ d‑imsakmurn‑nġ ġ‑ufus n‑igldan n‑tmizar yaḍni. tsllmt‑aġ i‑uwzzal d‑ukuf d‑tmh̬h̬art d‑tdallit išqan sul s‑ġassad.

⁸ imma ġilad tizi idrusn ayd‑ginġ‑tskrt afulki a‑rbbi siditnġ, tadjt kra ginġ a‑iqama, tgt‑aġ‑n yat‑tgust izgan ġ‑udġar‑nk amẓlay, tisfiwt i‑walln‑nġ a‑rbbi‑nġ, trart‑aġ‑d imikk n‑rrja ġ‑uwssan n‑tsumgit‑nġ.

⁹ ašku ha‑yaġ ismgan a‑nga, walaynni ur‑aġ‑tflt a‑rbbi‑nġ ġ‑tsmugit‑nġ. tssbayynt‑aġ‑d lḥnant‑nk izgan ġ‑umnid n‑igldan n‑faras, trart‑aġ‑d imikk n‑rrja baš a‑nbnu tigmmi n‑rbbi‑nġ, nṣlaḥ ula ih̬rubba‑ns, tgt‑aġ antal ġ‑wakal n‑yahuda d‑urušalim.

¹⁰ «imma ġilad a‑rbbi‑nġ, ma‑ra‑nini f‑ġayd darnġ illan? ha‑yaġ nfl luṣiyat

¹¹ lli‑s‑tuṣṣat mddn‑nk f‑imi n‑ih̬ddamn‑nk lanbiya tinit: ‹akal lli‑s‑ra‑tkšmm a‑ti‑teṭṭafm, han akal indsn a‑iga s‑nndast n‑iqbiln s‑iskkirn‑nsn jlh̬nin lli‑t‑iɛmmrn s‑tjlh̬it‑nsn zġ‑ttmi ar ttmi yaḍni.

¹² a‑ur‑takkam istitun i‑tarwa‑nsn, wala da‑di‑ttawim istitsn i‑tarwa‑nun, wala da‑ttirim sslamt‑nsn ula lh̬ir‑nsn. ġmkan a‑s‑ra‑tzaydm ar‑ttdusm ar‑tšttam ġ‑tmih̬ar n‑wakal, tflm‑t‑id ilmma i‑tarwa‑nun ad‑asn‑ig lwrt idumn.›

¹³ «imma ġilad ġ‑aġ‑ijra kullu ġayd išqan f‑ssibt n‑iskkirn‑nġ ʷh̬šnnin ula lɛyub‑nġ da‑iggutn, hati ur‑aġ‑tɛaqbt a‑rbbi‑nġ f‑unšk lli‑sthllant lh̬ʷšanat‑nġ. tudjt sul ġwid ginġ iqaman.

¹⁴ is‑a‑nzayd ar‑nrẓẓa luṣiyat‑nk, ar‑ntettahal d‑iqbiln‑ad lli‑itsalan iskkirn‑an jlh̬nin? is‑ur‑ra‑fllanġ‑tġḍbt tfnut‑aġ, a‑ur‑ginġ‑iqama yan ula injm yan?

¹⁵ wa rbbi da‑illan, wa rbbi n‑israyil, kiyi a‑igan wad itḥkamn s‑lḥqq, ašku ha‑yaġ ġassad ur‑ngi abla willi‑d‑iqaman njmn, d‑nkkʷni nʷh̬šn bahra ġ‑iẓri‑nk. ur‑ginġ yan iẓḍarn a‑n‑ibidd ġ‑umnid‑nk f‑ssibt n‑ġayd nskr.»