ɛazra 10 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

isawl ɛazra s‑ayt‑yahuda

¹ sul a‑itẓalla ɛazra ar‑itqrra ar‑yalla ar‑n‑iknnu ġ‑umnid n‑tgmmi n‑rbbi, s‑d‑fllas‑imun ma‑iggutn ġ‑irgazn d‑tmġarin d‑iḥšmiyn n‑ayt‑israyil, ašku ar‑kullu‑allan s‑imṭṭawn ḥrranin.

² isawl‑d šakanyah yus n‑yaḥyal lli‑igan zġ‑tarwa n‑ɛilam, yini i‑ɛazra: «ha‑yaġ nġḍr ġ‑gratnġ d‑rbbi‑nġ, nšškšm‑d s‑darnġ timġarin tiġribin zġ‑iqbiln n‑ddunit. walaynni illa sul rrja ġ‑israyil f‑tġawsa‑yad.

³ a‑nnkr ġilad nskr yan lɛhd ġ‑gratnġ d‑rbbi‑nġ a‑nssufġ kullu timġarin‑ad tiġribin d‑tarwa‑nsnt. ra‑nskr s‑wawal‑nk a‑sidi, kiyi ula willi bahra ituqqarn luṣiyat n‑rbbi. ra‑nskr ula s‑mklli illan ġ‑ulmmud n‑rbbi.

⁴ nkr ġilad ašku ġ‑ufus‑nk a‑ġ‑tlla‑tġawsa‑yad, d‑nkkʷni ha‑yaġ dik. g‑n tiqqi‑nk tskrt‑t.»

⁵ inkr ɛazra issgall inmġurn n‑imsakmurn d‑ayt‑lawi d‑kullu mddn‑an n‑ayt‑israyil f‑ad‑skrn ġmkan, ggalln‑as.

⁶ yitti ilmma ɛazra zġ‑umnid n‑tgmmi n‑rbbi, iddu s‑tzdġt n‑yahuḥanan yus n‑alyašib, izzri gis iḍ ur‑išši ur‑iswi, ašku ar‑inddr f‑tkndawt n‑imsukfn.

⁷ tffuġ‑ilmma‑tbrraḥt ġ‑kullu‑tmazirt n‑yahuda d‑urušalim ad‑d‑kullu‑munn imsukfn ġ‑urušalim.

⁸ amrn daġ iriyasn d‑imġarn: «wanna‑n‑imaṭln uggʷar n‑kraḍ‑uwssan ur‑d‑yuški, rad‑as‑kullu‑ittfnu‑wayda‑ns, ityawkkas ula ntta zġ‑tamunt n‑imsukfn.»

tanbaṭṭ f‑tmġarin tiġribin

⁹ ur‑ta‑zrin kraḍ‑uwssan munn‑d kullu irgazn n‑ayt‑yahuda d‑ayt‑bnyamin ġ‑urušalim. ig ass wis sin id‑mraw (20) ġ‑wayyur wis ṭẓa. gawrn kullu mddn‑an ġ‑usarag ġ‑umnid n‑tgmmi n‑rbbi, ar‑trgigiyn f‑ssibt n‑tġawsa‑yan ula f‑ssibt n‑unẓar iggutn.

¹⁰ inkr‑umsakmur ɛazra yini‑asn: «ha kunni tġḍrm sidi rbbi, ttahlm timġarin tiġribin, tzaydm bahra i‑lɛib lli‑illan ġ‑ayt‑israyil.

¹¹ qrrayat ġilad i‑rbbi sidis n‑id‑babatun, tskrm ma‑t‑irḍan, tẓlim ih̬f‑nun zġ‑iqbiln n‑ddunit ula zġ‑tmġarin tiġribin.»

¹² sawln‑d mddn‑an kullutn alln awal‑nsn inin: «iṣḥa mayd tnnit. illa fllanġ a‑t‑nskr.

¹³ walaynni ha‑tamunt‑ad tggut, ig lḥal azmz n‑inẓritn, ur‑nẓḍar a‑sul‑nbidd ġ‑brra. tamukrist‑ad ur‑ra‑tfsi ġir ġ‑yan‑wass nġd sin, ašku ha‑yaġ njla zġ‑uġaras bahra.

¹⁴ adj iriyasn‑nġ ad‑sawaln f‑ssibt n‑tamunt kullutt, tġrm ilmma i‑ayt‑tmdinin‑nġ lli‑itahln s‑tmġarin tiġribin f‑ad‑d‑aškin s‑urušalim ġ‑tizi nna‑ysn‑tmlam, ntni d‑imġarn d‑lquḍat n‑tmdint‑nsn, ard fllanġ yitti lġaḍab iqjrn n‑rbbi‑nġ f‑ssibt n‑tġawsa‑yad.»

¹⁵ awal‑an, qbln‑t kullu abla yunatan yus n‑ɛasahal d‑yaḥazyah yus n‑tiqwah, ibidd didsn mašullam d‑šabbtay lli‑igan ġ‑ayt‑lawi.

¹⁶ ġmkan nnit ad‑skarn tarwa n‑imsukfn. amsakmur ɛazra isti kra ġ‑irgazn lli‑igan ih̬fawn n‑tagʷmatin, yara ism‑nsn d‑tagʷmat lli‑zġ‑gan. ġ‑wass amzwaru ġ‑wayyur wis mraw ad‑gawrn ar‑ssnubbušn ġ‑ġaylli illan.

¹⁷ zaydn ġmkan ar ass amzwaru ġ‑wayyur amzwaru, zzrin kullu irgazn lli‑itahln timġarin tiġribin.

¹⁸ afn kra ġ‑tarwa n‑imsakmurn ula ntni tahln timġarin tiġribin, ism‑nsn maɛsiyah d‑aliɛazr d‑yarib d‑gadalyah zġ‑wamud n‑yahušaɛ yus n‑yuṣadaq d‑aytmas.

¹⁹ mšaškan‑d kullu, gn‑d afus f‑ad‑ssufġn timġarin‑nsn, yawi‑d kud yan izimmr zġ‑tuwrut a‑ig asakmur f‑lɛib‑ns.