ɛazra 7 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

yiwn‑d‑uktatbi ɛazra s‑urušalim

¹ tigira n‑mayan ġ‑uwssan n‑artaḥšašta agllid n‑faras, illa yan‑urgaz ism‑ns ɛazra yus n‑sarayah lli‑igan yus n‑ɛzaryah lli‑igan yus n‑ḥilqiyah

² lli‑igan yus n‑šallum lli‑igan yus n‑ṣaduq lli‑igan yus n‑aḥiṭub

³ lli‑igan yus n‑amaryah lli‑igan yus n‑ɛzaryah lli‑igan yus n‑marayut

⁴ lli‑igan yus n‑zaraḥyah lli‑igan yus n‑ɛuzzi lli‑igan yus n‑buqqi

⁵ lli‑igan yus n‑abišuɛ lli‑igan yus n‑finḥas lli‑igan yus n‑aliɛazr lli‑igan yus n‑harun lli‑igan anmġur n‑imsakmurn.

⁶ ġ‑uwssan‑an a‑d‑yiwn ɛazra zġ‑babil. ig nttan aktatbi iḥaršn ġ‑ulmmud n‑musa lli‑d‑imla sidi rbbi n‑israyil. ifka‑yas‑ugllid kullu ma‑zġ‑gis‑iḍalb, ašku illa‑dids‑ufus n‑rbbi sidis.

⁷ awnn‑d dids kra n‑mddn n‑ayt‑israyil d‑kra n‑imsakmurn d‑ayt‑lawi d‑inḍḍamn d‑waḍafn d‑ih̬ddamn ġ‑usggʷas wis ssa n‑tgldit n‑artaḥšašta.

⁸ ilkm‑d urušalim ġ‑wayyur wis smmus ġ‑usggʷas wis ssa n‑tgldit.

⁹ ass amzwaru n‑wayyur amzwaru a‑d‑iffuġ zġ‑babil a‑imuddu, ilkm‑d urušalim ġ‑wass amzwaru n‑wayyur wis smmus, ašku illa‑dids‑ufus ifulkin n‑rbbi‑ns.

¹⁰ ašku ɛazra, hati izzga ul‑ns a‑itlmad ma‑ityaran ġ‑ulmmud n‑sidi rbbi ar‑bdda‑srs‑iskar, ar‑ilmma‑isslmad tinbaḍin d‑lḥkamat n‑sidi rbbi i‑ayt‑israyil.