ɛazra 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lamr n‑kuraš agllid n‑faras

¹ asggʷas amzwaru ġ‑tgldit n‑kuraš agllid n‑faras a‑ġ‑yuwfa‑wawal n‑sidi rbbi lli‑s‑inna f‑imi n‑nnabi irmiyah. idḥi sidi rbbi rruḥ n‑kuraš, aylliġ yura yan lamr, issufġ‑t s‑tgldit‑ns kullutt, yini:

² «hay‑awal n‑kuraš agllid n‑faras. kullu tiglday n‑ddunit, ifka‑yyi‑tnt rbbi da‑illan ig rbbi n‑ignwan. yuṣṣa‑yyi ġilad ad‑as‑bnuġ yat‑tgmmi ġ‑urušalim lli‑illan ġ‑wakal n‑yahuda.

³ winna illan zġ‑mddn‑ns ġ‑gratun, a‑didsn‑yili rbbi‑nsn, awnn s‑urušalim ġ‑yahuda, ad‑daġ‑bnun tigmmi n‑rbbi da‑illan ig rbbi n‑israyil, ig rbbi da‑illan ġ‑urušalim.

⁴ ula ayt‑tgldit‑inu da‑mi‑zdġn ġ‑tama‑nsn, illa fllasn ad‑ɛawnn willi gisn iqaman, fkn‑asn nnʷqrt d‑uwrġ d‑imassn d‑lbhaym, awin‑asn‑d ula tiwafkiw yaḍni i‑twuri n‑tgmmi n‑rbbi ġ‑urušalim.»

⁵ nkrn ih̬fawn n‑tagʷmatin n‑ayt‑yahuda d‑ayt‑bnyamin d‑imsakmurn d‑ayt‑lawi, kraygatt yan mi idḥi rbbi rruḥ‑ns a‑yawn s‑urušalim, ad‑daġ‑bnun tigmmi n‑sidi rbbi.

⁶ ɛawnn‑tn‑kullu‑wadjarn‑nsn s‑irukutn n‑nnʷqrt d‑uwrġ ula s‑imassn d‑lbhaym d‑tġawsiwin ġʷlanin, zaydn‑asn ula tiwafkiw yaḍni.

⁷ ula agllid kuraš issufġ‑d irukutn n‑tgmmi n‑sidi rbbi lli‑yiwi nabuh̬adnaṣr zġ‑urušalim ig‑tn‑in yadlli ġ‑tgmmi n‑id‑rbbi‑ns.

⁸ issufġ‑tn‑d kuraš agllid n‑faras f‑ufus n‑mitradat bu‑lh̬zin, iḥasb‑tn nttan i‑šišbaṣṣar lli‑igan amġar n‑ayt‑yahuda.

⁹ ġmkad ad‑gan irukutn‑an: kraṭṭ id‑mrawt (30) n‑tkint n‑uwrġ, d‑walf (1000) n‑tkint n‑nnʷqrt, d‑sin id‑mraw d‑ṭẓa (29) n‑uruku n‑lbh̬ur,

¹⁰ d‑kraṭṭ id‑mrawt (30) n‑taṭṭast n‑uwrġ, d‑kkuẓṭ id‑miyya d‑mrawt (410) n‑taṭṭast n‑nnʷqrt, d‑walf (1000) n‑uruku yaḍni.

¹¹ smmus id‑walf d‑kkuẓ n‑id‑miyya (5400) ad‑gan kullu irukutn‑an n‑uwrġ d‑nnʷqrt. issawn‑tn ilmma šišbaṣṣar zġ‑babil s‑urušalim, ġakud lliġ‑d‑iwnn imsukfn.