danyal 6 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

danyal ġ‑ugʷḍi n‑izmawn

¹ iqṣad daryus a‑iskr miyya d‑sin id‑mraw (120) n‑uriyas a‑tḥkamn ġ‑kullu tisgiw n‑tgldit‑ns.

² izayd isti kraḍ ih̬fawn ma‑itgabaln iriyasn‑an, ar‑didsn‑tmḥasabn f‑ad‑ur‑zzhzun ġ‑aynna igan win‑ugllid. ig danyal yan zġ‑ih̬fawn‑an,

³ imma nttan iwrri yugʷr kullu ih̬fawn yaḍni d‑iriyasn, ašku rruḥ ihiyyan a‑gis‑illan, aylliġ a‑iswingim‑ugllid a‑n‑ig danyal f‑tgldit kullutt.

⁴ ġakudan ad‑nkrn ih̬fawn yaḍni d‑iriyasn ar‑siggiln ma‑s‑a‑taštkkan s‑danyal ġ‑twuri n‑tgldit, walaynni ur‑ufin kra‑s‑a‑srs‑taštkkan ula kra iffuġn aġaras, ašku ar‑bdda‑iskar ma‑fllas‑illan. hatni ur‑gis‑ufin kra iɛibn ula kra inaqṣn.

⁵ inin ilmma irgazn‑an i‑ngratsn: «danyal‑ad, ur‑sar‑gis‑nufi kra n‑lɛib, abla iġ‑nufa kra ġ‑tnbaḍin n‑rbbi‑ns.»

⁶ munn‑d ih̬fawn d‑iriyasn ġakudan ġ‑dar‑ugllid inin‑as: «ad‑bdda‑tdum tudrt‑nk ay‑agllid daryus.

⁷ mšaškan‑d kullu ih̬fawn n‑tgldit d‑iriyasn d‑imšawarn d‑lḥukkam f‑a‑nssufġ yan lamr zġ‑dar‑ugllid, nzzga‑t f‑kullu mddn. zġ‑ġilad ard kmmln kraḍ id‑mraw (30) n‑wass, wanna iḍalbn zġ‑kra n‑rbbi nġd bnadm abla kiyi waḥduk ay‑agllid‑nġ, ra‑n‑ityawgar ġ‑ugʷḍi n‑izmawn.

⁸ ġilad ay‑agllid, zzga lamr. tršmt arra f‑a‑ur‑sar‑yitti, ġmklli iga lqanun n‑ayt‑maday d‑ayt‑faras s‑lamr lli‑ur‑sar‑itittin.»

⁹ iskr‑ugllid daryus ġmkan, iršm arra n‑lamr‑an.

¹⁰ lliġ issn danyal is‑izga‑warra‑yan s‑rršm, iddu s‑tgmmi‑ns. tlla gis yat‑tmṣriyt ġ‑iggi‑ns, rẓmn‑bdda‑warryaḥn‑ns s‑tsga lli‑s‑tlla urušalim. izayd ar‑gis‑iknnu f‑ifaddn‑ns kraṭṭ‑twal kraygatt ass, ar‑itẓalla ar‑ittalġ rbbi‑ns ġmklli imyur.

¹¹ munn‑d ilmma irgazn‑lli, afn‑in danyal ar‑itẓalla ar‑itḍalab rrḥmt n‑rbbi‑ns.

¹² ddun ilmma s‑umnid n‑ugllid, sqsan‑t f‑lamr‑ns inin: «ay‑agllid, is‑ur‑tssufġt lamr f‑uwssan‑ad iġ‑ur‑ta‑kmmiln kraḍ id‑mraw (30), a‑n‑ityawgar ġ‑ugʷḍi n‑izmawn wanna iḍalbn zġ‑kra n‑rbbi nġd bnadm abla kiyi waḥduk ay‑agllid?» yini‑asn‑ugllid: «s‑ṣṣaḥt izga‑wawal‑an s‑lqanun n‑ayt‑maday d‑ayt‑faras lli‑ur‑itittin.»

¹³ zaydn ntni inin i‑ugllid: «han danyal lli‑igan yan zġ‑imsukfn n‑ayt‑yahuda, ur‑k‑igi d‑yat ay‑agllid, wala yiwi‑tt ġ‑warra lli‑tršmt. sul a‑ukan‑itḍalab rbbi‑ns kraṭṭ‑twal ġ‑wass.»

¹⁴ lliġ isfld‑ugllid i‑mad‑nnan, ṭiyr‑as bahra, iswangm d‑ih̬f‑ns a‑ijjnjm danyal. ig‑n fllas tiqqi‑ns a‑t‑ifukku aylliġ‑n‑tḍr tafukt.

¹⁵ munn‑d daġ irgazn‑an ġ‑dar‑ugllid inin‑as: «ay‑agllid, tssnt is‑ur‑iẓḍar a‑yitti kra n‑lamr nġd kra n‑warra izgan s‑ufus n‑ugllid. ġmkan a‑iga lqanun n‑ayt‑maday d‑ayt‑faras.»

¹⁶ yamr‑ugllid ġakudan ad‑d‑awin danyal, grn‑t‑in ġ‑ugʷḍi n‑izmawn. imma agllid isawl s‑danyal yini‑as: «a‑k‑ifukku rbbi‑nk lli‑bdda‑ttqasat.»

¹⁷ awin‑d yan‑uẓru imqqurn srsn‑t‑in f‑imi n‑ugʷḍi, iršm‑t‑ugllid s‑rršm‑ns d‑rršm n‑inmġurn‑ns, a‑ur‑yiẓḍar yan a‑issitti ma‑ittutn f‑danyal.

¹⁸ iwrri‑d‑ugllid ġakudan s‑lqṣr‑ns, izzri iḍ kullut ur‑išši ula ifjjij ula yuška‑yas‑d iṭs.

¹⁹ lliġ ifaw‑wass, inkr‑ugllid iḥarru s‑dar‑ugʷḍi n‑izmawn.

²⁰ lliġ‑n‑yakmur‑ugllid s‑ugʷḍi, iġr‑n i‑danyal s‑wawal iġufan yini‑as: «wa danyal, way‑ah̬ddam n‑rbbi lli‑iddrn, is‑iẓḍar rbbi‑nk lli‑bdda‑ttqasat a‑k‑ifukku zġ‑izmawn?»

²¹ yini‑as‑d danyal: «ad‑bdda‑tdum tudrt‑nk ay‑agllid.

²² ha rbbi‑nu yuzn‑d lmalak‑ns, iqqn imi i‑izmawn, ur‑iyi‑skirn kra ihršn. ašku yufa‑yyi‑n nkki ṣfiġ ġ‑iẓri‑ns. ula ġ‑iẓri‑nk ay‑agllid, ur‑jji‑ak‑skirġ kra ihršn.»

²³ ifrḥ‑ugllid bahra ġakudan, yamr‑tn ad‑d‑alln danyal zġ‑ugʷḍi. lliġ‑t‑id‑ulln, afn‑t‑in ur‑t‑yaġ yat, ašku yumn ġ‑rbbi‑ns.

²⁴ yamr‑ugllid ad‑d‑awin irgazn lli‑yaštkkan s‑danyal, grn‑tn‑in ġ‑ugʷḍi n‑izmawn ntni d‑tarwa‑nsn d‑tmġarin‑nsn. ur‑ta‑lkimn aliġ n‑ugʷḍi, s‑tn‑mɛzban izmawn, rẓn ih̬ṣan‑nsn.

²⁵ yara‑ilmma‑ugllid daryus: «i‑kullu ayt‑tmizar d‑iqbiln d‑tqbilin da‑isawaln s‑wawal‑nsnt ġ‑ddunit kullutt, ad‑awn‑tigat sslamt.

²⁶ lamr‑ad zzgaġ‑t ġassad ġ‑kullu ikalln n‑tgldit‑inu. illa f‑mddn a‑tiksaḍn ar‑trgigiyn ġ‑umnid n‑rbbi n‑danyal, ašku nttan a‑igan rbbi iddrn, illa bdda idum. ur‑sar‑thrš‑tgldit‑ns wala sar itmma lḥkam‑ns.

²⁷ iga walli itfukkun ar‑ijjnjam, ar‑iskar timitar d‑lɛjayb ġ‑ignwan ula akal. hati ijjnjm danyal zġ‑lquwwa n‑izmawn.»

²⁸ izayd danyal injḥ ġ‑uwssan n‑tgldit n‑daryus d‑win kuraš gu‑faras.