danyal 9 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

taẓallit n‑danyal f‑mddn‑ns

¹ ttyawfka‑tgldit n‑kaldan [babil] i‑ugllid daryus yus n‑aḥašwiruš lli‑igan zġ‑ayt‑maday.

² asggʷas izwarn n‑tgldit‑ns, nkki danyal ssnġ zġ‑warratn, mnnaw isggʷasn n‑tdallit a‑ra‑izri f‑urušalim, ġmklli‑s‑inna sidi rbbi i‑nnabi irmiyah. gan ssa n‑id‑mraw (70) n‑usggʷas.

³ rarġ udm‑inu ġakudan s‑sidi rbbi‑nu ar‑t‑siggilġ, ar‑tḍalabġ rrḥmt‑ns s‑tẓulla d‑uẓum, lsġ lh̬iš i‑ddat‑inu, ssikfsġ iġd f‑ih̬f‑inu.

⁴ ẓẓallġ i‑sidi rbbi‑nu alġġ‑t iniġ: «wa sidi rbbi‑nu imqqurn issiwidn, wa rbbi lli‑bdda‑issuwfan lɛhd ula tayri idumn i‑willi dar tɛzzat awin‑tt bdda ġ‑luṣiyat‑nk,

⁵ ha‑yaġ njla bahra. nskr ma‑yʷh̬šnn, nskr ma‑ihršn, nɛṣu‑k bahra. nanf i‑luṣiyat‑nk d‑lḥkam‑nk.

⁶ ur‑nsfld s‑ih̬ddamn‑nk lanbiya lli‑isawaln s‑ism‑nk i‑igldan‑nġ d‑iriyasn‑nġ d‑imzwura‑nġ lli‑zrinin d‑mddn n‑tmazirt‑nġ kullutn.

⁷ kiyi a‑igan wad iṣlaḥn a‑siditnġ. imma nkkʷni, lḥšmat a‑idln udmawn‑nġ sul s‑ġassad, nkkʷnin ayt‑yahuda d‑ayt‑urušalim d‑ayt‑israyil kullutn, wida akmurnin ula wida‑n‑aggugnin ġ‑tmizar lli‑s‑tn‑tssuktt f‑ssibt n‑tkndawt lli‑s‑a‑ki‑tknadn.

⁸ dlnt lḥšmat udmawn‑nġ a‑siditnġ, nkkʷni d‑igldan‑nġ d‑iriyasn‑nġ d‑imzwura‑nġ lli‑zrinin, ašku nʷh̬šn dik bahra.

⁹ wa rbbi siditnġ, kiyi a‑igan wad itrḥamn itṣamaḥn, wah̬h̬a‑k‑nɛṣa nkkʷni.

¹⁰ ur‑a‑nsflid s‑wawal n‑rbbi siditnġ, ula da‑nskar s‑tnbaḍin‑nk lli‑aġ‑di‑tssbayynt f‑imi n‑ih̬ddamn‑nk lanbiya.

¹¹ han kullu ayt‑israyil ffuġn zġ‑ulmmud‑nk, anfn i‑uġaras‑nk, agʷin ad‑sflidn s‑wawal‑nk. «ġilad tgguz‑d fllanġ tagat ula h̬ziyt lli‑tyaranin ġ‑ulmmud n‑musa ah̬ddam n‑rbbi, ašku nʷh̬šn srk bahra.

¹² hati tssuwfit iwaliwn lli‑s‑aġ‑tẓit nkkʷni d‑iriyasn lli‑darnġ‑tḥkamnin, tutt‑aġ‑d s‑tagat bahra išqan. ašku ur‑jji‑ijri zund ġayan ġ‑ddunit kullutt, ġmklli ijran i‑urušalim.

¹³ kullu tagat‑ad fllanġ ittutn, tga ġmklli ityaran ġ‑ulmmud n‑musa. wah̬h̬a ġayan ha‑yaġ sul s‑ġilad ur‑nḍalb rrḍa‑nk a‑rbbi siditnġ, ula nwrri‑d zġ‑ddnub‑nġ, ula niwi‑tt ġ‑wawal‑nk lli‑igan lḥqq.

¹⁴ ġayan a‑sidi rbbi a‑f‑fllanġ‑tqṣadt tagat, tzzugzt‑stt‑id fllanġ. ašku tgit wad iṣlaḥn a‑rbbi siditnġ ġ‑kullu ma‑tskart. imma nkkʷni nagʷi a‑nsflid s‑wawal‑nk.

¹⁵ «wa rbbi siditnġ, kiyi a‑d‑issufġn mddn‑nk zġ‑wakal n‑miṣr s‑ufus itjhhdn, aylliġ iwrri ityawssan ism‑nk bahra sul s‑ġassad. ha‑yaġ ġilad njla nskr ma‑yʷh̬šnn bahra.

¹⁶ walaynni ġmklli tgit wad iskarn ma‑iṣlaḥn, ḍalbġ‑ak a‑siditnġ a‑tssanft lġaḍab‑nk d‑iriyn‑nk f‑urušalim lli‑igan tamdint‑nk f‑uwrir‑nk amẓlay. ašku hati ġilad twrri urušalim tga lɛar, nttat ula mddn‑nk, ġ‑gr kullu willi‑aġ‑isutln, f‑ssibt n‑tjli‑nġ ula ddnub n‑lajdud‑nġ.

¹⁷ «ġilad a‑rbbi‑nġ, sfld i‑tẓallit n‑uh̬ddam‑nk ġmklli‑k‑tḍalabġ ad‑aġ‑di‑trḥmt. f‑luqr n‑ism‑nk a‑siditnġ, adj udm‑nk a‑yisfiw ġ‑tgmmi‑nk ih̬ʷlan.

¹⁸ wa rbbi‑nu, rar‑d amẓẓuġ‑nk tsfldt. rẓm‑d alln‑nk tẓrt mamnk a‑nh̬ʷla nkkʷni ula tamdint lli‑ityawssann s‑ism‑nk. ašku urd f‑ssibt n‑kra n‑ufulki ginġ illan, walaynni f‑ssibt n‑rrḥmt‑nk lli‑iggutn a‑f‑a‑zġ‑gik‑ntḍalab.

¹⁹ wa siditnġ, sfld‑aġ. wa siditnġ, ṣamḥ‑aġ. wa siditnġ, awi‑tt ginġ tɛawnt‑aġ. f‑luqr n‑ism‑nk a‑rbbi‑nu, a‑ur‑n‑tmaṭlt. ašku f‑ism‑nk a‑f‑ttyawssan‑tmdint‑nk ula mddn‑nk.»

awal n‑jibrayyil f‑ma‑ra‑yili

²⁰ ġmkan a‑s‑a‑sawalġ ar‑tẓallaġ, ar‑tqrraġ s‑ddnub‑inu d‑win mddn‑inu n‑ayt‑israyil, ar‑tḍalabġ sidi rbbi‑nu ula f‑ssibt n‑uwrir‑ns amẓlay.

²¹ sul a‑sawalġ ar‑tẓallaġ s‑had flla yan ġ‑ssift n‑urgaz. iga jibrayyil lli‑yad‑iyi‑d‑ibann ġ‑twaẓrit. iḥarru‑d yayll‑d s‑dari ġ‑tasaɛt n‑usakmur n‑tdggʷat.

²² isawl‑iyi‑d issfhm‑iyi yini: «wa danyal, ha‑yyi ffuġġ‑d ad‑ak‑fkġ tafhimt, mlġ‑ak lmɛni.

²³ ġakud lliġ tbdit ar‑tḍalabt rrḥmt, a‑d‑iffuġ‑wawal. aškiġ‑d ad‑ak‑t‑iniġ, ašku tɛzzat bahra. swangm ġilad ġ‑wawal s‑tfhmt tawaẓrit.

²⁴ yura [sidi rbbi] kkuẓ id‑miyya d‑tẓa n‑id‑mraw (490) [n‑usggʷas] f‑mddn‑nk ula tamdint‑nk tamẓlayt, ard iḥṣar takndawt‑nsn, isstmmu tijli‑nsn, idl ddnub‑nsn, izzga afulki da‑bdda‑idumn, irgl iwaliwn n‑lanbiya d‑tiwuẓra‑nsn, iẓẓġur walli igan amẓlay n‑imẓlayn.

²⁵ «sfld i‑mayad tfhmt‑t. zġ‑lliġ‑d‑iffuġ‑wawal lli‑yuṣṣan mddn ad‑wrrin bnun urušalim, ard‑d‑yašk‑umẓġur lli‑ra‑iḥkam, rad‑zrin kkuẓ id‑mraw d‑tẓa (49) [n‑usggʷas]. wah̬h̬a bahra šqan‑uwssan‑an, ra‑ttbnu‑tmdint s‑iswak d‑igudar ard zrin kkuẓ id‑miyya d‑kraḍ id‑mraw d‑kkuẓ (434) [n‑usggʷas].

²⁶ tigira n‑kkuẓ id‑miyya d‑kraḍ id‑mraw d‑kkuẓ (434) [n‑usggʷas], ra‑ityawbbay‑umẓġur bla yat. munn‑d ilmma ikabarn n‑uriyas lli‑ra‑d‑yašk, hlkn tamdint ula tigmmi tamẓlayt. ġakudan a‑ra‑d‑iruḥ isiggʷra zund anggay, izayd imiġ ar isiggʷra ašku ityara fllas lhalak.

²⁷ ra‑iskr yan lɛhd izgan d‑mddn ggutnin f‑ssa [n‑isggʷasn]. izri mnaṣṣ n‑ssa‑yan, imnɛ tiġrṣiw jdrnin d‑isakmurn kullutn a‑ur‑sul‑ilin. issbidd‑n tajlh̬it lli‑ifnnun ġ‑ugʷns n‑tgmmi tamẓlayt, ard izri lfna lli‑ityaran f‑walli ifnnun.»