ɛazra 3 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tabnnayt n‑ukrkur n‑tġrṣi

¹ lliġ ilkm‑wayyur wis ssa, ilin mddn n‑ayt‑israyil ġ‑tmdinin‑nsn, munn‑d kullu ġakudan ġ‑urušalim.

² inkr yahušaɛ yus n‑yuṣadaq, ntta d‑imsakmurn yaḍni, d‑zarubbabil yus n‑šyaltyal d‑ayt‑dars, bnun akrkur n‑tġrṣi i‑rbbi n‑israyil, baš a‑n‑fllas‑ssattuyn isakmurn jdrnin, ġmklli ityaran ġ‑ulmmud n‑musa ah̬ddam n‑rbbi.

³ wah̬h̬a ksuḍn zġ‑ayt‑tmizar lli‑asn‑isutln, skrn akrkur‑an ġ‑udġar‑ns, ssattuyn fllas isakmurn jdrnin i‑sidi rbbi. kraygatt ass zikk ṣbaḥ ula tadggʷat ar‑fllas‑ssattuyn isakmurn jdrnin.

⁴ zzrin lɛid n‑iḥšaš ġmklli ityaran, s‑isakmurn jdrnin ass f‑wass s‑unšk lli‑tga‑tnbaṭṭ n‑uwssan‑an.

⁵ zaydn ilmma s‑isakmurn jdrnin n‑kraygatt ass, d‑win ih̬f n‑iyrn d‑win‑uwssan n‑lɛyad n‑sidi rbbi, ula s‑twafkiw yaḍni lli‑akkan mddn i‑sidi rbbi.

⁶ zġ‑wass‑an amzwaru ġ‑wayyur wis ssa, ar‑n‑ssattuyn isakmurn jdrnin i‑sidi rbbi. imma tigmmi tamẓlayt n‑sidi rbbi, ur‑ta‑yasstwa llsas‑ns.

⁷ fkn ilmma iqaridn i‑ih̬ddamn n‑uẓru d‑ukššuḍ. fkn ula amššu d‑tissi d‑zzit i‑ayt‑ṣidun d‑ayt‑ṣur, baš ad‑di‑tawin akššuḍ n‑idgl f‑umda zġ‑lubnan ar lmrsa n‑yafa, s‑mklli‑f‑tn‑yuṣṣa kuraš agllid n‑faras.

tabnnayt n‑tgmmi tamẓlayt

⁸ asggʷas wis sin tigira n‑ma‑d‑lkmn s‑udġar n‑tgmmi n‑sidi rbbi ġ‑urušalim, ġ‑wayyur wis sin, a‑igra zarubbabil yus n‑šyaltyal ġ‑tbnnayt, ntta d‑yahušaɛ yus n‑yuṣadaq d‑willi iqaman ġ‑aytmatsn, d‑imsakmurn d‑ayt‑lawi d‑willi‑d‑kullu‑yuškan zġ‑uskrf [n‑babil] s‑urušalim. ẓlin zġ‑ayt‑lawi willi dar sin id‑mraw n‑usggʷas s‑uflla, ad‑gabln tabnnayt n‑tgmmi n‑sidi rbbi.

⁹ ġmkan a‑s‑iwrri yahušaɛ d‑tarwa‑ns d‑aytmas, ula qadmiyal d‑tarwa‑ns zġ‑wamud n‑hudadyah, ar‑kullu‑tgabaln willi ibnnun tigmmi n‑rbbi. ɛawnn‑tn tarwa n‑ḥinadad d‑wiyyaḍ ġ‑tarwa‑nsn d‑aytmatsn lli‑igan zġ‑ayt‑lawi.

¹⁰ lliġ ssasstwan ibnnayn llsas n‑tgmmi n‑sidi rbbi, aškin‑d imsakmurn s‑tmlsa‑nsn, biddn ġ‑udġar‑nsn ar‑ṣwaḍn nnffarat, biddn ayt‑lawi lli‑igan tarwa n‑asaf ar‑kkatn iqrqawn. ar‑kullu‑tmjjadn sidi rbbi ġmklli‑sttin‑ikka yuṣṣa dawd agllid n‑israyil.

¹¹ ar‑ttirirn ar‑tmjawabn ar‑ttalġn sidi rbbi ar‑ti‑tškarn ar‑ttinin: «ašku nttan a‑ifulkin, ar‑bdda‑iskar i‑ayt‑israyil s‑lḥnant‑ns izgan.» alln kullu wiyyaḍ awal‑nsn ar‑ttalġn sidi rbbi s‑tġuyit itjhhdn, ašku yasstwa llsas n‑tgmmi n‑sidi rbbi.

¹² walaynni ifqqirn ġ‑imsakmurn d‑ayt‑lawi d‑ih̬fawn n‑tagʷmatin lli‑sttin‑ikkan ẓran tigmmi tamzwarut, iggut gisn ma‑yallan ar‑nddrn, lliġ ẓran llsas n‑tgmmi‑ad n‑ljdid yasstwa. imma wiyyaḍ ar‑kullu‑kkatn s‑tġuya n‑lfrḥ,

¹³ aylliġ ur‑ẓḍarn mddn ad‑ẓlin tiġuya n‑taḍṣa zġ‑tin imṭṭawn. ašku ar‑kkatn s‑tġuya tjhhdnin aylliġ‑n‑sfldn mddn ġ‑tuggugt i‑ijjij‑an.