danyal 5 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tirra n‑ufus f‑uġʷrab

¹ iskr‑ugllid bilšaṣṣar yan imnsi bahra imqqurn. munn‑d‑dars‑walf n‑inmġurn‑ns, ar‑issa aman n‑waḍil iktin ġ‑wammas‑nsn.

² lliġ iswa bilšaṣṣar aman n‑waḍil iktin, yamr ad‑d‑awin irukutn n‑uwrġ d‑nnʷqrt lli‑d‑yusi babas nabuh̬adnaṣr zġ‑tgmmi n‑rbbi ġ‑urušalim. ira‑ugllid a‑gisn‑isu aman lli‑iktin ntta d‑inmġurn‑ns d‑tmġarin‑ns d‑tsmgin‑ns.

³ awin‑d irukutn n‑uwrġ lli‑d‑ityattayn zġ‑tgmmi n‑rbbi ġ‑urušalim, isu‑gisn‑ugllid d‑inmġurn‑ns d‑tmġarin‑ns d‑tsmgin‑ns.

⁴ lliġ swan aman n‑waḍil iktin, ar‑tsbbaḥn i‑id‑rbbi‑nsn lli‑ityawskarn zġ‑uwrġ d‑nnʷqrt d‑wanas d‑uwzzal d‑ukššuḍ d‑uẓru,

⁵ ġakudan ad‑d‑bann iḍuḍan n‑ufus n‑bnadm, ar‑taran f‑ljir n‑uġʷrab ġ‑lqṣr n‑ugllid ġ‑lgddam n‑tmsafut. timšt n‑ufus‑an, lliġ a‑ttara, ar‑tt‑itmnad‑ugllid.

⁶ imil iwrrġ‑uwdm n‑ugllid, ssġufunt iswingimn‑ns bahra, aylliġ brin ih̬ṣan‑ns, ar‑trgigiyn ifaddn‑ns.

⁷ iġr s‑jjhd ad‑as‑d‑awin imajusiyn d‑ayt‑kaldan d‑iqddašn. isawl‑ugllid s‑kullu ayt‑tḥkimt‑an n‑babil yini‑asn: «wanna iẓḍarn a‑iġr tirra‑yad, iml‑iyi‑d lmɛna‑nsnt, hati ra‑ils aslham azggʷaġ d‑tzra n‑uwrġ i‑umggrḍ, ig ntta wis kraḍ n‑lḥukkam ġ‑tgldit.»

⁸ kšmn‑d kullu ayt‑tḥkimt n‑ugllid, walaynni ur‑ẓḍarn ad‑ġrn tirra‑yan ula ad‑mln lmɛna‑nsnt i‑ugllid.

⁹ yiksaḍ‑ilmma‑ugllid bilšaṣṣar bahra, iwrrġ‑uwdm‑ns, duhdun kullu inmġurn‑ns.

¹⁰ tsfld innas n‑ugllid i‑waqqur‑an ġ‑dar‑ugllid d‑inmġurn‑ns, tkšm‑d s‑uḥanu imqqurn lli‑ġ‑illa imnsi, tini‑as: «ad‑bdda‑tdum tudrt‑nk ay‑agllid. ad‑ur‑tiksaḍt ula iwrrġ‑uwdm‑nk.

¹¹ illa ġ‑tgldit‑nk yan‑urgaz ġ‑illa rruḥ n‑rbbi amẓlay. ġ‑uwssan n‑babak ttyafa gis tifawt n‑tfhimt ula taḥkimt zund taḥkimt n‑rbbi. issġli‑t babak lli‑igan agllid nabuh̬adnaṣr, ig‑t d‑unmġur n‑išuwwafn d‑imajusiyn d‑ayt‑kaldan d‑iqddašn.

¹² ašku illa gis rruḥ ihiyyan, tili‑gis‑twassna d‑tfhimt baš a‑ifasr tiwargiw, iml lmɛni ntlnin, ifsi timukrisin nna‑illan. yili kullu mayan ġ‑danyal lli‑mi‑ifka‑ugllid ism balṭašaṣṣar. zayd ġilad tġrt‑d i‑danyal, iml‑ak lmɛna‑yan.»

danyal imla lmɛna n‑tirra

¹³ awin‑d danyal ġakudan s‑umnid n‑ugllid. isawl‑as‑ugllid yini: «is‑tgit danyal lli‑d‑yiwi‑ugllid baba zġ‑yahuda ġ‑gr imsukfn n‑ayt‑yahuda?

¹⁴ sfldġ fllak is‑gik‑illa rruḥ n‑rbbi, ttyafa gik tifawt n‑tfhimt d‑tḥkimt ihiyyan.

¹⁵ ha‑yyi ġriġ i‑ayt‑tḥkimt d‑imajusiyn ad‑dari‑ḥaḍrn f‑ad‑ġrn tirra‑yad mln‑iyi lmɛna‑nsnt, walaynni ur‑ẓḍarn.

¹⁶ sfldġ is‑tẓḍart kiyi a‑tmalat lmɛni ar‑tfssit timukrisin. iġ‑tufit a‑tġrt tirra‑yad tmlt‑iyi lmɛna‑nsnt, ra‑tlst aslham azggʷaġ d‑tzra n‑uwrġ i‑umggrḍ, twrrit tgt kiyi wis kraḍ n‑lḥukkam ġ‑tgldit.»

¹⁷ isawl danyal ġ‑umnid n‑ugllid yini: «ad‑dark‑qamant‑tsmġurin‑nk ay‑agllid, tfkt tiġrad‑nk i‑wayya, walaynni rad‑ak‑ġrġ tirra, mlġ‑ak lmɛna‑nsnt.

¹⁸ way‑agllid, rbbi amattuy ifka i‑babak nabuh̬adnaṣr tagldit d‑tmuġra d‑lmajd d‑lhibt.

¹⁹ f‑ssibt n‑tmuġra lli‑as‑ifka, kkan‑tt‑in kullu ayt‑tmizar d‑iqbiln d‑tqbilin ar‑zġ‑gis‑tiksaḍn ar‑zġ‑gis‑tġuwḍn. ar‑inqqa wanna ira, yadj wanna ira. ar‑ittall wanna ira, izzugz wanna ira.

²⁰ walaynni lliġ itɛjjb ġ‑ih̬f‑ns, ar‑issiqar ul‑ns, ig‑n agayu‑ns s‑uflla. han ityawgar zġ‑lɛrš n‑tgldit‑ns, ttyawkkas‑as lhibt‑ns.

²¹ ityawdḥay zġ‑gr mddn, iwrri iga lɛaql‑ns zund win luḥuš. iqama ġ‑gr iġʷyal n‑lh̬la, ar‑ištta tuga zund amugay, ar‑ttmmġ ddat‑ns s‑tġli n‑ignwan. ġakudan a‑iwrri yissan izd rbbi amattuy a‑iḥkamn tagldit n‑bnadm ar‑n‑fllas‑itgga wanna ira.

²² imma kiyi a‑bilšaṣṣar lli‑igan yus, wah̬h̬a tssnt kullu mayan, ur‑tudrt i‑ih̬f‑nk.

²³ ha kiyi tssmqqurt ih̬f‑nk f‑rbbi n‑ignna, tamrt ad‑d‑awin irukutn n‑tgmmi‑ns s‑umnid‑nk, tsut gisn aman n‑waḍil iktin kiyi d‑inmġurn‑nk d‑tmġarin‑nk d‑tsmgin‑nk, ar‑ttsbbaḥt i‑id‑rbbi n‑nnʷqrt d‑uwrġ d‑wanas d‑uwzzal d‑ukššuḍ d‑uẓru lli‑ur‑itmnadn ula da‑sflidn ula da‑tfhamn. imma rbbi lli‑yusin ġ‑ufus‑ns tunfust‑nk ula kullu ma‑tqṣadt, han ur‑a‑ti‑ttuqqart kiyi.

²⁴ nttan a‑d‑yuznn timšt n‑ufus‑an ula tirra lli‑yura.

²⁵ ġmkad ad‑gan iwaliwn n‑tirra‑yan: ‹manay manay taqal u‑farsin›.

²⁶ d‑ġmkad a‑tga lmɛna‑nsn. manay: ‹iḥasb rbbi ussan n‑tgldit‑nk isstmma‑tn.›

²⁷ taqal: ‹yuwzn‑k ġ‑lmizan yaf‑k‑in tfssust.›

²⁸ fars: ‹ttyawbḍa‑tgldit‑nk, ttfk i‑ayt‑maday d‑ayt‑faras.› »

²⁹ yamr bilšaṣṣar ġakudan ad‑sslsn i‑danyal aslham azggʷaġ d‑tzra n‑uwrġ i‑umggrḍ‑ns. ibrrḥ srs is‑iwrri iga wis kraḍ n‑lḥukkam ġ‑tgldit.

³⁰ ġ‑iḍ‑an a‑ityawnġa bilšaṣṣar agllid n‑ayt‑babil.

³¹ yamẓ daryus gu‑maday tagldit, d‑ntta dars sḍis id‑mraw d‑sin (62) n‑usggʷas ġ‑lɛmr‑ns.