danyal 7 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tawaẓrit n‑kkuẓ luḥuš mqqurnin

¹ asggʷas amzwaru n‑bilšaṣṣar agllid n‑babil, iẓra danyal yat‑twargit ula tiwuẓra ġ‑ih̬f‑ns lliġ ign ġ‑tisi, yara ġakudan maylli iwarga. ġmkad a‑tga‑tġawsa kullutt.

² yini danyal: «ẓriġ ġ‑twaẓrit n‑iyḍ kkuẓ id‑waḍu n‑ignwan ar‑ssduyyn amda imqqurn.

³ ġlin‑d ilmma kkuẓ luḥuš mqqurnin zġ‑umda, kud yan d‑mklli iga.

⁴ wad izwarn irwas izm, yili sin ifrawn zund ifrawn n‑igidr. mnadġ‑n gis s‑bbin ifrawn‑ns, ityalal f‑wakal a‑ibidd f‑sin iḍarn zund bnadm, ittfk‑as lɛaql n‑bnadm.

⁵ mnadġ‑n s‑ha wis sin n‑luḥuš, irwas ddubb. ibidd f‑iḍarn n‑tġurdin. yasi ġ‑imi‑ns kraḍ izġdisn ġ‑gr uh̬ṣan‑ns. sfldġ i‑yan‑wawal yini‑as: ‹nkr tššt tugtt n‑tfiyi.›

⁶ mnadġ‑n daġ s‑ha yan yaḍni irwas wagrzam. yili kkuẓ ifrawn f‑iggi n‑tġʷraḍ‑ns zund ifrawn n‑ugḍiḍ. luḥš‑an ila kkuẓ ih̬fawn, ittfk‑as a‑iḥkam.

⁷ «sul a‑n‑tmnadġ tiwuẓra‑yan n‑iyḍ, s‑ẓriġ yan luḥš igan wis kkuẓ, ig wad issiwidn ar‑issġuwḍ, itjhhd bahra. yili uh̬ṣan mqqurnin n‑uwzzal, ar‑issmġawas ar‑iẓẓaḍ. ar‑ilmma‑itlbaȷ̈̇ aynna iqaman s‑iḍarn‑ns. ur‑igi zund luḥuš lli‑t‑id‑zwurnin. hati iṭṭaf mraw‑waskawn.

⁸ ar‑sul‑tmnadġ ġ‑waskawn‑an, s‑d‑iġli ġ‑gratsn yan isk yaḍni imẓẓin. akufn kraḍ zġ‑waskawn imzwura ġ‑lgddam n‑isk‑an. hati isk‑an iṭṭaf alln zund tin bnadm, yili imi isawaln f‑tġawsiwin mqqurnin.

anmġur n‑zman d‑yan irwas bnadm

⁹ «lliġ a‑n‑tmnadġ, ttrsn‑d lɛruš. iskiws ilmma yan igan anmġur n‑zman ġ‑lɛrš‑ns. han timlsa‑ns mllulnt zund adfl. azzar n‑ih̬f‑ns irwas taḍut iṣfan. lɛrš‑ns iga zund ifdudda n‑lɛafiyt. rrwayḍ n‑lɛrš‑ns rwasnt isufa rġanin.

¹⁰ tffi‑d lɛafiyt zġ‑umnid‑ns zund asif ingin. ar‑ti‑tqasan alf n‑id‑walf n‑lmlayka, biddn‑wafḍ n‑wafḍan yaḍni ġ‑umnid‑ns. skiwsn kullu ayt‑lmḥkama, rẓmn ilmma arratn.

¹¹ ssmaqqlġ‑n ašku sfldġ i‑iwaliwn mqqurnin lli‑s‑a‑isawal isk‑lli. sul a‑n‑tmnadġ, s‑ityawnġa luḥš‑an, thlk ddat‑ns, ttfk a‑tjdr s‑lɛafiyt.

¹² ula luḥuš yaḍni, ityawkkas‑asn lḥukm‑nsn, walaynni ityawfka‑yasn ad‑sul‑ddrn yan‑uzmz d‑yat‑tizi.

¹³ «ẓrġ ilmma ġ‑tiwuẓra‑yan n‑iyḍ yan irwas bnadm ifta‑d ġ‑gr imdla n‑ignwan, yašk‑id s‑dar‑unmġur n‑zman, ssḥaḍrn‑t‑in s‑umnid‑ns.

¹⁴ ittfk‑as lḥkam d‑lhibt, ttfk‑as yat‑tgldit f‑a‑ti‑tqasan ayt‑tmizar d‑iqbiln d‑tqbilin da‑isawaln s‑wawal‑nsnt. lḥukm‑ns ra‑ig wad ur‑sar‑itmmin wala sar ifna. tagldit‑ns ra‑tg tad ur‑sar‑ihršn.

lmɛna n‑twaẓrit

¹⁵ «imma nkki danyal, tġufa rruḥ ġ‑ugʷns‑inu, ssiwdnt‑iyi tiwuẓra lli‑ikkan ih̬f‑inu.

¹⁶ akmurġ‑n s‑yan ġ‑ġwilli ibiddn ġin, sqsaġ‑t ġ‑lmɛna n‑kullu mayan. isawl‑d ifasr‑iyi tiġawsiwin‑an yini‑yyi:

¹⁷ ‹kkuẓ luḥuš‑an mqqurnin gan kkuẓ igldan rad‑ġlin ġ‑wakal.

¹⁸ walaynni ra‑ttfk‑tgldit i‑imẓlayn n‑rbbi amattuy. rad‑bdda‑ṭṭafn tagldit kullu mayd iftan.›

¹⁹ «iriġ ilmma ad‑issanġ lmɛna n‑wis kkuẓ n‑luḥuš lli‑ur‑irwasn wiyyaḍ, ig wad bahra issiwidn s‑uh̬ṣan n‑uwzzal d‑wah̬bašn n‑wanas, ar‑issmġawas ar‑iẓẓaḍ, ilbȷ̈̇ s‑iḍarn‑ns ġaylli‑n‑iqaman.

²⁰ iriġ ula ad‑issanġ lmɛna n‑mraw‑waskawn lli‑illan ġ‑ih̬f‑ns, ula lmɛna n‑isk yaḍni lli‑d‑iġlin, aylliġ‑n‑ḍrn kraḍ‑waskawn ġ‑lgddam‑ns. iṭṭaf alln d‑imi isawaln f‑tġawsiwin mqqurnin, irwas is‑yugʷr askawn‑an yaḍni.

²¹ walaynni sul a‑n‑tmnadġ, s‑ẓriġ isk‑an inkr ar‑itmmaġ d‑imẓlayn n‑rbbi aylliġ‑tn‑inra.

²² yašk‑id‑unmġur n‑zman ġakudan, iḥkam i‑imẓlayn n‑umattuy. truḥ tizi ad‑ṭṭafn imẓlayn tagldit.

²³ «ifasr‑iyi ġakudan lmɛna yini: ‹wis kkuẓ n‑luḥuš iga tis kkuẓṭ‑tglday lli‑ra‑iḥkam ġ‑wakal. ur‑ra‑tg nttat zund tiglday yaḍni. ra‑tssmġawas ddunit kullutt, tlbȷ̈̇‑tt tmzi‑tt.

²⁴ mraw‑waskawn‑an gan mraw igldan lli‑ra‑d‑iġli ġ‑tgldit‑an, iġli‑d ilmma yan yaḍni tigira‑nsn. ur‑ra‑ig nttan zund imzwura. ra‑issḍr kraḍ igldan.

²⁵ ra‑ittini tiġawsiwin mqqurnin f‑a‑itḍaḍḍa rbbi amattuy, ar‑issrfufun imẓlayn n‑rbbi, yiri a‑ibddl tinbaḍin d‑izmaz. rad‑ttfkn imẓlayn n‑rbbi ġ‑ufus‑ns kraḍ isggʷasn d‑mnaṣṣ.

²⁶ walaynni rad‑skiwsn ayt‑lmḥkama, kksn‑as lḥukm‑ns. ra‑ys‑t‑laḥ itthlk ifnu.

²⁷ ttfk‑ilmma‑tgldit ula lḥukm ula timuġra n‑kullu tiglday ġ‑ddu ignwan i‑imẓlayn n‑rbbi amattuy. ra‑tg‑tgldit‑nsn tad bdda idumn, ar‑tn‑tqasan kullu lḥukkam n‑ddunit ar‑sflidn s‑wawal‑nsn.›

²⁸ ġmkan a‑tga‑tġawsa kullutt. nkki danyal, ssiwdn‑iyi iswingimn‑inu bahra, iwrrġ‑uwdm‑inu, walaynni ḥḍiġ taġawsa‑yan ġ‑uwl‑inu.»