ɛamus 3 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

sidi rbbi isqsa mddn‑ns

¹ sfldayt ay‑ayt‑israyil s‑wawal‑ad‑s‑kʷn‑d‑iẓi rbbi da‑bdda‑illan. yini‑t‑id i‑kullu aqbil lli‑d‑issiwn zġ‑wakal n‑miṣr:

² «kunni waḥdukʷn ad‑ẓliġ zġ‑gr iqbiln n‑ddunit kullutt. mayan a‑f‑ra‑kʷn‑ɛaqbġ f‑kullu tijli‑nun.»

³ is‑a‑ifttu yan d‑wayya iġ‑ur‑d‑mšaškan i‑ngratsn?

⁴ is‑a‑issunggu izm ġ‑tagant iġ‑ur‑yufi tagʷmrt? is‑a‑inddr yus n‑tizmt ġ‑ifri iġ‑ur‑yumẓ kra?

⁵ is‑ra‑n‑iḍr‑ugḍiḍ ġ‑tẓqqurt f‑wakal iġ‑ur‑as‑tt‑imdi yan? is‑ra‑tnkr‑tẓqqurt zġ‑wakal iġ‑ur‑tumẓ kra?

⁶ is‑a‑ikkat nnffar n‑imiġ ġ‑tmdint bla da‑tiksaḍn imzdġn‑ns? is‑a‑ttgguz kra n‑tagat f‑tmdint iġ‑ur‑tt‑iqṣad sidi rbbi?

⁷ ašku rbbi siditnġ ur‑a‑iskar kra ard iml maylli gis iqṣad i‑ih̬ddamn‑ns lanbiya.

⁸ han iġ‑issungg izm, manwa ur‑ra‑yiksaḍ? isawl‑d rbbi siditnġ, manwa ur‑ra‑itbrraḥ s‑maylli‑as‑d‑imla?