ɛazra 4 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tanuwwašt n‑iġribn

¹ lliġ sfldn inuwwašn n‑ayt‑yahuda d‑ayt‑bnyamin is‑gran tarwa n‑imsukfn ar‑bnnun yat‑tgmmi tamẓlayt i‑sidi rbbi n‑israyil,

² ddun s‑dar zarubbabil d‑ih̬fawn n‑tagʷmatin inin‑asn: «adjat‑aġ a‑didun‑nbnnu, ašku ula nkkʷni ar‑ntẓalla i‑rbbi‑nun ar‑fllas‑nqqrṣ zġ‑uwssan n‑asarḥaddun agllid n‑aššur lli‑aġ‑d‑yiwin s‑ġid.»

³ irar‑asn zarubbabil d‑yahušaɛ d‑ih̬fawn n‑tagʷmatin n‑ayt‑israyil: «ur‑illi yat ġ‑gratnġ didun ġ‑tbnnayt n‑yat‑tgmmi i‑rbbi‑nġ. nkkʷni waḥduyaġ a‑ra‑stt‑ibnu i‑sidi rbbi n‑israyil, ġmklli‑aġ‑yuṣṣa kuraš agllid n‑faras.»

⁴ ddun ilmma mddn‑an iġribn ar‑zzʷgraẓn ayt‑yahuda, ar‑tn‑ssiwidn baš ad‑ssbiddn tabnnayt.

⁵ krun‑d fllasn kra n‑imšawarn mad‑asn‑iteṭln f‑maylli qṣadn. zaydn ġmkan kullu ussan n‑kuraš agllid n‑faras ar ussan n‑daryus agllid n‑faras.

⁶ aran ula i‑ugllid aḥašwiruš, ġ‑isizwur n‑tgldit‑ns, ar‑taštkkan s‑imzdġn n‑yahuda d‑urušalim.

⁷ ula ġ‑uwssan n‑artaḥšašta agllid n‑faras, inkr bišlam d‑mitradat d‑ṭabil d‑usmun‑nsn, aznn ula ntni yat‑tbrat i‑ugllid, ttyara s‑iwaliwn d‑id‑lif n‑ayt‑aram.

⁸ yara ula lḥakm raḥum d‑uktatbi šimšay yat‑tbrat i‑ugllid artaḥšašta, ar‑gis‑taštkkan s‑ayt‑urušalim inin:

⁹ «f‑ufus n‑lḥakm raḥum d‑uktatbi šimšay d‑usmun‑nsn ġ‑lquḍat d‑lḥukkam d‑inmġurn d‑ih̬fawn n‑ayt‑faras d‑ayt‑arak d‑ayt‑babil d‑ayt‑šuša da‑igan ayt‑ɛalam

¹⁰ d‑kullu wiyyaḍ ġ‑iqbiln lli‑d‑yiwi‑ugllid imqqurn ihiyyan asnabbar, izzdġ‑tn ġ‑tmdinin n‑samira d‑tmazirt‑ad kullutt lli‑illan ġ‑tsga yaḍni n‑wasif [n‑furat].»

¹¹ ha ma‑ityaran ġ‑tbrat lli‑uznn: «i‑ugllid artaḥšašta zġ‑ih̬ddamn‑nk n‑ayt‑tmazirt ġ‑tsga yaḍni n‑wasif.

¹² a‑ityawssan ġilad ġ‑dark ay‑agllid, f‑uwdayn lli‑d‑yuškan zġ‑dark s‑darnġ, hatni munn ġ‑urušalim ar‑daġ‑bnnun tamdint‑an yʷh̬šnn iɛṣan, ar‑zzgan agadir‑ns ar‑tṣlaḥn llsas‑ns.

¹³ a‑iɛlm‑ugllid ġilad, iġ‑ttbna‑tmdint‑ad ikmml‑ugadir‑ns, ur‑sul‑rad‑akkan imzdġn‑ns ḍḍabiyt ula nnkkas ula tafriṭṭ. ra‑yidras ilmma ma‑d‑ikššmn s‑ṣṣnduq n‑ugllid.

¹⁴ nkkʷni‑ad išrkn ġ‑tisnt n‑ugllid, ur‑iɛdil a‑ntmnad ma‑k‑iḍrran. mayan a‑f‑ak‑n‑nuzn nɛlm‑k‑in ay‑agllid,

¹⁵ baš a‑tsigglt ġ‑warra n‑iskkirn n‑id‑babak. ra‑n‑taft tamdint‑ad ġ‑warra n‑iskkirn, tissant izd tamdint iɛṣan a‑tga, ar‑tt‑ssduyyn imzdġn‑ns zġ‑zman, ar‑ttḍrru igldan yaḍni d‑tmizar yaḍni. ġayan a‑f‑twrri‑tmdint‑ad th̬ʷla.

¹⁶ nɛlm‑k ġilad ay‑agllid, iġ‑tdda‑tmdint‑ad ard daġ ttbnu ikmml‑ugadir‑ns, ur‑sul‑ra‑tḥkamt kiyi f‑wakal‑ad ġ‑tsga‑yad yaḍni n‑wasif.»

agllid n‑faras issbidd tabnnayt

¹⁷ yazn‑d‑ugllid awal irar‑asn: «i‑lḥakm raḥum d‑uktatbi šimšay d‑usmun‑nsn lli‑izdġn ġ‑samira d‑tmazirt n‑tsga yaḍni n‑wasif, ad‑awn‑tili sslamt.

¹⁸ tabrat lli‑aġ‑di‑tuznm, hati ttyawġra ġ‑umnid‑inu, fhmġ ma‑gis‑illan.

¹⁹ uṣṣaġ mddn‑inu ad‑siggln. hati ufan izd zġ‑zman ar‑nkkrn ayt‑tmdint‑an s‑igldan, ar‑ssnkarn timiġt d‑ssibt.

²⁰ afn‑in is‑ttin‑kkan igldan tjhhdnin ġ‑urušalim ar‑tḥkamn f‑kullu tamazirt‑an lli‑illan ġ‑tsga‑yan yaḍni n‑wasif, ar‑zġ‑gis‑tamẓn ḍḍabiyt d‑nnkkas d‑tfriṭṭ.

²¹ ġilad amrat mddn‑an ad‑ssbiddn tawuri‑an, a‑ur‑ttbnu‑tmdint‑an abla s‑wawal‑inu.

²² rarat lɛaql a‑ur‑tmaṭlm f‑lamr‑ad, a‑ur‑imil izayd kra itḍrrun ma‑igan win‑ugllid.»

²³ raḥum d‑uktatbi šimšay d‑usmun‑nsn, lliġ fllasn ttyawġra‑tbrat‑an zġ‑ugllid artaḥšašta, ḥarrun ddun s‑dar‑uwdayn ġ‑urušalim, ssbiddn‑tn f‑twuri s‑ifaddn ula s‑uwzzal.

²⁴ ġakudan a‑tbidd‑tbnnayt n‑tgmmi n‑rbbi ġ‑urušalim. tbidd ar asggʷas wis sin ġ‑tgldit n‑daryus agllid n‑faras.