ɛazra 6 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lamr n‑daryus agllid n‑faras

¹ yuṣṣa‑ugllid daryus mddn‑ns ad‑siggiln ġakudan ġ‑uḥanu n‑warratn ġ‑lh̬zin n‑babil.

² afn ilmma yan‑warra ġ‑lqṣr n‑aḥmata ġ‑tmazirt n‑maday, tyaran gis iwaliwn‑ad: «arra f‑iskkirn.

³ asggʷas amzwaru ġ‑tgldit n‑kuraš, issufġ‑d‑ugllid lamr f‑tgmmi n‑rbbi ġ‑urušalim yini: ‹a‑ttbnu‑tgmmi d‑udġar lli‑ġ‑a‑qqrṣn i‑tġrṣiw f‑llsas‑ns iṣḥan. a‑tɛlu s‑kraḍ id‑mraw (30) n‑mitru, tusɛu s‑unškan,

⁴ ilin iẓran mqqurnin, ittrs yan f‑wayya ar wis kraḍ, ad‑kullu‑sutln i‑kkuẓṭ‑tsgiw‑ns, yili‑wabya n‑ukššuḍ f‑iggi‑nsn. a‑ittfru‑watig‑ns zġ‑ṣṣnduq n‑ugllid.

⁵ ad‑wrrin ula irukutn n‑uwrġ d‑nnʷqrt n‑tgmmi n‑rbbi lli‑d‑yusi nabuh̬adnaṣr zġ‑tgmmi‑an tamẓlayt ġ‑urušalim yawi‑tn‑d s‑babil. a‑n‑ittrs kraygatt aruku ġ‑udġar‑ns ġ‑tgmmi tamẓlayt ġ‑urušalim. srsat‑tn‑in ġ‑tgmmi n‑rbbi.› »

⁶ yara ilmma daryus yini: «i‑tattnay lḥakm n‑tsga yaḍni n‑wasif, d‑šatar‑buznay d‑usmun‑nsn n‑lḥukkam ġ‑tsga yaḍni n‑wasif. aggugat fllasn,

⁷ tflm tawuri‑an n‑tgmmi n‑rbbi a‑tzayd, tadjm lḥakm n‑uwdayn d‑imġarn‑nsn ad‑bnnun tigmmi‑an n‑rbbi ġ‑udġar‑ns.

⁸ ha lamr‑inu mamnk a‑ra‑tɛawnm imġarn‑an n‑uwdayn ġ‑tbnnayt n‑tgmmi‑an n‑rbbi. ra‑tfrrum atig‑ns i‑mddn‑an zġ‑ḍḍabiyt n‑ugllid lli‑ikššmn ġ‑tsga‑yan yaḍni n‑wasif. a‑ur‑fllas‑tmaṭlm wala tšḥam fllas.

⁹ akkayat‑asn aynna‑f‑lkmn ġ‑izgarn d‑izamarn d‑ilqqaġn a‑tn‑ssattuyn s‑dar rbbi n‑ignwan, nġd irdn d‑tisnt d‑waman n‑waḍil d‑zzit nna‑ran imsakmurn ġ‑urušalim. akkayat‑asn ass f‑wass, d‑a‑ur‑fllasn‑tšḥum,

¹⁰ baš ad‑zaydn ar‑n‑ssakmurn ma‑isshnnun rbbi n‑ignwan, ar‑ti‑tḍalabn a‑izziġzif tudrt n‑ugllid d‑tarwa‑ns.

¹¹ amrġ daġ, iġ‑idda yan ard ibddl lamr‑ad, rad‑as‑d‑ityawkkas yan‑usatur zġ‑tgmmi‑ns ityagal gis, th̬lu‑tgmmi‑ns tg amdduz.

¹² ġilad a‑inkr rbbi lli‑igan ism‑ns f‑udġar‑an, a‑ihlk agllid nġd aqbil nna‑iskrn f‑a‑ibddl lamr‑ad nġd a‑ih̬lu tigmmi‑an n‑rbbi ġ‑urušalim. nkki daryus ayd issufġn lamr‑ad. skrat srs, a‑ur‑tmaṭlm.»

kmmln tabnnayt n‑tgmmi n‑rbbi

¹³ iddu tattnay lḥakm n‑tsga yaḍni n‑wasif ġakudan, ntta d‑šatar‑buznay d‑usmun‑nsn, skrn s‑wawal lli‑asn‑d‑yuzn‑ugllid daryus, ur‑maṭln.

¹⁴ ġmkan a‑s‑zuydn imġarn n‑uwdayn ar‑bnnun, ġmklli‑tn‑izzɛam nnabi ḥaggay d‑nnabi zakaryah yus n‑ɛiddu. kmmln tabnnayt s‑lamr n‑rbbi n‑israyil d‑win kuraš d‑daryus d‑artaḥšašta igldan n‑faras.

¹⁵ kmmln tabnnayt n‑tgmmi tamẓlayt ġ‑usggʷas wis sḍis n‑tgldit n‑ugllid daryus, ġ‑wis kraḍ‑uwssan ġ‑wayyur ‹adar›.

¹⁶ zaydn mddn n‑ayt‑israyil ġakudan, munn‑d imsakmurn d‑ayt‑lawi d‑imsukfn yaḍni, a‑n‑srsn tigmmi‑an ġ‑gr ifassn n‑rbbi s‑lfrḥ iggutn.

¹⁷ lliġ‑n‑srsn tigmmi‑an ġ‑gr ifassn n‑rbbi, ssakmurn‑as‑n gis miyya n‑umugay d‑sin id‑miyya (200) n‑izimmr d‑kkuẓ id‑miyya (400) n‑ulqqaġ. ssakmurn‑in ula sin d‑mraw (12) n‑ubukir ad‑gn ‹asakmur f‑tjli› f‑unšk lli‑gant‑tqbilin n‑ayt‑israyil.

¹⁸ ttbḍun ilmma imsakmurn f‑trubba‑nsn, ttbḍun ula ayt‑lawi f‑trubba‑nsn, f‑ad‑tlhun s‑twuri n‑rbbi ġ‑urušalim, ġmklli ityaran ġ‑warra n‑musa.

skrn lɛid n‑usurf

¹⁹ izri ma‑izrin iruḥ‑wass wis kkuẓ d‑mraw (14) ġ‑wayyur amzwaru, nkrn tarwa n‑imsukfn, skrn f‑lɛid n‑usurf.

²⁰ nkrn imsakmurn d‑ayt‑lawi ssġusn ih̬fawn‑nsn aylliġ kullu ġusn. ġakudan ad‑ġrṣn i‑ilqqaġn n‑usurf f‑ssibt n‑kullu tarwa n‑imsukfn ula f‑imsakmurn ula f‑ih̬f‑nsn,

²¹ ššn gis mddn n‑ayt‑israyil lli‑d‑iwrrin zġ‑uskrf [n‑babil]. ššn didsn ula kullu ayt‑usmun‑nsn lli‑iẓlin ih̬fawn‑nsn zġ‑nndast n‑iqbiln iġribn, irin a‑tqasan rbbi da‑illan ig rbbi n‑israyil.

²² zzrin lɛid n‑urh̬ṣiṣ s‑lfrḥ ssa n‑uwssan, ašku issfrḥ‑tn sidi rbbi lli‑d‑issgrawln ul n‑ugllid n‑aššur s‑darsn, aylliġ‑tn‑iɛawn ġ‑twuri n‑tgmmi n‑rbbi, a‑t‑igan d‑rbbi n‑israyil.